ന്യൂഡല്‍ഹി:
രാഹുല്‍ ഗാന്ധിക്കു വേണ്ടി വയനാട് സീറ്റ് ഒഴിഞ്ഞുകൊടുത്ത കോഴിക്കോട് ഡിസിസി പ്രസിഡന്‍റ് ടി.സിദ്ദിഖിന് പ്രിയങ്ക ഗാന്ധിയുടെ പ്രശംസ. മികച്ച ഡിസിസി പ്രസിഡന്റും ആത്മാര്‍ഥതയുള്ള കോണ്‍ഗ്രസ് പ്രവര്‍ത്തകനുമാണ് സിദ്ദിഖെന്നു പ്രിയങ്ക ഫേസ്ബുക്കില്‍ കുറിച്ചു. രാഹുല്‍ഗാന്ധിക്കൊപ്പം നില്‍ക്കുന്ന സിദ്ദിഖിന്റെ ഫോട്ടോ പങ്കുവച്ചു കൊണ്ടാണ് പ്രിയങ്ക ഇതു കുറിച്ചിരിക്കുന്നത്. ഇരുവരുടെയും ചിത്രം മൊബൈല്‍ ഫോണില്‍ പകര്‍ത്തുന്നതു പ്രിയങ്കയാണ്.
ലോക്സഭ തിരഞ്ഞെടുപ്പില്‍ രാജ്യത്ത് തന്നെ ഇതിനോടകം ചര്‍ച്ചയായി കഴിഞ്ഞ മണ്ഡലമാണ് വയനാട്. രാഹുല്‍ ഗാന്ധി പോരാട്ടത്തിനിറങ്ങിയതോടെ കേരളത്തില്‍ യുഡിഎഫിന് പുത്തന്‍ ആവേശമാണെന്ന് പ്രകടനങ്ങളില്‍ നിന്നും വ്യക്തമാണ്. ഇക്കൂട്ടത്തില്‍ സൈബര്‍ ലോകത്ത് ഏതിരാളികളില്‍ നിന്നും ആക്രമണം ഏറ്റുവാങ്ങിയത് ടി.സിദ്ദിഖാണ്. വയനാട്ടില്‍ ആദ്യം സ്ഥാനാർത്ഥിയായി പ്രഖ്യാപിക്കുകയും എന്നാല്‍ രാഹുലിന് വേണ്ടി സീറ്റ് ഒഴിഞ്ഞുകൊടുക്കുകയുമായിരുന്നു സിദ്ദിഖ്.
എന്നാല്‍ സിദ്ദിഖിന്റെ ചിത്രം വന്ന പ്രിയങ്കയുടെ പേജ് ഏപ്രില്‍ നാലിനാണ് ഉണ്ടാക്കിയിരിക്കുന്നത്. വയനാട്ടിലെ പ്രിയങ്കയുടെ വരവും രാഹുലിന്റെ പത്രികാ സമര്‍പ്പണത്തിന്റെ ചിത്രവും മാത്രമാണ് ഇതിലുള്ളത്. ഇതിനൊപ്പമാണ് സിദ്ദിഖിനെ പുകഴ്‌ത്തുന്ന ഫോട്ടോയും. ഈ പേജ് വ്യാജമാണെന്നാണ് കോണ്‍ഗ്രസിലെ ഒരു കൂട്ടര്‍ പറയുന്നത്. ലക്ഷങ്ങള്‍ ഫോളോവേഴ്‌സുള്ള ട്വിറ്ററും ഫെയ്‌സ് ബുക്ക് അക്കൗണ്ടുമെല്ലാം പ്രിയങ്കയ്ക്കുണ്ട്. അതെല്ലാം ഉള്ളപ്പോള്‍ വ്യാജ പേജുണ്ടാക്കി സിദ്ദിഖിന് വേണ്ടി ആരോ നടത്തിയ പ്രചരണമാണ് ഈ പോസ്‌റ്റെന്നാണ് ഉയരുന്ന ആരോപണം.
കേരളത്തിലെ പ്രധാന നേതാവായി ഉയരാന്‍ സിദ്ദിഖ് നടത്തുന്ന നീക്കമാണ് ഈ പോസ്‌റ്റെന്നാണ് ആരോപണം. ഷാഫി പറമ്പില്‍ ഫേസ്ബുക്കില്‍ ചിത്രവും വിവരണവും നല്‍കി ഒരു മണിക്കൂര്‍ കഴിഞ്ഞാണ് സിദ്ദിഖിനെ പുകഴ്‌ത്തി പ്രിയങ്കയുടെ വ്യാജ അക്കൗണ്ടില്‍ ഫോട്ടോയും കമന്റും എത്തിയത്. വലിയ രീതിയില്‍ ഇത് എ ഗ്രൂപ്പുകാര്‍ പ്രചരിപ്പിക്കുന്നുമുണ്ട്.
https://www.facebook.com/shafiparambilmla/posts/2187965211240433