31 C
Kochi
Friday, January 27, 2023

In Depth

In-Depth News

ആര്‍ത്തവ അവധി ലിംഗ സമത്വത്തിന് എതിരോ?; സ്ത്രീകള്‍ സംസാരിക്കുന്നു

0
Reading Time: 6 minutes

 

ആര്‍ത്തവം, ഒരു സ്ത്രീ ശരീരത്തിന്റെ ജൈവിക പ്രക്രിയയുടെ ഭാഗമായി സംഭവിക്കുന്ന ആരോഗ്യ പ്രശ്നമാണ്. അയിത്തം, പാരമ്പര്യം, ജാതി, വിശ്വാസം തുടങ്ങി സകലതിലും ആര്‍ത്തവത്തെ കാല്‍പനികവല്‍ക്കരിക്കുന്നതു കൊണ്ടാണ് ആര്‍ത്തവം ഒരു ജൈവികമായ ആരോഗ്യപ്രശ്നമാണെന്ന് വീണ്ടും വീണ്ടും പറയേണ്ടി വരുന്നത്. ആര്‍ത്തവ ദിനങ്ങള്‍ പല സ്ത്രീകള്‍ക്കും കഠിനമായതിനാല്‍ ഈ ദിവസങ്ങില്‍ ചെയ്യുന്ന എല്ലാ പണികളില്‍ നിന്നും ഒരവധി വേണമെന്ന് സ്ത്രീകള്‍ ആഗ്രഹിക്കുന്നുണ്ട്. സ്ത്രീയുടെ ശാരീരിക- മാനസിക ബുദ്ധിമുട്ടുകളെ മുന്‍നിര്‍ത്തി ആര്‍ത്തവ അവധിയുമായി ബന്ധപ്പെട്ട് സ്വാഭാവികമായും രാഷ്ട്രീയമായും ചര്‍ച്ചകള്‍ക്ക് തുടക്കം കുറിക്കേണ്ടതുണ്ട്. അത്തരമൊരു ചര്‍ച്ചയ്ക്കു അടുത്തിടെ തുടക്കമിട്ടത് കൊച്ചി ശാസ്ത്ര സാങ്കേതിക സര്‍വകലാശാലയാണ്.

കൊച്ചി ശാസ്ത്ര സാങ്കേതിക സര്‍വകലാശാല

ഓരോ സെമസ്റ്ററിലും പരീക്ഷയെഴുതാന്‍ 75 ശതമാനം ഹാജരാണ് വേണ്ടത്. എന്നാല്‍, ആര്‍ത്തവ അവധി പരിഗണിച്ച് വിദ്യാര്‍ഥികള്‍ക്ക് 73 ശതമാനം ഹാജരുണ്ടായാലും പരീക്ഷയെഴുതാമെന്ന ഭേദഗതിയാണ് കുസാറ്റ് കൊണ്ടുവന്നത്. ഇതിന്റെ ചുവടുപിടിച്ച് സംസ്ഥാനത്തെ ഉന്നത വിദ്യാഭ്യാസ വകുപ്പിന് കീഴിലെ എല്ലാ സര്‍വകലാശാലകളിലും ആര്‍ത്തവ അവധി നടപ്പാക്കുന്നത് പരിഗണിക്കുമെന്ന് ഉന്നത വിദ്യാഭ്യാസ-സാമൂഹ്യനീതി മന്ത്രി ഡോ. ആര്‍ ബിന്ദു പറഞ്ഞിട്ടുണ്ട്. ആര്‍ത്തവ സമയത്ത് വിദ്യാര്‍ഥികള്‍ അനുഭവിക്കുന്ന മാനസിക ശാരീരിക പ്രയാസങ്ങള്‍ കണക്കിലെടുത്ത് എല്ലാ സര്‍വകലാശാലകളിലും ആര്‍ത്തവാവധി നടപ്പാക്കാന്‍ വേണ്ട നടപടി സ്വീകരിക്കും എന്നാണ് മന്ത്രി പറഞ്ഞത്.

ഉന്നത വിദ്യാഭ്യാസ-സാമൂഹ്യനീതി മന്ത്രി ഡോ. ആര്‍ ബിന്ദു

കൊച്ചി സര്‍വകലാശാലയെ പിന്തുടര്‍ന്ന് കേരള സാങ്കേതിക സര്‍വകലാശാലയിലും ആര്‍ത്തവ അവധി അനുവദിക്കാന്‍ ബോര്‍ഡ് ഓഫ് ഗവേര്‍ണന്‍സ് തിരുമാനമെടുത്തിട്ടുണ്ട്. ആര്‍ത്തവ സമയത്ത് വിദ്യാര്‍ഥികള്‍ അനുഭവിക്കുന്ന മാനസിക ശാരീരിക ബുദ്ധിമുട്ടുകള്‍ കണക്കിലെടുത്താണ് ഈ തിരുമാനം. കെ ടി യുവിന്റെ കീഴിലുള്ള എല്ലാ കോളെജുകളിലും ആര്‍ത്തവ അവധി അനുവദിക്കാനാണ് ബോര്‍ഡ് ഓഫ് ഗവേര്‍ണന്‍സ് ശുപാര്‍ശ ചെയ്തത്.

വിദ്യാര്‍ഥികള്‍ക്കും സ്ത്രീകള്‍ക്കും ആര്‍ത്തവ അവധി നല്‍കണമെന്ന് ആവശ്യപ്പെട്ട് അഭിഭാഷകനായ ശൈലേന്ദ്രമണി ത്രിപാഠി സുപ്രീംകോടതിയില്‍ പൊതുതാല്‍പ്പര്യ ഹര്‍ജി സമര്‍ച്ചിപ്പ് ദിവസങ്ങള്‍ക്കു ശേഷമാണ് കുസാറ്റില്‍ വിദ്യാര്‍ഥികള്‍ക്ക് ആര്‍ത്തവാവധി അനുവദിച്ച വാര്‍ത്ത വരുന്നത്. തീര്‍ത്തും ശ്രദ്ധേയമായ തീരുമാനം തന്നെയാണ് ഇത്. വിദ്യാര്‍ഥി സംഘടനായ എസ്എഫ്ഐയുടെ ഇടപെടല്‍ മൂലമാണ് വളരെ വൈകിയാണെങ്കിലും പുരോഗന കേരളത്തിലെ ഒരു സര്‍വകലാശാലയില്‍ ഈ തീരുമാനം നടപ്പാക്കാന്‍ കഴിഞ്ഞത്. വൈകിപ്പോയ നടപടി ആണെങ്കിലും ഒരു വിഭാഗം സ്ത്രീകള്‍ക്ക് പൊതുവേ സ്വാഗതാര്‍ഹമാണ്. കാരണം ആര്‍ത്തവത്തിന്റെ എല്ലാ ശാരീരിക- മാനസിക ബുദ്ധിമുട്ടുകളും നേരിടുന്നത് അവരാണല്ലോ.

‘ഇങ്ങനെ ഒരു അവധി ലോകത്ത് പലയിടത്തും നടപ്പാക്കിയിട്ടുണ്ട്. ഇവിടെ എന്തുകൊണ്ട് ആയിക്കൂടാ എന്ന ചിന്തയില്‍ നിന്നാണ് ഞങ്ങള്‍ ആര്‍ത്തവ അവധി വേണം എന്ന ആവശ്യവുമായി സര്‍വകലാശാല രജിസ്റ്റാറെ സമീപിക്കുന്നത്. പിന്നീട പ്രോ വൈസ് ചാന്‍സലറുമായി യൂണിയന്‍ അംഗങ്ങള്‍ നടത്തിയ ചര്‍ച്ചയിലാണ് സെമസ്റ്ററില്‍ രണ്ട് ശതമാനം ലീവ് എന്ന രീതിയിലേയ്ക്ക് കാര്യങ്ങള്‍ എത്തിയത്. നിലവില്‍ ഇക്കാര്യത്തില്‍ പ്രത്യേക പോളിസികളൊന്നും ഇല്ലാത്തതു കൊണ്ട് ആദ്യപടിയായി ഏറ്റവും പ്രായോഗികമായ തീരുമാനമാണ് യൂണിവേഴ്സിറ്റി ഇപ്പോള്‍ എടുത്തിരിക്കുന്നത്. ആര്‍ത്തവ ദിവസങ്ങള്‍ ഓരോരുത്തര്‍ക്കും വ്യത്യസ്തമാണ്. അതിനെ ബഹുമാനിച്ചു കൊണ്ട് ആവശ്യമുള്ള ആളുകള്‍ ഈ ലീവ് പ്രയോജയപ്പെടുത്തട്ടെ. വേണ്ടാത്തവര്‍ ക്ലാസില്‍ വന്നോട്ടെ. ഇതില്‍ വ്യതിപരമായ തിരഞ്ഞെടുപ്പ് കൊടുക്കുക.’, കുസാറ്റ് വിദ്യാര്‍ഥി യൂണിയന്‍ ചെയര്‍ പേഴ്സണ്‍ നമിത ജോര്‍ജ് വോക്ക് മലയാളത്തോട് പറഞ്ഞു.

കുസാറ്റ് വിദ്യാര്‍ഥി യൂണിയന്‍ ചെയര്‍ പേഴ്സണ്‍ നമിത ജോര്‍ജ്

ആര്‍ത്തവ സമയത്ത് അവധി നിഷേധിക്കുന്നത് ആര്‍ട്ടിക്കിള്‍ പതിനാലിന്റെ ലംഘനമാണെന്നും ആര്‍ത്തവ വേദനയെ എല്ലാവരും അവഗണിക്കുകയാണെന്നുമാണ് ശൈലേന്ദ്രമണി ത്രിപാഠി സമര്‍പ്പിച്ചിരിക്കുന്ന അവധിയില്‍ പറയുന്നത്. ആര്‍ത്തവ സമയത്ത് ഒരു സ്ത്രീ അനുഭവിക്കുന്ന വേദന ഹൃദയാഘാത സമയത്ത് ഒരാള്‍ അനുഭവിക്കുന്ന വേദനയ്ക്ക് തുല്യമാണെന്ന് യൂണിവേഴ്‌സിറ്റി കോളേജ് ലണ്ടന്‍ നടത്തിയ പഠനത്തെ ഉദ്ദരിച്ച് ശൈലേന്ദ്രമണി ഹര്‍ജിയില്‍ പറയുന്നുണ്ട്. ആര്‍ത്തവ വേദന ജീവനക്കാരുടെ ഉല്‍പ്പാദനക്ഷമത കുറയ്ക്കുമെന്നും അത് അവരുടെ ജോലിയെ ബാധിക്കുമെന്നും അദ്ദേഹം ചൂണ്ടിക്കാട്ടി. ഇവിപാനന്‍, സൊമാറ്റോ, സ്വിഗി, ബൈജൂസ്, മാതൃഭൂമി, ഗോസൂപ്പ്, മാഗ്സ്റ്റര്‍, എആര്‍സി, ഇന്‍ഡസ്ട്രി തുടങ്ങിയ കമ്പനികള്‍ സ്ത്രീകള്‍ക്ക് ശമ്പളത്തോടുകൂടി ആര്‍ത്തവ അവധി നല്‍കുന്നുണ്ടെന്നും അദ്ദേഹം വ്യക്തമാക്കി.

ആര്‍ത്തവ കാലത്ത് സ്ത്രീകള്‍ അനുഭവിക്കുന്ന ശാരീരിക പ്രശ്നങ്ങള്‍ ആര്‍ക്കും മനസിലാവില്ല എന്നാണ് അഭിഭാഷകയും സാമൂഹിക പ്രവര്‍ത്തകയുമായ കുക്കു ദേവകി വോക്ക് മലയാളത്തോട് പറഞ്ഞത്. ആര്‍ട്ടിക്കിള്‍ 14 പ്രകാരം സ്ത്രീകള്‍ക്ക് നിര്‍ബന്ധിത അവധി നല്‍കണമെന്നും അഡ്വ. കുക്കു പറയുന്നു.

അഡ്വ. കുക്കു ദേവകി

‘ആര്‍ത്തവ സമയത്ത് പലര്‍ക്കും മൂഡ് സ്വിംഗ് പോലെയുള്ള പ്രശ്നങ്ങള്‍ ഉണ്ടാവുന്നുണ്ട്. പ്രസവശേഷമാണ് എനിക്ക് ആര്‍ത്തവത്തിന്റെ പ്രശ്നങ്ങള്‍ ഉണ്ടായത്. പഠിക്കുന്ന കാലത്തൊക്കെ കൂടെയുള്ള പെണ്‍കുട്ടികള്‍ ആര്‍ത്തവ നാളുകളില്‍ ബുദ്ധിമുട്ടുന്നത് കണ്ടിട്ടുണ്ട്. ഈ ദിവസങ്ങളില്‍ അവധി കിട്ടുകയാണെങ്കില്‍ അത് നല്ല കാര്യം ആണെന്ന് തോന്നിയിട്ടുണ്ട്. ഞാന്‍ അടയാര്‍ കലാക്ഷേത്രയില്‍ നൃത്തം പഠിക്കുന്ന സമയത്ത് ആര്‍ത്തവ നാളുകളില്‍ മൂന്നു ദിവസം അവധി തന്നിരുന്നു. മൂന്നു ദിവസം ക്ലാസില്‍ വന്നിരിക്കാം. എന്നാല്‍ ഡാന്‍സ് കളിക്കേണ്ട ആവശ്യമില്ല. അത് നല്ലകാര്യം ആയിരുന്നു. പരസ്യത്തില്‍ കണ്ടിട്ടുണ്ട് ആര്‍ത്തവ സമയത്ത് ഡാന്‍സ് കളിക്കാം എന്നൊക്കെ. എന്നാല്‍ ഇതൊന്നും പറ്റാതെ ഭയങ്കര ബുദ്ധികുട്ടുകള്‍ അനുഭവിക്കുന്ന കുട്ടികളെ ഞാന്‍ കണ്ടിട്ടുണ്ട്. ആര്‍ത്തവം തുടങ്ങുന്നതിനു മുമ്പേയുള്ള അസ്വസ്ഥകളും കൂടി കണക്കിലെടുത്ത് എപ്പോഴാണോ അവധി വേണ്ടത് ആ സമയത്ത് അവധി നല്‍കണം എന്നാണ് എന്റെ അഭിപ്രായം.’ അഡ്വ. കുക്കു പറയുന്നു.

ആര്‍ത്തവ അവധി നേരത്തെ നടപ്പാക്കേണ്ടിയിരുന്ന ഒന്നായിരുന്നുവെന്നും എന്നിരുന്നാലും പുരോഗമന സമൂഹത്തില്‍ അതൊരു നല്ല ചുവടുവെപ്പാണെന്നും ഫെമിനിസ്റ്റും സാമൂഹിക പ്രവര്‍ത്തകയുമായ സുല്‍ഫത്ത് എം വോക്ക് മലയാളത്തോട് പറഞ്ഞു. ‘സ്ത്രീകളുടെ സ്വാഭാവികമായ ശാരീരിക പ്രക്രിയയാണ് ആര്‍ത്തവം. അതിന്റെ വേദനകളും അസ്വസ്ഥതകളും മനുഷ്യന്‍ ഉണ്ടായ കാലം മുതല്‍ സ്ത്രീകള്‍ അനുഭവിക്കാറുണ്ട്. ഇത് നേരത്തെ തന്നെ വരേണ്ടതായിരുന്നു. പല മേഖലകളിലും ഈ അവധി ഉണ്ടാവേണ്ടതുണ്ട്. വിദ്യാഭ്യാസ സ്ഥാപനങ്ങളില്‍ ആര്‍ത്തവവുമായി ബന്ധപ്പെട്ട് റസ്റ്റ് റൂമുകള്‍ വരുന്നു, പാഡ് വെന്റിംഗ് മെഷീനുകള്‍ വരുന്നു. ഇതൊക്കെ ആധുനിക കലാത്ത് ആര്‍ത്തവം സ്ത്രീകള്‍ക്ക് ഉണ്ടാക്കുന്ന ശാരീരിക പ്രശ്നങ്ങളെ പരിഗണിക്കുകയും സമൂഹത്തിന്റെ മൊത്തം കാഴ്ചപ്പാടില്‍ നിന്നുകൊണ്ട് സ്ത്രീയുടെ പ്രത്യുല്‍പ്പാദനവുമായി ബന്ധപ്പെട്ട് ഒരു ശാരീരിക പ്രക്രിയയാണെന്ന് അംഗീകരിക്കുകയും ചെയ്യുന്നത് കൊണ്ടാണ്. ഒരു സ്ത്രീ ആര്‍ത്തവത്തില്‍ ആണ് എന്നുള്ളത് മൂടി വെക്കേണ്ട ഒന്നല്ല എന്നുള്ളത് കൂടി ഈ അവധിയില്‍ വരുന്നുണ്ട്.’, സുല്‍ഫത്ത് എം പറയുന്നു.

സുല്‍ഫത്ത് എം

ആര്‍ത്തവ അവധി നല്‍കുന്നത് ലിംഗ സമത്വ കാഴ്ചപ്പാടിന് എതിരാണ് എന്ന വാദം ഒരു വിഭാഗം ആളുകള്‍ ഉന്നയിക്കുന്നുണ്ട്. ആര്‍ത്തവം സ്വാഭാവിക പ്രക്രിയ ആണെന്നും അതിന് ഒരു അവധി നല്‍കി മഹത്വവല്‍ക്കരിക്കേണ്ട ആവിശ്യമില്ലെന്നുമാണ് ഇത്തരക്കാര്‍ പറയുന്നത്. ആര്‍ത്തവം ഇല്ലാത്തവര്‍ അതിനെകുറിച്ച് സംസരിക്കരുത് എന്നാണ് കുസാറ്റ് വിദ്യാര്‍ഥി യൂണിയന്‍ ചെയര്‍ പെര്‍സണ്‍ നമിത ജോര്‍ജ് ഈ വാദങ്ങളോട് പ്രതികരിച്ചത്. ‘തുല്യത എന്ന് പറയുന്നത് തുല്യമായ അവസരങ്ങള്‍ ആണ്. ആ ദിവസങ്ങളില്‍ എന്തെങ്കിലും ബുദ്ധിമുട്ടുകള്‍ ഉണ്ടെങ്കില്‍ ഒരു പ്രത്യേക അവസരങ്ങള്‍ നമ്മുക്ക് ഉണ്ടാവണം. അതാണ് തുല്യത. അതിലൂടെ കടന്നുപോകുന്ന വേദനകളും വിഷമങ്ങളും ഒന്നും മറ്റാര്‍ക്കും അറിയില്ല. അത് അറിയുന്നവര്‍ മാത്രം ചര്‍ച്ച ചെയ്തോട്ടെ.’, നമിത ജോര്‍ജ് കൂട്ടിച്ചേര്‍ത്തു.

‘ആര്‍ത്തവ അവധി സമത്വം അല്ലെന്നൊക്കെ പറയുന്ന ചര്‍ച്ചകള്‍ കാണുന്നുണ്ട്. ഇതൊക്കെ മനുഷ്യന്റെ ശരീരിക വേദനകളുമായി ബന്ധപ്പെട്ടു കിടക്കുന്ന കാര്യങ്ങളാണ്. അതിനൊക്കെ അവധി കൊടുത്തേ പറ്റൂ. ഈ അവധി നല്‍കല്‍ എല്ലാം കുറെ കാലം മുമ്പേ വരേണ്ടതാണ്. പ്രസവാവധി നല്‍കുന്നത് പോലെ തന്നെയാണ് ഇതും. ജോലി ചെയ്യുന്ന സ്ത്രീകളെ സംബന്ധിച്ച് അവര്‍ക്ക് ഓഫീസിലെയും വീടുകളിലെയും ജോലികള്‍ ചെയ്യേണ്ടതായി വരും. ഈ എല്ലാ സ്ഥലങ്ങളില്‍ നിന്നും സ്ത്രീകള്‍ക്ക് ആര്‍ത്തവകാലത്ത് നിര്‍ബന്ധിത അവധി നല്‍കണം എന്നാണ് എന്റെ അഭിപ്രായം. സ്ത്രീകളുടെ ആരോഗ്യം മുന്‍നിര്‍ത്തി ആരോഗ്യ മന്ത്രാലയം ഇടപെടല്‍ നടത്തി ഇങ്ങനെ ഒരു അവധി നല്‍കണം.’, അഡ്വ. കുക്കു അഭിപ്രായപ്പെട്ടു.

സെക്സും ജെന്‍ഡറും തമ്മിലുള്ള വ്യത്യാസം അറിയാത്തവര്‍ ആണ് ആര്‍ത്തവ അവധി ലിംഗ സമത്വത്തിന് വിരുദ്ധമായ കാഴ്ചപ്പാട് ആണ് എന്ന് പറയുന്നത്. അങ്ങനെയെങ്കില്‍ പ്രസവത്തിന് അവധി കൊടുക്കുന്നത് ലിംഗ സമത്വത്തിന് എതിരാണല്ലോ. അപ്പോള്‍ ഇതിനെ എങ്ങനെയാണ് കാണുന്നത്?. മുമ്പ് പ്രസവത്തിനു ആശുപത്രികളില്‍ പോകുന്നതിനെ കുറിച്ചും ഇത്തരം വാദങ്ങള്‍ ഉണ്ടായിട്ടുണ്ട്. സ്ത്രീകളുടെ പ്രസവം വീടിനകത്ത് സ്വാഭാവികമായി സംഭവിക്കേണ്ട ഒന്നാണെന്നും അതിനെ വൈദ്യശാസ്ത്രവുമായി കൂട്ടിയിണക്കി രോഗമായി കാണുന്ന പ്രവണത തെറ്റാണെന്ന പ്രചരണമായിരുന്നു ഉണ്ടായിരുന്നത്. ഒരു ശാരീരിക പ്രക്രിയ എന്ന നിലയില്‍ സ്ത്രീയുടെ ശരീരത്തില്‍ മാത്രം സംഭവിക്കുന്ന ഒന്നാണ് ആര്‍ത്തവം. അത് പലപ്പോഴും മാനസികമായും ശാരീരികമായും ഒരുപാട് സംഘര്‍ഷങ്ങള്‍ നല്‍കും. ഇത്തരം കാര്യങ്ങളെ ലിംഗ സമത്വത്തിനു അനുകൂലമായാണ് കാണേണ്ടത്. കാരണം സ്ത്രീക്ക് മാത്രമുള്ള ഇത്തരം പ്രശ്നങ്ങളെ സ്ത്രീ പക്ഷത്തു നിന്ന് കൊണ്ട് അംഗീകരിക്കുകയും അതിനെ പരിഹരിക്കപ്പെടുന്ന തരത്തില്‍ സ്ത്രീയ്ക്ക് അനുകൂലമായ തീരുമാനങ്ങള്‍ എടുക്കുകയും വേണം. ലോകത്ത് പല രാജ്യങ്ങളിലും, ഇന്ത്യയില്‍ തന്നെ പല സ്ഥാപനങ്ങളിലും ആര്‍ത്തവ അവധി നല്‍കുന്നുണ്ട്. പുതിയ തലമുറയിലെ പെണ്‍കുട്ടികളെ സംബന്ധിച്ച് അവര്‍ക്ക് ചെറിയ പ്രായത്തില്‍ തന്നെ ആര്‍ത്തവം ഉണ്ടാവുകയും അതിന്റെ ശാരീരിക അവശതകളും വേദനകളും ഒക്കെ അനുഭവിക്കുന്നുണ്ട്. എല്ലാവര്‍ക്കും ശാരീരിക പ്രശ്നം ഉണ്ട് എന്നല്ല. എന്നിരുന്നാലും ഒരു വിഭാഗം സ്ത്രീകള്‍ക്ക് എങ്കിലും അത് ഉണ്ടെങ്കില്‍ പരിഗണിക്കപ്പെടെണ്ടതാണ്. മിക്കവാറും ആര്‍ത്തവ ദിവസങ്ങളില്‍ പെണ്‍കുട്ടികള്‍ ലീവ് എടുക്കാറുണ്ട്. ഈ ശാരീരിക പ്രക്രിയയെ അംഗീകരിച്ചു കൊണ്ട് അവധി കൊടുക്കേണ്ടതുണ്ട്. ഈ അവധി ശാരീരിക ബുദ്ധിമുട്ടുള്ള തൊഴിലുകളില്‍ എര്‍പ്പെടുന്നവര്‍ക്കും നല്‍കണം.’, സുല്‍ഫത്ത് എം പറയുന്നു.

നിലവില്‍ സ്ത്രീകള്‍ക്ക് ആര്‍ത്തവ അവധി നല്‍കുന്ന ഇന്ത്യയിലെ ഏക സംസ്ഥാനം ബിഹാറാണ്. 1992 ലാണ് ബിഹാറില്‍ ആര്‍ത്തവ അവധി നിലവില്‍ വന്നത്. മാസത്തില്‍ രണ്ട് ദിവസം സ്ത്രീകള്‍ക്ക് ആര്‍ത്തവ അവധി നല്‍കണമെന്നാണ് ഈ നിയമത്തില്‍ പറയുന്നത്. ആര്‍ത്തവ അവധി നല്‍കാന്‍ നിയമനിര്‍മ്മാണം നടത്താനൊരുങ്ങുകയാണ് സ്‌പെയിന്‍. സ്ത്രീകളുടെ ജോലിയിലെ കാര്യക്ഷമതയെ ബാധിക്കുന്ന ഒന്നായാണ് ആര്‍ത്തവത്തെ മൂന്നാം ലോക രാജ്യങ്ങള്‍ കാണുന്നത്. ഇന്തോനേഷ്യ, ജപ്പാന്‍, ദക്ഷിണ കൊറിയ, തായ്‌വാന്‍ എന്നീ രാജ്യങ്ങള്‍ ആര്‍ത്തവ അവധി നല്‍കുന്നുണ്ട്. ജപ്പാനില്‍ ആര്‍ത്തവ അവധി നിയമം നിലവില്‍ വന്നിട്ട് ഏകദേശം 70 വര്‍ഷമാകുന്നു. 1947 ലാണ് ഇതുസംബന്ധിച്ച നിയനിര്‍മ്മാണം നടന്നത്. സാംബിയ, യുഎസ്, ചൈന തുടങ്ങിയ രാജ്യങ്ങളും സ്ത്രീകള്‍ക്ക് ആര്‍ത്തവ അവധി നല്‍കുന്നുണ്ട്.

‘ഞങ്ങള്‍ക്ക് വേണ്ടത് ചേര്‍ത്തുപിടിക്കലാണ്’; ആദിവാസി വേഷത്തില്‍ സ്‌കൂളിലെത്തി ടീച്ചര്‍

0
Reading Time: 4 minutes

 

കേരളത്തില്‍ വലിയ തോതില്‍ സാമൂഹിക അവസര നഷ്ടത്തിന്റെ യാതനകള്‍ പേറുന്ന ജനവിഭാഗമാണ് തദ്ദേശീയരായ ആദിവാസി ജനവിഭാഗം. ഭൗതിക സാമൂഹിക മുന്നേറ്റങ്ങളുടെ പങ്ക് ലഭ്യമാകാത്തതിലൂടെയും സമൂഹം എന്നനിലയില്‍ സ്വയം വികസിക്കാനും വളരാനുമുള്ള സാഹചര്യങ്ങള്‍ ഇല്ലാതാക്കപ്പെടുന്നതിലൂടെയുമാണ് ഗോത്ര വിഭാഗത്തിന്റെ സാമൂഹിക അവസരങ്ങള്‍ ഹനിക്കപ്പെടുന്നത്. ഈ സാമൂഹിക അവസരങ്ങള്‍ നേടിയെടുക്കാന്‍ ഇവിടുത്തെ പൊതുവ്യവസ്ഥിതികളോട് നിരന്തരം കലഹത്തില്‍ ഏര്‍പ്പെടുന്നവരാണ് ഗോത്ര വിഭാഗക്കാര്‍. സംസ്‌ക്കാരം, ഭൂമി, കലകള്‍, വസ്ത്രധാരണം, ഭാഷ, വിഭ്യാഭ്യാസം തുടങ്ങി സര്‍വതിലും തങ്ങളുടെ വ്യക്തി സവിശേഷത പ്രകടമാവണമെന്നും സാമൂഹിക വ്യവഹാരങ്ങളില്‍ തുല്യ പരിഗണന ഉണ്ടാവണമെന്നും ഗോത്ര ജനത എക്കാലത്തും ആവശ്യപ്പെടുന്നു. അതിനു വേണ്ടിയുള്ള ശ്രമങ്ങള്‍ എല്ലാ അവസരങ്ങളിലും ഈ ജനത വിനിയോഗിക്കാറുമുണ്ട്.

അത്തരത്തില്‍ തങ്ങളുടെ പാരമ്പര്യം പൊതുസമൂഹത്തില്‍ അടയാളപ്പെടുത്താന്‍ തനത് വസ്ത്രധാരണ രീതിയില്‍ സ്‌കൂളില്‍ കുട്ടികള്‍ക്ക് ക്ലാസെടുക്കാന്‍ പോയിരിക്കുകയാണ് വയനാട് ഇരുളം സ്വദേശി ബിന്ദു. പ്രാക്തന ഗോത്ര വിഭാഗമായ കാട്ടുനായ്ക്കര്‍ വര്‍ഗത്തില്‍ ഉള്‍പ്പെട്ട ബിന്ദു വാകേരി കക്കടംകുന്ന് എല്‍ പി സ്‌കൂളിലെ മെന്റര്‍ ടീച്ചറാണ്. വയനാട്ടില്‍ അറിയപ്പെടുന്ന ഗോത്ര കവയത്രിയും ഗായികയുമാണ് ബിന്ദു.

Wayanad tribal teacher bindhu
ബിന്ദു ഇരുളം- മെന്റര്‍ ടീച്ചര്‍

കഴിഞ്ഞ അഞ്ചു വര്‍ഷമായി ഗോത്ര ബന്ധു പദ്ധതിയ്ക്ക് കീഴില്‍ മെന്റര്‍ അധ്യാപികയായി ജോലി ചെയ്യുകയാണ് ബിന്ദു. സ്‌കൂളില്‍ നടത്തിയ ഗോത്ര ഫെസ്റ്റിന്റെ ഭാഗമായാണ് തങ്ങളുടെ തനത് വസ്ത്രധാരണ രീതിയില്‍ വസ്ത്രം ധരിച്ചതെന്ന് ബിന്ദു വോക്ക് മലയാളത്തോട് പറഞ്ഞു. ‘കുട്ടികളും ഞാനും ആവേശത്തില്‍ ആയിരുന്നു. എന്റെ വേഷത്തില്‍ കുട്ടികള്‍ക്ക് ക്ലാസെടുത്തു, അവരുടെ കൂടെ പാടി, ഞങ്ങളുടെ ആട്ടം കാണിച്ചുകൊടുത്തു. കുട്ടികള്‍ക്ക് ഭയങ്കര സന്തോഷം ആയിരുന്നു. പൊതുസമൂഹത്തോടൊപ്പം ഞങ്ങള്‍ക്കും അംഗീകാരം ലഭിക്കണം. ഞങ്ങളുടെ തനത് കളികളും പാട്ടുകളും ഞങ്ങളുടെ വേഷത്തിലാണ് അവതരിപ്പിക്കേണ്ടത്. അതിനുവേണ്ടിയാണ് സ്‌കൂളില്‍ പരിപാടിയുണ്ടായപ്പോള്‍ ഞങ്ങളുടെ വേഷത്തില്‍ പോയതും.’, ബിന്ദു പറയുന്നു.

ഗോത്ര വിദ്യാര്‍ഥികളുടെ കൊഴിഞ്ഞുപോക്ക് തടയാന്‍ സര്‍ക്കാര്‍ ആവിഷ്‌ക്കരിച്ച പദ്ധതിയാണ് ഗോത്രബന്ധു. ഗോത്രഭാഷയില്‍ നിന്നും മലയാളഭാഷയിലേയ്ക്ക് ആദിവാസി കുട്ടികളെ പറിച്ചുനടുമ്പോള്‍ ഒരുപാട് പ്രശ്‌നങ്ങള്‍ കുട്ടികള്‍ നേരിടുന്നുണ്ട്. മാറ്റിനിര്‍ത്തപ്പെടല്‍, പഠിക്കാന്‍ കഴിയാതെ വരല്‍, ഭാഷാ തടസ്സം, ഇതിന്റെയൊക്കെ ബാക്കിപത്രമായി വരുന്ന സാമൂഹിക വിവേചനങ്ങളും. ഈ കാരണങ്ങള്‍ കൊണ്ടൊക്കെയാണ് ആദിവാസി കുട്ടികളുടെ കൊഴിഞ്ഞുപോക്ക് ഉണ്ടാവുന്നത്. ഇത്തരം സാഹചര്യങ്ങള്‍ ഒഴിവാക്കാന്‍ വേണ്ടിയാണ് ഗോത്രബന്ധു മേന്റെഴ്‌സിനെ ആദിവാസി മേഖലകളിലെ സ്‌കൂളുകളില്‍ നിയമിച്ചിരിക്കുന്നത്. വയനാട് ജില്ലയിലെ 241 സ്‌കൂളുകളില്‍ മെന്റര്‍ ടീച്ചര്‍മാരെ നിയമിച്ചിട്ടുണ്ട്. ആദിവാസി കുട്ടികളെ സ്‌കൂളുകളിലേക്ക് എത്തിക്കുക, കൊഴിഞ്ഞു പോക്ക് തടയുക, ഊരും സ്‌കൂളുമായി നല്ല ബന്ധം ഉണ്ടാക്കിയെടുക്കുക തുടങ്ങിയവയാണ് മെന്റര്‍ ടീച്ചര്‍മാര്‍ ചെയ്യേണ്ടത്.

bindhu wayanad teacher
ബിന്ദു ഇരുളം കുട്ടികള്‍ക്കൊപ്പം

മെന്റര്‍ ടീച്ചര്‍മാര്‍ വന്നതിനു ശേഷം ആദിവാസി കുട്ടികളുടെ കൊഴിഞ്ഞുപോക്ക് കുറക്കാന്‍ കഴിഞ്ഞിട്ടുണ്ട് എന്ന് ബിന്ദു പറയുന്നു. ‘ഞങ്ങള്‍ വന്ന ശേഷമാണ് ആദിവാസി കുട്ടികള്‍ക്ക് അംഗീകാരം കിട്ടി തുടങ്ങിയത്. ഞങ്ങള്‍ ടിടിസി, ബിഎഡ് ട്രെയിനിങ്ങിനു പല സ്‌കൂളുകളിലും പോകുമ്പോള്‍ കാണുന്നുണ്ട് ഞങ്ങളുടെ കുട്ടികള്‍ ബാക്ക് ബെഞ്ചുകളില്‍ ഇരിക്കുന്നത്. അതിന് ഇപ്പോള്‍ കുറവു വന്നു. ഇപ്പോള്‍ ഞങ്ങളുടെ കുട്ടികള്‍ എല്ലാവരുടെയും കൂടെ ഇരിക്കുന്നുണ്ട്. അവര്‍ക്ക് അവരുടെ ഭാഷ പറയാനും പാടാനുമുള്ള അന്തരീക്ഷം ഉണ്ടാക്കി എടുത്തിട്ടുണ്ട്. ഒരു കുട്ടി സ്‌കൂളില്‍ വരാതെയാല്‍ ഞങ്ങള്‍ വീട്ടില്‍ പോയി അന്വേഷിക്കും. ആ കുട്ടിയുടെ രക്ഷിതാക്കളെ ബോധവല്‍ക്കരിക്കും. അവരെ തിരിച്ച് സ്‌കൂളില്‍ എത്തിക്കും. ഏതൊരു മേഖലയിലും ഞങ്ങള്‍ ആദിവാസികളെ ആരും അംഗീകരിക്കില്ല. എങ്ങനെയൊക്കെ ആയിരുന്നാലും ആളുകള്‍ ഞങ്ങളെ മാറ്റിനിര്‍ത്തുന്ന പ്രവണത ഉണ്ട്. ഞങ്ങള്‍ എത്ര ഉയരങ്ങളില്‍ എത്തിയാലും അവര്‍ അങ്ങനെയാണ് എന്ന മനോഭാവമാണ് പലര്‍ക്കും. കുട്ടികളുടെ കാര്യത്തില്‍ വളരെ പതുക്കെയാണെങ്കിലും അതെല്ലാം മാറ്റിയെടുക്കാന്‍ സാധിക്കുന്നുണ്ട്.’, ബിന്ദു വോക്ക് മലയാളത്തോട് പറഞ്ഞു.

‘ചേര്‍ത്തുപിടിക്കുമ്പോള്‍ ആണല്ലോ എല്ലാവരും ഒരുപോലെ ആണെന്ന് തോന്നുക. ഈ ചേര്‍ത്തുപിടിക്കല്‍ ഇല്ലാത്തത് കൊണ്ടാണ് ഞങ്ങളുടെ കുട്ടികള്‍ സ്‌കൂളില്‍ നിന്നും കൊഴിഞ്ഞു പോകുന്നത്. അവര്‍ക്ക് ഒരു ഇടം വേണം. ഒന്നാം ക്ലാസില്‍ ചേരുന്ന ആദിവാസി കുട്ടിയ്ക്ക് അവരുടെ ഭാഷ മാത്രമേ അറിയൂ. മലയാളം അറിയില്ല. ഇവര്‍ക്ക് മലയാളത്തിലേയ്ക്ക് മാറണമെങ്കില്‍ അവരെ ചേര്‍ത്തുപിടിക്കണം. ഇവര്‍ക്ക് വേണ്ടിയാണ് ഞങ്ങളെ പോലെയുള്ള അധ്യാപകര്‍ വേണ്ടത്. അധ്യാപകരായ ഞങ്ങളോടും മറ്റു വിഭാഗത്തില്‍ പെട്ട അധ്യാപകര്‍ വേര്‍തിരിവ് കാണിക്കാറുണ്ട്. ക്ലസ്റ്റര്‍ മീറ്റിങ്ങുകളില്‍ ഞങ്ങള്‍ എന്തെങ്കിലും കാര്യങ്ങള്‍ പറഞ്ഞാല്‍ ബാക്കിയുള്ള ടീച്ചേര്‍സ് അത് തെറ്റാണെന്ന് സ്ഥാപിക്കാന്‍ കുറെ ചോദ്യങ്ങള്‍ ഞങ്ങളോട് ചോദിക്കും. ഞങ്ങള്‍ ഒന്നും അറിയാത്ത ആളുകള്‍ ആണെന്ന് സ്ഥാപിച്ച് എടുക്കാനാണ്. ടിടിസിയും ബിഎഡും പഠിച്ചിട്ട് തന്നെയാണ് ഞങ്ങള്‍ ടീച്ചര്‍മാരായത്. ലിപി ഇല്ലാത്തത് കൊണ്ട് മാറ്റിനിര്‍ത്തപ്പെട്ട ഭാഷയാണ് ഗോത്രഭാഷ. മറ്റു ഭാഷകളെ പോലെ തന്നെ വാമൊഴികളും, കടങ്കഥകളും, പഴംചൊല്ലുകളും, പാട്ടുകളും, ഐതിഹ്യകഥകളും ഞങ്ങള്‍ക്കുണ്ട്. ഞങ്ങളുടെ ഭാഷയ്ക്കും അംഗീകാരം ലഭിക്കണം. അതിനര്‍ത്ഥം ഞങ്ങളുടെ കുട്ടികള്‍ മലയാളം പഠിക്കേണ്ടതില്ല എന്നല്ല. മലയാളം അടക്കം എല്ലാ ഭാഷകളും ഞങ്ങളുടെ കുട്ടികള്‍ പഠിക്കണം. എന്നാലെ പൊതുസമൂഹത്തിന്റെ ഒപ്പം ഞങ്ങള്‍ക്കും നില്‍ക്കാന്‍ സാധിക്കൂ. അതോടൊപ്പം ഞങ്ങളുടെ ഭാഷയേയും അംഗീകരിക്കാന്‍ തയ്യാറാവണം.’, ബിന്ദു വോക്ക് മലയാളത്തോട് പറഞ്ഞു.

ഒരുപാട് ത്യാഗങ്ങള്‍ സഹിച്ചാണ് ബിന്ദു അടക്കമുള്ള ഗോത്ര അധ്യാപകര്‍ തങ്ങളുടെ കുട്ടികള്‍ക്കൊപ്പം നില്‍ക്കുന്നത്. ഒരു കുട്ടി ക്ലാസില്‍ വന്നില്ലെങ്കില്‍ അവനെ/അവളെ തിരികെ ക്ലാസില്‍ എത്തിക്കുക മെന്റര്‍ അധ്യാപരുടെ ജോലിയാണ്. വാഹന സൗകര്യം ഇല്ലാത്ത കടിനകത്ത് വരെയുള്ള ഊരുകളില്‍ പോയാണ് ഇവര്‍ കുട്ടികളെ തിരിച്ചുകൊണ്ടുവരുന്നത്. ഇതിനൊന്നും പ്രത്യേക ബോണസോ മറ്റു ആനുകൂല്യങ്ങളോ ലഭിക്കുന്നില്ലെന്ന് ബിന്ദു പറയുന്നു. പ്രധാനമായും ഇവര്‍ ഉന്നയിക്കുന്ന പ്രശ്‌നം കൂലി തന്നെയാണ്. പദ്ധതിയുടെ തുടക്കത്തില്‍ നിശ്ചയിച്ച 750 രൂപ തന്നെയാണ് ഇപ്പോഴത്തെയും ദിവസവേതനം. ദിവസവേതന അടിസ്ഥാനത്തില്‍ ജോലി ചെയ്യുന്നതുകൊണ്ട് സ്‌കൂള്‍ ഉള്ള ദിവസങ്ങളിലെ വേതനം മാത്രമാണ് ലഭിക്കുക. ഇതാണെങ്കില്‍ കൃത്യമായി എല്ലാ മാസവും ലഭിക്കാറില്ലെന്ന് ബിന്ദു പറയുന്നു.

‘ട്രൈബല്‍ ഡിപ്പാര്‍ട്ട്‌മെന്റാണ് വേതനം നല്‍കുന്നത്. ആ കൂലി കൃത്യമായി ഞങ്ങള്‍ക്ക് കിട്ടാറില്ല. ഫണ്ട് ഉള്ളതിനനുസരിച്ചാണ് തരിക. രണ്ടു മാസം കൂടുമ്പോഴായാണ് കിട്ടുന്നത്. ചിലപ്പോള്‍ മാസത്തിന്റെ പകുതിയേ തരൂ. ശമ്പള ബില്‍ ആണല്ലോ ആദ്യം മാറുക. അത് കഴിഞ്ഞിട്ട് പതിനാറോ പതിനേഴോ ദിവസം കഴിഞ്ഞാണ് ഞങ്ങളുടെ ശമ്പളം തരാനുള്ള കാര്യങ്ങള്‍ ചെയ്യുക. ഫണ്ടില്ല എന്നാണ് അവര്‍ പറയുന്നത്. സ്‌കൂള്‍ ഉള്ള ദിവസങ്ങളിലെ കൂലിയെ ഞങ്ങള്‍ക്ക് കിട്ടൂ. സ്‌കൂള്‍ ഇല്ലാത്ത ദിവസങ്ങളില്‍ ഫീല്‍ഡ് വര്‍ക്ക് ഉണ്ടാവാറുണ്ട്. അതിനൊക്കെ സ്വന്തം പൈസ എടുത്താണ് പോകുന്നത്. കൃത്യമായി പൈസ കിട്ടാതാവുമ്പോള്‍ ഭയങ്കര ബുദ്ധിമുട്ടാണ്. വണ്ടികൂലി പലപ്പോഴും ഉണ്ടാവാറില്ല. ദിവസവേതനം 1000 രൂപ ആക്കാന്‍ ഞങ്ങള്‍ എഴുതി കൊടുത്തിട്ടുണ്ട്. അതില്‍ ഇതുവരെ തീരുമാനം ആയിട്ടില്ല. ദൂരെ ഉള്ളവര്‍ക്ക് ബുദ്ധിമുട്ടാണ്. അടുത്തുള്ളവര്‍ക്ക് നടന്നെങ്കിലും പോകാം.’, ബിന്ദു പറയുന്നു.

ധനകാര്യ വകുപ്പില്‍ നിന്നുള്ള കാലതാമസമാണ് വേതനം വൈകാനുള്ള കാരണം എന്നാണ് വയനാട് ടിഡിഒ പ്രമോദ് വോക്ക് മലയാളത്തോട് പറഞ്ഞത്. നിലവില്‍ ഡയറക്റ്ററേറ്റില്‍ ഒരുപാട് പ്രഷര്‍ ചെലുത്തിയാണ് ഫണ്ട് പാസാക്കി എടുക്കുന്നതെന്നും അദ്ദേഹം പറഞ്ഞു. മെന്റര്‍ ടീച്ചര്‍മാര്‍ക്ക് മാത്രമല്ല എസ്ടി പ്രമോട്ടര്‍മാര്‍, ജനനി ജന്മരക്ഷാ പദ്ധതി തുടങ്ങിയ പട്ടികവര്‍ഗ വിഭാഗത്തിനുള്ള വിവിധ പദ്ധതികളില്‍ ജോലി ചെയ്യുന്ന ദിവസവേതനക്കാര്‍ ഇതേ ബുദ്ധിമുട്ട് നേരിടുന്നുണ്ടെന്നും അദ്ദേഹം പറഞ്ഞു.

കൊളിജീയം വിവാദം വീണ്ടും ഉയരുമ്പോള്‍

0
Reading Time: 4 minutes

ജഡ്ജിമാരെ ജഡ്ജിമാര്‍ തന്നെ നിയമിക്കുന്ന കൊളിജീയം സംവിധാനത്തില്‍ പുതിയ നിര്‍ദേശവുമായി കേന്ദ്ര സര്‍ക്കാര്‍ രംഗത്തെത്തിയിരിക്കുകയാണ്. കൊളിജീയത്തില്‍ സര്‍ക്കാര്‍ പ്രതിനിധിയെ ഉള്‍പ്പെടുത്തണമെന്നാവശ്യപ്പെട്ട് കേന്ദ്രം കത്ത് നല്‍കി. സുപ്രീംകോടതി ചീഫ് ജസ്റ്റിസിന് കേന്ദ്ര നിയമമന്ത്രി കത്ത് നല്‍കി. കൊളിജീയത്തില്‍ ഉന്നത ജുഡിഷ്യറിയും കേന്ദ്രവും തമ്മിലുള്ള തര്‍ക്കം രൂക്ഷമാകുന്നതിനിടെയാണ് പുതിയ നിര്‍ദേശം.

എന്താണ് വിവാദം

ജഡ്ജി നിയമനത്തില്‍ കൊളിജീയം ആവര്‍ത്തിച്ച് നല്‍കുന്ന ശുപാര്‍ശകള്‍ അംഗീകരിക്കാന്‍ കേന്ദ്രം ബാധ്യസ്ഥരാണെന്ന് ഓര്‍മ്മിപ്പിച്ചു കൊണ്ട് കൊളീജീയം സര്‍ക്കാരിന് നേരത്തെ കത്ത് നല്‍കിയിരുന്നു. വിവിധ ഹൈക്കോടതികളിലേക്കുള്ള ജഡ്ജിമാരുടെ നിയമനത്തിനായുള്ള ശുപാര്‍ശ കഴിഞ്ഞ ദിവസം കേന്ദ്രത്തിന് കൊളീജിയം കൈമാറിയിരുന്നു. ഇതില്‍ അഭിഭാഷകനായ നാഗേന്ദ്ര രാമചന്ദ്ര നായികിനെ കര്‍ണാടക ഹൈക്കോടതി ജഡ്ജിയായി നിയമിക്കാനുള്ള ശുപാര്‍ശ കേന്ദ്രത്തിന് മൂന്നാമതും നല്‍കി കൊണ്ടാണ് അസാധാരണ നടപടി ഉണ്ടായത്.

1993 ലെ ജഡ്ജസ് കേസിലെ ഒമ്പതംഗ ഭരണഘടന ബെഞ്ചിന്റെ വിധിയാണ് കൊളീജീയം ഇതിനായി ചൂണ്ടിക്കാട്ടുന്നത്. നവംബറില്‍ കേരള ഹൈക്കോടതിയിലേക്ക് അഭിഭാഷകരായ അരവിന്ദ് കുമാര്‍ ബാബു, കെ.എ സഞ്ജിത എന്നിവരെ ജഡ്ജിമാരായി നിയമിക്കാനുള്ള ശുപാര്‍ശ കേന്ദ്രം മടക്കിയിരുന്നു. അലഹബബാദ്, കൊല്‍ക്കത്ത ഹൈക്കോടതിയിലേക്കുള്ള പേരുകളും കേന്ദ്രം നേരത്തെ മടക്കി. ഇതിലുള്ള അതൃപ്തി കൂടിയാണ് കൊളീജിയം വ്യക്തമാക്കിയത്.

എന്താണ് കോളിജീയം

സുപ്രീം കോടതി, ഹൈക്കോടതി ജഡ്ജിമാരുടെ നിയമനത്തില്‍ ആര്‍ക്കായിരിക്കണം മേല്‍ക്കൈ എന്ന തര്‍ക്കത്തിന് ഭരണഘടനാ നിര്‍മ്മാണ കാലത്തോളം പഴക്കമുണ്ട്. ജഡ്ജിമാരെ നിയമിക്കാനുള്ള അധികാരം സര്‍ക്കാറില്‍ നിക്ഷിപ്തമാക്കണമെന്നും അതല്ല, ജുഡീഷ്യറിക്ക് വിട്ടുകൊടുക്കുകയാണ് വേണ്ടതെന്നും ഭരണഘടനാ അസ്സംബ്ലിയില്‍ തന്നെ രണ്ടഭിപ്രായം ഉയര്‍ന്നിരുന്നു. സര്‍ക്കാര്‍ നിയമിക്കട്ടെ എന്ന വാദഗതിക്കാണ് അന്ന് മേല്‍ക്കൈ ലഭിച്ചത്. ഇതുപ്രകാരം 1993 വരെ നിയമനാധികാരം സര്‍ക്കാരിനായിരുന്നു. 1993ല്‍ ഉന്നത ജഡ്ജിമാരുടെ നിയമനത്തിനുള്ള അധികാരം കൊളീജിയത്തില്‍ നിക്ഷിപ്തമാക്കി സുപ്രീം കോടതി ഉത്തരവ് പുറപ്പെടുവിച്ചു. 1981ല്‍ ജഡ്ജിമാരുടെ സ്ഥലം മാറ്റവുമായി ബന്ധപ്പെട്ട എസ് പി ഗുപത് കേസില്‍ എക്‌സിക്യുട്ടിവിന് കൂടുതല്‍ പ്രധാന്യം നല്‍കണമമെന്നായിരുന്നു നിര്‍ദ്ദേശം. 1993ല്‍ അഡ്വക്കേറ്റ്‌സ് ഓണ്‍ റെക്കോര്‍ഡും യുണിയന്‍ ഓഫ് ഇന്ത്യയും തമ്മിലുള്ള കേസില്‍ 9 അംഗ ബെഞ്ച് ചീഫ് ജസ്റ്റിസ് ഓഫ് ഇന്ത്യയുടെ അഭിപ്രായത്തിനായിരിക്കണം പ്രാധാന്യം എന്ന് വ്യക്തമാക്കി. 1998ല്‍ ഇത് വീണ്ടും മറ്റൊരു കേസില്‍ സുപ്രിംകോടതി ആവര്‍ത്തിച്ചു. 1998ല്‍ രാഷ്ട്രപതി കെ ആര്‍ നാരായണണന്റെ റഫറന്‍സിനുള്ള അഭിപ്രായത്തിലൂടെയാണ് കൊളിജീയത്തിന്റെ രുപീകരണം ഇറക്കുന്നത്. അന്ന് മുതല്‍ ചീഫ് ജസ്റ്റിസ് തലവനും നാല് മുതിര്‍ന്ന ജഡ്ജിമാര്‍ അംഗങ്ങളുമായ കൊളീജിയമാണ് ജഡ്ജിമാരുടെ നിയമനത്തില്‍ തീരുമാനമെടുക്കുന്നത്. ഇതനുസരിച്ച് കൊളീജിയം നിര്‍ദേശിക്കുന്ന പേരുകള്‍ അംഗീകരിക്കാനേ കേന്ദ്ര സര്‍ക്കാറിന് കഴിയൂ. അങ്ങനെ നിര്‍ദേശിക്കുന്നയാളുടെ പേരില്‍ എന്തെങ്കിലും കേസുകളോ മറ്റു പ്രശ്‌നങ്ങളോ ഉണ്ടെങ്കില്‍ അക്കാര്യം ചൂണ്ടിക്കാണിക്കുകയുമാകാം. അത്രമാത്രമാണ് ഇക്കാര്യത്തില്‍ സര്‍ക്കാറിന്റെ പങ്ക്.

നാഷനല്‍ ജുഡീഷ്യല്‍ അപ്പോയിന്‍മെന്റ്‌സ് കമ്മീഷന്‍

ജഡ്ജിമാരെ ജഡ്ജിമാര്‍ തന്നെ നിയമിക്കുന്നത് ശരിയല്ലെന്ന വാദത്തില്‍ 2014ല്‍ കേന്ദ്ര സര്‍ക്കാര്‍ കൊളീജിയം സംവിധാനത്തിനു പകരമായി നാഷനല്‍ ജുഡീഷ്യല്‍ അപ്പോയിന്‍മെന്റ്‌സ് കമ്മീഷന്‍ (എന്‍ ജെ എ സി) കൊണ്ടു വന്നു. സുപ്രീം കോടതി ചീഫ് ജസ്റ്റിസും മുതിര്‍ന്ന അംഗവും ഉള്‍പ്പെടെ ജുഡീഷ്യറിയില്‍ നിന്ന് രണ്ട് പേരും പ്രധാനമന്ത്രിയും ലോക്‌സഭാ പ്രതിപക്ഷ നേതാവും സമുഹത്തില്‍ പ്രമുഖരായ രണ്ട് പേരും ഉള്‍ക്കൊള്ളുന്നതാണ് എന്‍ ജെ എ സി. എന്നാല്‍ ഈ സംവിധാനത്തില്‍ ജുഡീഷ്യറിയുടെ പ്രാമുഖ്യം കുറയുകയും എക്‌സിക്യൂട്ടീവിന് മുന്‍ഗണന ലഭിക്കുകയും ചെയ്യുന്നതുവഴി ജുഡീഷ്യറിയുടെ നിഷ്പക്ഷതയെയും സ്വതന്ത്രമായ നിലനില്‍പ്പിനെയും ബാധിക്കുമെന്ന ഹർജിയുടെ അടിസ്ഥാനത്തില്‍ 2015ല്‍ സുപ്രീം കോടതി ഭരണഘടനാ ബഞ്ച് എന്‍ ജെ എ സി ഭരണഘടനാവിരുദ്ധമായി പ്രഖ്യാപിക്കുകയും കൊളീജിയം സംവിധാനം തുടരാന്‍ നിര്‍ദേശിക്കുകയുമായിരുന്നു.

ഗുണവും ദോഷവും

ഉയര്‍ന്ന കോടതികളിലെ ജഡ്ജിമാരുടെ നിയമനം സംബന്ധിച്ചുള്ള തര്‍ക്കത്തിന് കാലങ്ങളുടെ പഴക്കമുണ്ടെങ്കിലും നിലവിലെ ഇന്ത്യന്‍ രാഷ്ട്രീയസാഹചര്യങ്ങളില്‍ ജുഡിഷ്യറിക്ക് മേല്‍ എക്‌സിക്യുട്ടിവിന് മേല്‍ക്കൈ വന്നാല്‍ എങ്ങിന ബൊധിക്കുമെന്നതാണ് പ്രധാന സംശയം. മോദി സര്‍ക്കാര്‍ പ്രതിനിധാനം ചെയ്യുന്ന വര്‍ഗീയ ഫാസിസത്തിന് ജുഡീഷ്യറി വിധേയപ്പെടുന്ന അവസ്ഥയും വന്നു ചേരുമെന്ന സംശയം ബലപ്പെടുന്നത് ഈ സാഹചര്യത്തലാണ്. ഭരണഘടനക്ക് പകരം മനുസ്മൃതിയും ത്രിവര്‍ണ്ണ പതാകയക്ക് പകരം കാവി കൊടിയും വേണമെന്ന് ആഹ്വാനം ചെയത് ആര്‍ എസ് എസ് ഫാസിസം ഇന്ത്യന്‍ ഭരണഘടന തന്നെ അട്ടിമറിക്കുന്നു എന്ന ആരോപണം ശക്തമാകുന്ന കാലത്താണ് കൊളിജീയം മാറണോ എന്ന ചര്‍ച്ച വീണ്ടും ഉയരുന്നത്. ഭരണഘടന നമുക്ക് ഉറപ്പ് നല്‍കുന്ന അവകാശങ്ങളില്‍ പ്രധാനപ്പെട്ട ഒന്നാണ് റൈറ്റ് ടു കോണ്‍സ്റ്റിറ്റ്യൂഷണൽ റെമഡീസ്. മൗലിക അവകാശങ്ങള്‍ റദ്ദ് ചെയ്യപ്പെടുന്ന പൗരന് അവസാന ആശ്വാസമായി കോടതി നിലക്കൊള്ളുമെന്നു ഇത്തരം കേസുകളില്‍ കോടതിക്ക് സ്വമേധയായി ഇടപെടാമെന്നുമുണ്ട്. ഇന്ത്യൻ ഭരണഘടനയുടെ ഹൃദയവും ആത്മാവും എന്നാണ് ഈ മൗലിക അവകാശത്തെ അംബേദ്കര്‍ വിശേഷിപ്പിച്ചത്. സര്‍ക്കാരിന്റെ തെറ്റായ തീരുമാനങ്ങളില്‍ ഇടപ്പെട്ട നിശിതമായി തിരുത്താന്‍ ഭരണഘനപരമായി കോടതിക്ക് ചുമതലകളുണ്ട്. കൊളിജീയത്തിന്റെ സുതാര്യത സംബന്ധിച്ചും ആരോപണം ഉണ്ട്.

കൊളീജിയത്തിനും എന്‍ ജെ എ എസിക്കും അതിന്റേതായ പരിമിതികളും പോരായ്മകളുമുണ്ട് എന്താണ് വാസ്തവം. കൊളീജിയം മുഖേനയുള്ള നിയമനത്തില്‍ ബാഹ്യതാത്പര്യങ്ങള്‍ കടന്നു വരാന്‍ സാധ്യതയുണ്ട് എന്നതാണ് പ്രധാന ആശങ്ക. 2025 എന്നത് ആര്‍ എസ് എസിനെയും സംഘപരിവാറിനെയും സംബന്ധിച്ചിടത്തോളം വളരെ പ്രധാനപ്പെട്ട വര്‍ഷമാണ്. ആര്‍ എസ് എസ് രൂപികരിക്കപ്പെട്ട 100 വര്‍ഷം തികയുന്ന വേളയില്‍ രാജ്യം ഹിന്ദു രാഷ്ട്രം ആക്കി മാറ്റപ്പെടണമെന്ന അവരുടെ സ്വപ്നത്തിലേുള്ള ചുവട് വെയ്പ്പക്കാണ് സര്‍ക്കരിന്റ ഓരോ നീക്കങ്ങള്‍ക്കും ആക്കം കൂട്ടുന്നത്.

ആശങ്കകളും പരിഹാരവും

ജുഡിഷ്യറിയും ഫാസിസത്തിന്റെ ആയുധമായി മാറുന്ന കാലഘട്ടമാണ്. ക്ഷേത്രങ്ങള്‍ കമ്മ്യുണിസ്റ്റുകാര്‍ തട്ടിയെടുക്കാതെ താന്‍ രക്ഷിച്ചു എന്ന പറഞ്ഞ ഇന്ദു മല്‍ഹോത്രയുടെ പ്രസ്താവന മുതല്‍ നിരവധി നിരപരാധികള്‍ക്കും സ്റ്റാന്‍ സ്വാമിക്കും ജാമ്യം നിഷേധിച്ച നീതി പീഠം കങ്കണ റണൗട്ടിനും അര്‍ണബ് ഗോസ്വാമിക്കും വേണ്ടി ത്വരിത ഇടപ്പെടല്‍ നടത്തി എന്നതടക്കമുള്ള ആരോപണങ്ങള്‍ വരെ ജുഡിഷ്യറിയുടെ വിശ്വാസ്യതക്ക് മങ്ങലേല്‍പ്പിച്ച സംഗതികളാണ. കേന്ദ്ര സർക്കാരിനെതിരായ നിരവധി ഹര്‍ജികളില്‍ വരാന്‍ പോകുന്ന സുപ്രിംകോടതി വിധികള്‍ നിര്‍ണ്ണായകമാണ് എന്നതും ആശങ്ക വര്‍ധിപ്പിക്കുന്ന കാരണങ്ങളാണ്.
ജുഡീഷ്യറിയുടെ സ്വതന്ത്ര സ്വഭാവത്തിനും ശരിയായ ഉത്തരവാദിത്വ നിര്‍വഹണത്തിനും തടസ്സം സൃഷ്ടിക്കാത്ത, തെറ്റ് പറ്റുമ്പോള്‍ സര്‍ക്കാരുകളെ തിരുത്താനുള്ള ആര്‍ജവം കോടതികള്‍ക്ക് നഷ്ടപ്പെടാത്ത രീതിയിലായിരിക്കണം ജഡ്ജിമാരുടെ നിയമന രീതി. ഭരണ പരിഷ്‌കരണ കമ്മീഷന്‍, ദേശീയ ഉപദേശക സമിതി, ലോ കമ്മീഷന്‍ തുടങ്ങി പല ഉന്നതതല കമ്മീഷനുകളും ജഡ്ജിമാരുടെ നിയമനത്തിനുള്ള മാര്‍ഗങ്ങളെക്കുറിച്ച് നേരത്തെ തന്നെ പഠിച്ചിട്ടുണ്ട്. ജുഡീഷ്യറിക്കും എക്സിക്യൂട്ടീവിനും മേല്‍ക്കൈ ഇല്ലാത്ത തീര്‍ത്തും സ്വതന്ത്രമായ നിയമന സമിതിയാവും പരിഹാരം എന്ന നിര്‍ദ്ദേശം മുന്നോട്ട് വരുന്നതും ഈ സാഹചര്യത്തിലാണ്.

പറയാവുന്നതും പറയാനാവാത്തതും. അരുന്ധതി റോയിയുമായുള്ള അഭിമുഖം

0
Arundhathi Roy
Reading Time: 10 minutes

ആസാദി എന്ന താങ്കളുടെ പുസ്തകത്തില്‍ ഒടുക്കത്തിന്റെ സൂചനകള്‍ എന്ന തലക്കെട്ടിലുള്ള ലേഖനത്തില്‍  പറയുന്നു. ‘ ലോകമെമ്പാടുമുള്ള തെരുവീഥികളില്‍ പ്രക്ഷോപത്തിന്റെ മുഴക്കമാണിപ്പോള്‍. ചിലിയിലും കാറ്റലോനിയയിലും ബ്രിട്ടനിലും ഫ്രാന്‍സിലും ഇറാഖിലും ഹോങ്കോങ്ങിലും ഒക്കെ അതാണ് അവസ്ഥ. ഭുമിയുടെ മേല്‍ നടക്കുന്ന അതിക്രമങ്ങള്‍ക്കതിരേ പുതുതലമുറ വേറിട്ട പ്രതിഷേധ രീതികളുമായി രംഗത്തുണ്ട്. അത്തരമൊരു കാലത്ത് പ്രതിഷേധങ്ങള്‍ നിലച്ച് പോയ ചില തെരുവീഥികളെ കുറിച്ച് ഇവിടെ പറയേണ്ടി വരുന്നതില്‍ എനിക്ക് അതിയായ വ്യസനമുണ്ട് ‘ എന്ന്. മൂര്‍ത്തമായി തന്നെ അത്തരമൊരു അവസ്ഥ നിലനില്‍ക്കുന്നു എങ്കില്‍ അവിടെ എഴുത്തുകാരുടെ ദൗത്യം എന്താണ്?

നിക്ക് തോന്നുന്നില്ല എല്ലാ എഴുത്തുകാര്‍ക്കും ഒരൊറ്റ ലക്ഷ്യം വേണമെന്ന്. ലോകം വൈവിധ്യങ്ങളും സങ്കീര്‍ണ്ണതകളും നിറഞ്ഞതാണ്. പല തരത്തിലുമുള്ള എഴുത്തുകാരുമുണ്ട്. അങ്ങിനെയുള്ള ഒരു ലോകത്ത് എഴുത്തുകാര്‍ക്ക് നിയമങ്ങള്‍ നല്‍കാനാകില്ല. അവര്‍ എന്ത് എഴുതാനും സ്വാതന്ത്യമുള്ളവരാകണം. വളച്ചൊടിക്കപ്പെടുന്ന ഒരു കാലഘട്ടത്തിലുടെയാണ് കടന്ന് പോകുന്നത്. ഈ കാലഘട്ടത്തിന്റെ സങ്കീര്‍ണ്ണതകളെ മനസ്സിലാക്കുക എന്നത് എഴുത്തുകാര്‍ക്ക് വെല്ലുവിളിയാണ്. അത് കൊണ്ട് തന്നെ അവരുടെ ലക്ഷ്യങ്ങള്‍ എന്താകണം എന്താകരുത് എന്നത് സംബന്ധിച്ച് നമുക്ക് നിയമങ്ങള്‍ നല്‍കാനാവില്ല.

അടിയന്തിരാവസ്ഥ കാലത്ത് മുട്ടിലിഴഞ്ഞ മാധ്യമങ്ങളെ കുറിച്ച് ഇന്ന് പറയുമ്പോള്‍ ഇരുണ്ട കാലമെന്നാണ് വിശേഷിപ്പിക്കാറ്. ഇന്ന് ഫാഷിസം വീണ്ടും പിടിമുറുക്കുന്ന കാലത്ത് നാം ഇന്ത്യയുടെ ആത്മാവിന് വേണ്ടിയാണ് പോരാടുന്നത് എന്നാണ് താങ്കള്‍ തന്നെ പറഞ്ഞിട്ടുള്ളത്. അവിടെയല്ലേ ഈ മൗനം വിമര്‍ശിക്കപ്പെടുന്നത്?

ഫാഷിസം യുറോപ്പിലുണ്ടായിരുന്നപ്പോഴും എത്രേയാ എഴുത്തുകാരും കലാകാരന്മാരും ചലച്ചിത്രസംവിധായകരും ഫാഷിസത്തിനൊപ്പമായിരുന്നു. കുറേ പേര്‍ എതിര്‍ത്തിരുന്നു. അത് പോലെ തന്നെയാണ് ഇന്നും. നമ്മുടെ നേര്‍ക്ക് വരുന്നത് എന്താണെന്ന് മനസ്സിലാക്കാന്‍ നമ്മുടെ മദ്ധ്യവര്‍ഗ്ഗ ബുദ്ധിജീവികള്‍ക്ക് കുറച്ച് സമയമെടുത്തു. ഇപ്പോള്‍ പോലും ഇത്രയുമൊക്കെ നടക്കുന്നതിനിടയിലും പ്രത്യഘാതം ഗുരുതരമായിരിക്കും എന്നതിനാല്‍ വളരെ കുറച്ച് പേര്‍ മാത്രമാണ് പ്രതികരിക്കാന്‍ ആഗ്രഹിക്കുന്നത്. സാധാരണഗതിയില്‍ ഫാഷിസം പ്രയോഗിക്കുന്നത് ഭരണകൂടമോ, പോലീസോ മാദ്ധ്യമങ്ങളോ മാത്രമാണ്. എന്നാല്‍ ഇന്ന് പ്രത്യേകിച്ച് വടക്കെ ഇന്ത്യയില്‍ ഫാഷിസം ദൈനംദിനം ജീവതത്തിന്റെ ഭാഗമായി മാറി കഴിഞ്ഞു. അത് കൊണ്ട് തന്നെ ബുദ്ധിജീവികളും, മാദ്ധ്യമപ്രവര്‍ത്തകരും, എഴുത്തുകാരുമൊക്കെ ആയി നിരവധി പേര്‍ ഈ പ്രോജക്ടറ്റിന്റെ ഭാഗമാണ്. ചിലരൊക്കെ ഭയപ്പെടാതെ പ്രതിരോധിക്കുന്നുണ്ട്. പക്ഷെ നിരവധി പേര്‍ മോശമായോ സൂക്ഷമമായ രീതിയിലോ ഒക്കെ അതില്‍ പങ്കാളികളാകുന്നുണ്ട്. ചുരുക്കത്തില്‍ ഫാഷിസം ഭരണകൂടത്തിന്റെ മാത്രം കാര്യമല്ല എന്ന ഘട്ടത്തിലാണ് നമ്മള്‍ എത്തി നില്‍ക്കുന്നത്.

ഭരണകൂടത്തിന്റെ സകലമാന ഉപകരണങ്ങളും ഹിന്ദുത്വവാദികളുടെയും അവരെ പിന്തുണക്കുന്ന കോര്‍പറേറ്റുകളുടെയും കൈപിടിയില്‍ ഒതുങ്ങുന്ന കാലമാണ് എന്ന് താങ്കള്‍ തന്നെ പലപ്പോഴും ഓര്‍മിപ്പിച്ചിട്ടുണ്ട്. ഏറ്റവും ഒടുവില്‍ എന്‍ഡിടിവി യില്‍ നിന്ന് പ്രണോയ് റോയ് വരെ ഇറങ്ങേണ്ടി വന്ന അവസ്ഥയില്‍ ഇന്ത്യന്‍ മാധ്യമരംഗത്തിന്റെ ഭാവിയെ കുറിച്ച് എന്താണ് പറയാനുള്ളത്?

Prannoy Roy ndtv journalist
പ്രണോയ് റോയ്

1990 മുതല്‍ തുടങ്ങിയ കാര്യമാണിത്. മാദ്ധ്യമ സ്ഥാപനങ്ങളുടെ ഉടമസ്ഥതയിലെ ഘടനയും ഭരണഘടനാധിഷ്ഠതമായ ജനാധിപത്യ രാജ്യത്ത് മാദ്ധ്യമങ്ങള്‍ വഹിക്കേണ്ട ചുമതലയും തമ്മില്‍ വലിയ തര്‍ക്കമാണുള്ളത്. നമുക്ക് ഇപ്പോഴുള്ളത് ഗുരുതരമായ കോര്‍പറേറ്റ് താല്‍പര്യങ്ങളുള്ളവരുടെ ഉടമസ്ഥതതയിലുള്ള മാദ്ധ്യമങ്ങളുടെ കാലമാണ്. അവര്‍ക്ക് കോര്‍പറേറ്റ് താത്പര്യങ്ങള്‍ സംരക്ഷിക്കാന്‍ ഭരണകൂടത്തിനോട് സന്ധി ചെയ്യേണ്ടതായിട്ടുണ്ട്്. കോര്‍പറേറ്റുകളും മാദ്ധ്യമങ്ങളും ഭരണകൂടവും ഒന്നിച്ച് നില്‍ക്കുകയാണിന്ന്. ഇന്നത്തെ മാദ്ധ്യമങ്ങള്‍ അശക്തരല്ല മറിച്ച് ഫാഷിസ്റ്റ് ഭരണകൂടത്തിന്റെ ഭാഗമാണ് എന്നതാണ് ശ്രദ്ധേയം.

ഇന്ത്യയില്‍ ഇന്ന് ഇറാനിലെ ഹിജാബ് പ്രക്ഷോഭത്തെയും അഫ്ഗാനിസ്ഥാനിലെ സ്ത്രീകളുടെ സ്വാതന്ത്ര്യത്തെയും പറ്റി പറയുന്നവര്‍ തന്നെ കശ്മീരിയലെയും കര്‍ണ്ണാടകത്തിലെയും പ്രതിഷേധങ്ങളില്‍ സ്വീകരിക്കുന്നത് മറ്റൊരു നയമാണ്. എന്തായിരിക്കാം കാരണം?

ല്ലാ സംസ്‌കാരത്തിലും പറയാന്‍ പറ്റുന്നതും പറയാന്‍ പറ്റാത്തതുമായ കാര്യങ്ങളുണ്ട്. പലസ്തീനിനെ കുറിച്ച് പറയാം പക്ഷെ കശ്മിരിനെ കുറിച്ച് പറയാന്‍ പറ്റില്ല. അമേരിക്കയില്‍ കശ്മിരീനെ കുറിച്ച് പറയാം പലസ്തീനിനെ കുറിച്ച് പറ്റില്ല. ഇറാനിലെ സ്ത്രീകള്‍ ഡോക്ടര്‍മാരും അദ്ധ്യാപകരുമൊക്കെയായി വിവിധ പദവികളില്‍ എത്തിചേര്‍ന്നവരാണ്. പക്ഷെ അവര്‍ക്ക് ശിരോവസ്ത്രം ധരിക്കാനിഷ്ടമല്ല. കര്‍ണ്ണാടകത്തില്‍ ശിരോവസ്ത്രം ധരിക്കണമെന്നാഗ്രഹിക്കുന്നവരാണ്. പാശ്ചാത്യം ജനാധിപത്യ ഭരണകൂടങ്ങളാണെങ്കിലും ഇസ്ലാമിക ഭരണകൂടങ്ങളാണെങ്കിലും വലത് പക്ഷ ഹിന്ദുത്വ ഭരണകൂടമാണെങ്കിലുമൊക്കെ ഈ യുദ്ധങ്ങള്‍ നടത്തുന്നത് സ്ത്രീശരീരങ്ങള്‍ക്ക് മുകളിലാണ്. ചോദ്യം ശിരോവസ്ത്രം വേണമോ വേണ്ടേയാ എന്നതല്ല മറിച്ച് സ്ത്രീക്ക് ശിരോവസ്ത്രം വേണമോ വേണ്ടേയാ എന്നതാണ് ചോദ്യം. ബലംപ്രയോഗിച്ച് ശിരോവസ്ത്രം ധരിപ്പിക്കുന്നതും അഴിച്ച് മാറ്റുന്നതും സ്ത്രീയെ സംബന്ധിച്ച് ഒരേ അധികാരപ്രയോഗം തന്നെയാണ്.

ആസാദി’ എന്ന പുസ്തകത്തില്‍ ‘ഗോഡ് ഓഫ് സ്‌മോള്‍ തിങ്കസി’നെ പറ്റി താങ്കള്‍ കൃത്യമായി പറയുന്നു……. കേരളത്തിലേക്ക് വന്നപ്പോഴാകട്ടെ അവിടുത്തെ സ്വീകരണവും ഒട്ടും മാജിക്കലായിരുന്നില്ല. 1956 മുതല്‍ കേരളം ഭരിച്ച കമ്മ്യുുണിസ്റ്റ് പാര്‍ട്ടിക്ക് ‘ഗോഡ് ഓഫ് സ്‌മോള്‍ തിങ്ക്‌സ്’ ഒട്ടും സ്വീകാര്യമായില്ല. ആ നോവല്‍ പാര്‍ട്ടി വിമര്‍ശനമായി പരിഗണിക്കപ്പെട്ടു എന്ന്. ഞാന്‍ പെട്ടന്ന് പാര്‍ട്ടി വിരുദ്ധയായി. ഒരു മുഴുനീള സാമ്രാജ്യത്വ മൂരാച്ചിയായി എന്ന്… കേരളത്തില്‍ കഴിഞ്ഞ കുറച്ച് കാലമായി വിമര്‍ശകര്‍ നേരിടുന്ന പ്രധാന പ്രശ്‌നമിതാണ്. എന്നാല്‍ ചിലരെങ്കിലും സര്‍ക്കാരിന്റ വികസന നയങ്ങളോരോന്നും സിംഗൂറും നന്ദിഗ്രാമും ഉള്‍പ്പടെയുള്ള ചരിത്രം നിരന്തരം ഓര്‍മ്മിപ്പിച്ചാണ് വിമര്‍ശിക്കുന്നത്?

നിക്ക് തോന്നുന്നത് കോണ്‍ഗ്രസ് ഭരണകൂടമാണെങ്കിലും ഇടത് ഭരണകൂടമാണെങ്കിലും ഓര്‍മ്മിപ്പിക്കല്‍ ആവശ്യമാണ്. നര്‍മ്മദയുടെ കാര്യമെടുത്താല്‍ ഇടതുപക്ഷം ഒരിക്കലും പിന്തുണച്ചിട്ടില്ല. വലിയ അണക്കെട്ടിനെയും സമ്പദ് വ്യവസ്ഥയിലെ ആജ്ഞാശക്തിയുള്ള ശീര്‍ഷകങ്ങള്‍ സംബന്ധിച്ച ആശയമായിരുന്നു വിശ്വാസം. ഇന്നിപ്പോള്‍ ജനാധിപത്യ സംവിധാനത്തിലെ ഇടതുപക്ഷം പരിസ്ഥിതി പ്രശ്നങ്ങളും കോര്‍പ്പറേറ്റ് മുതലാളിത്തത്തിന്റെ നാടകങ്ങളെയും മുമ്പ് മനസ്സിലാക്കിയിരുന്നതിനെക്കാള്‍ നന്നായി മനസ്സിലാക്കണമെന്ന് നാം ആഗ്രഹിക്കുകയാണ്. അവര്‍ ജനങ്ങള്‍ക്കൊപ്പം നില്‍ക്കണമെന്നതാണ് പ്രധാനം.

പുരോഗമന കേരളം എന്ന് നാം അഭിമാനിച്ചിരുന്നിടത്ത് നിന്ന് ഇത് ചര്‍ച്ച ചെയ്യേണ്ടി വരുന്നതില്‍ ഒരു വൈരുദ്ധ്യം ഇല്ലേ?

ഞാന്‍ പറയുന്നത് വലിയ വ്യത്യാസമുണ്ട് എന്ന് തന്നെയാണ്. ഡല്‍ഹിയിലൊക്കെ താമസിച്ച് നോക്കണം. ഇവിടെ ജനങ്ങള്‍ കൂടുതല്‍ സംസ്‌കാരമുള്ളവരും അവകാശങ്ങളെകുറിച്ച് ബോദ്ധ്യമുള്ളവരുമാണെന്ന് നിങ്ങള്‍ക്ക് മനസ്സിലാകും. ഭേദമെന്നേ ഞാന്‍ പറയുകള്ളു. എല്ലാം കുറ്റമറ്റത് എന്നല്ല. എല്ലാം തികഞ്ഞ ഭരണകൂടമുള്ള പ്രതിരോധിക്കണ്ട ആവശ്യമില്ലാത്തിയിടം എന്നത് ഒരിക്കലും സാധ്യമല്ല. ഇടതോ വലതോ ആര് ഭരിച്ചാലും. കേരളത്തില്‍ ഒരു സമരം വേണ്ട പ്രതിരോധം വേണ്ട എന്ന സാഹചര്യം ഒരിക്കലുമുണ്ടാകില്ല. സര്‍ക്കാര്‍ സംവിധാനങ്ങള്‍ എങ്ങിനെയെന്നത് സംബന്ധിച്ച് എപ്പോഴും കണ്ണ് തുറന്നിരുന്ന് പരിശോധിക്കേണ്ടതുണ്ട്.

ഹിന്ദുത്വ സര്‍ക്കാരിന്റെ ഏറ്റവും വലിയ രാഷ്ട്രീയ സംഭാവനകളില്‍ ഒന്ന് എനിക്ക് തോന്നുന്നത് അര്‍ബന്‍ നക്‌സല്‍ തന്നെയാണ് എന്ന്. ഭരണകൂട ഭീകരത്വം, കോര്‍പ്പറേറ്റിസം, മനുഷ്യവകാശ ധ്വംസനങ്ങള്‍ എന്നിവക്ക് ഒക്കെ എതിരായ ഏത് രാഷ്ട്രീയത്തെയും പ്രയോഗത്തെയും അര്‍ബന്‍ നക്‌സല്‍ എന്ന ഒരൊറ്റ രാഷ്ട്രീയസംജ്ഞ കൊണ്ട് മുനയൊടിക്കുന്ന പ്രതിഭാസം തന്നെയാണ് എങ്ങും. വലതുപക്ഷ ബിന്ദുത്വത്തിന്റെ നേര്‍വിപരീതവും പ്രത്യക്ഷത്തില്‍ പ്രതിരോധവും എന്ന തരത്തില്‍ ഇടത് രാഷ്ട്രീയമാണ് കേരളത്തില്‍ ഉള്ളത്. എന്നാല്‍ കേരളത്തിലും നക്‌സലുകളെ വെടിവെച്ച് കൊലപ്പെടുത്തുന്നു, വിചാരണകളില്ലാതെ ജയിലിലടക്കപ്പെടുന്നു. വികലവികസനങ്ങള്‍ക്കെതിരും പരിസ്ഥിതിക്ക് വേണ്ടി വാദിക്കുന്നവര്‍ ഒക്കെ തന്നെ നക്‌സലൈറ്റുകളും തീവ്രവാദികളുമായി മുദ്രകുത്തപ്പെടുത്തുകയും ചെയ്യുന്നു. എങ്ങിനെ കാണുന്നു ഈ രാഷ്ട്രീയത്തിന്റെ വിരുദ്ധയോക്തിയെ?

ക്‌സലുകള്‍, ജിഹാദികള്‍ തുടങ്ങിയ മുദ്രകുത്തലൊക്കെ കൃത്യമായ ലക്ഷ്യം വെച്ചാണ്. പഴഞ്ചൊല്ല് അനുസ്മരിപ്പിക്കും വിധം ആദ്യം ആരോപണമുന്നയിച്ച് മുദ്ര കുത്തിയശേഷം ആക്രമിക്കുന്നതാണ് രീതി. പ്രതിരോധമുയര്‍ത്തുന്ന എല്ലാവരേയും, കര്‍ഷകരേയും, ആദിവാസികളെയും ദളിതരേയുമൊക്കെ ഇത്തരത്തില്‍ ജിഹാദികളെന്നോ തീവ്രവാദികളെന്നോയൊക്കെ മുദ്ര കുത്തിയ ശേഷം ആക്രമിക്കുന്നത് പ്രതിരോധങ്ങളെ അടിച്ചമര്‍ത്താനാണ് എന്നതാണ് യാഥാര്‍ത്ഥ്യം.

ദുര്‍ബലരായ മനുഷ്യര്‍ വളഞ്ഞാക്രമിക്കപ്പെടുകയും നിശബ്ദമാക്കപ്പെടുകയും ചെയ്യുന്നു. ശബ്ദമുയര്‍ത്തുന്നവരെ തുറങ്കിലിടുന്നു. ഈ രാജ്യത്തെ ഇനി തിരികെ കൊണ്ട് വരാന്‍ ദൈവത്തിന് മാത്രമേ സാധിക്കു എന്ന് താങ്കള്‍ ആസാദിയിലെ ലേഖനത്തില്‍ പറയുന്നു. 2024ല്‍ രാജ്യം മറ്റൊരു തെരഞ്ഞെടുപ്പിനെ നേരിടാന്‍ ഒരുങ്ങുകയാണ്.. ഇന്ത്യന്‍ ജനത തിരുത്തലുകള്‍ക്ക് തയ്യാറാകുമെന്ന് പ്രതീക്ഷിക്കേണ്ടതുണ്ടോ?

rss leaders

2025ൽ ആര്‍എസ്എസിന് 100 വയസ്സ് പൂര്‍ത്തിയാകും. ഹിന്ദുത്വ രാഷ്ട്രമെന്ന അവരുടെ സ്വപ്നം ആഘോഷിക്കാനുള്ള നീക്കത്തിലാണ് അവര്‍. തെരഞ്ഞെടുപ്പ് സംവിധാനങ്ങളെല്ലാം സന്ധിചെയ്യപ്പെട്ട അവസ്ഥയിലാണ്. ഇലക്ട്രറല്‍ ബോണ്ടുകള്‍ ബിജെപിയെ ഒരു പക്ഷെ ലോകത്തിലെ തന്നെ ഏറ്റവും സമ്പത്തുള്ള പാര്‍ട്ടിയായി മാറ്റിയിട്ടുണ്ട്. അത് കൊണ്ട് തന്നെ വടക്കെ ഇന്ത്യയില്‍ നിന്ന് കൊണ്ട് ഒരു തെരഞ്ഞെടുപ്പിനെ വീക്ഷിക്കുമ്പോള്‍ ഫെറാറിയോ മെഴ്സിഡസ് കാറോ സൈക്കിളിനോട് മത്സരിക്കുന്നത് പോലെയാണ് തോന്നുക. ഇലക്ട്രറല്‍ സംവിധാനങ്ങളിലും ബുത്ത് മാനേജ്മെന്റിലുമൊക്കെ ആ വ്യത്യാസമുണ്ട്. അടുത്ത വര്‍ഷം എന്ത് സംഭവിക്കുമെന്ന് ഈ വര്‍ഷം പറയാനാവാത്ത സ്ഥിതിയുണ്ട്. കഴിഞ്ഞ വര്‍ഷം പുല്‍വാമ സംഭവിച്ചത് ഒഴികെ സമ്പദ്വ്യവസ്ഥയും മറ്റ് സാഹചര്യങ്ങളുമെല്ലാം ബിജെപിക്ക് പ്രതികൂലമായിരുന്നു. അടുത്തത് എന്ത് സംഭവിക്കുമെന്ന് നമുക്ക് അറിയില്ല.

പുല്‍വാമ, പാര്‍ലമെന്റ് ആക്രമണം തുടങ്ങിയ സംഭവങ്ങള്‍ താങ്കള്‍ ഉള്‍പ്പടെയുള്ള വിര്‍ശകര്‍ കാണുന്ന പോലെ അല്ലല്ലോ സാധാരണക്കാരായ വടക്കെ ഇന്ത്യന്‍ ജനത കാണുന്നതും മനസ്സിലാക്കുന്നതും?

പുല്‍വാമ സംബന്ധിച്ച് ഞാന്‍ അത്രക്ക് ആഴത്തില്‍ പഠിച്ചിട്ടില്ല. പക്ഷെ പാര്‍ലമെന്റ് ആക്രമണം മുതലായ മറ്റ് പല വിഷയങ്ങളും ഞാന്‍ പഠിച്ചിട്ടുണ്ട്. 2019ല്‍ പലരും ഞാനുള്‍പ്പടെ പലരും പുല്‍വാമ സംഭവിക്കുന്നതിന് മുന്‍പ് തന്നെ എഴുതി എന്തെങ്കിലും സംഭവിക്കുമെന്ന്. ആരാണ് ചെയ്തത് എന്താണ് സംഭവിച്ചത് എന്ന സത്യം ആര്‍ക്കുമറിയില്ല. അത്ര കണ്ട് വ്യാജ വാര്‍ത്തകളുടെയും വ്യാജ പ്രചാരണങ്ങളുടെയും കുത്തൊഴുക്കുള്ള കാലമാണ്.

2024 ലെ തെരഞ്ഞെടുപ്പ് സംബന്ധിച്ച് പ്രതിപക്ഷ ഐക്യത്തില്‍ പ്രതീക്ഷയുണ്ടോ?

ത് സംഭവിച്ച് കൂടായ്കയില്ല. 2019ല്‍ കര്‍ണ്ണാടക, മദ്ധ്യപ്രദേശ്, ബീഹാര്‍, യുപി, ഗുജറാത്ത്, മഹാരാഷ്ട്ര ഉള്‍പ്പടെയുള്ള എല്ലാ സംസ്ഥാനങ്ങളും ബിജെപി നേടിയിരുന്നു. ഇപ്രാവശ്യം അത്രയും ജയിക്കുമെന്ന് ഞാന്‍ കരുതുന്നില്ല. അധികാരത്തില്‍ എത്താന്‍ എന്‍ഡിഎ മുന്നണി വേണ്ടിവന്നേക്കാം. അതാണ് സാധ്യത. പുല്‍വാമ പോലെ എന്താണ് 2024ല്‍ നമ്മളെ കാത്തിരിക്കുന്നത് എന്നും അറിയില്ല.

ഇന്ത്യന്‍ പൗര എന്ന നിലക്ക് വിദേശ രാജ്യങ്ങള്‍ സന്ദര്‍ശിക്കുകയും പല വേദികളില്‍ താങ്കളുടെ ശബ്ദം ഉയര്‍ന്ന് കേള്‍ക്കുകയും ചെയ്യുമ്പോള്‍ അവിടങ്ങളിലുള്ളവര്‍ ഇന്നത്തെ ഇന്ത്യയെ കാണുന്നത് എങ്ങിനെയാണ്?

ഞാന്‍ ഇന്ത്യയെ മാത്രം വിമര്‍ശിക്കുന്നയാളല്ല. ഈയിടെ ലണ്ടനില്‍ പോയപ്പോള്‍ രാജ്ഞിയുടെ മരണത്തെ കുറിച്ചും യുക്രൈന്‍ യുദ്ധത്തെ കുറിച്ചും ആണ് സംസാരിച്ചത്. ഇന്ത്യയെ പറ്റി മാത്രം പറയാന്‍ ഉത്സാഹമുള്ള ആളല്ല ഞാന്‍. അമേരിക്കയെ പറ്റിയും ഞാന്‍ എത്രയോ പറഞ്ഞിരിക്കുന്നു. പക്ഷെ എനിക്ക് തോന്നുന്നത് ഇന്ത്യയിലെ ജനാധിപത്യത്തെ സംബന്ധിച്ച് വളരെ ഗൗരവത്തോടെ കണക്കാക്കിയിരുന്ന ഒരു കാലമുണ്ടായിരുന്നു എന്നാണ് ഞാന്‍ കരുതുന്നത്. സമ്പദ് വ്യവസ്ഥയില്‍ തുല്യത ഇല്ലെങ്കിലും ജനാധിപത്യം മുന്‍നിര്‍ത്തി തുല്യ അന്തസ്സ് ഉണ്ടായിരുന്നു. ഇപ്പോള്‍ ഈ ഭരണകൂടത്തിന് എന്തൊക്കെയാണ് സാധിക്കുക എന്നത് മനസ്സിലാക്കി കൊണ്ട് തന്നെ വിപണി മുന്‍നിര്‍ത്തിയുള്ള തീരുമാനങ്ങള്‍ക്കാണ് പ്രാധാന്യം.

സര്‍വ്വത്ര പി ആര്‍ മാത്രമാണ് എന്നാണോ?

പിആര്‍ തന്ത്രമെന്നല്ല. അതൊരു ധാരണയാണ്. മറ്റുളളവര്‍ക്ക് ഇന്ത്യന്‍ വിപണിയിലേക്ക് പ്രവേശനം ഉറപ്പാക്കേണ്ടതുണ്ട്. അത് കൊണ്ട് തന്നെ പലതും കണ്ടില്ലെന്ന് നടിക്കാന്‍ അവര്‍ തയ്യാറാണ്.

ആസാദി എന്ന താങ്കളുടെ പുസ്തകം ആരംഭിക്കുന്നത് തന്നെ ഒരു പുസ്തക ചര്‍ച്ചയില്‍ ഒരാള്‍ താങ്കളോട് ഉന്നയിക്കുന്ന ചോദ്യത്തെ പറ്റി പറഞ്ഞ് കൊണ്ടാണ്. ഏതെങ്കിലും ഒരു എഴുത്തുകാരന്‍ എന്നെങ്കിലും തന്റെ മാതൃഭാഷയില്‍ അല്ലാത്ത മറ്റൊരു ഭാഷയില്‍ ഇത് പൊലെ രചിട്ടിട്ടുണ്ടാവുമോ എന്നാണ് ആയാള്‍ ‘ഗോഡ് ഓഫ് സ്‌മോള്‍ തിങ്ങ്‌സി’നെ കുറിച്ച് ചോദിച്ചത്. ആ സംഭവം ഓര്‍ത്ത് കൊണ്ട് താങ്കള്‍ തന്നെ പറഞ്ഞത് ആ ചോദ്യത്തില്‍ താങ്കളോടുള്ള മുഴുവന്‍ ശത്രുതയും ഉണ്ടായിരുന്നുവെന്ന്. കാരണം താങ്കള്‍ ഒരു എഴുത്തുകാരന്‍ അല്ല എഴുത്തുകാരിയാണ്. ഇന്ത്യയില്‍ ജനിച്ച് ഇംഗ്ലീഷില്‍ എഴുതി ആവശ്യത്തിലേറേ പ്രശസ്തി പിടിച്ച് പറ്റി. ഇതൊക്കെയാകാം അയാളെ പ്രകോപിപ്പിച്ചത് എന്നും താങ്കള്‍ പറയുന്നുണ്ട്. ചോദ്യമിതാണ്.. അക്ഷരങ്ങളുടെയും ഭാവനയുടെയും ലോകത്തും ജെന്‍ഡറും വിവേചനവും ദേശീതയയും ഒക്കെ മുഴച്ച് വരുന്നത് എന്ത് കൊണ്ടാണ്. സ്ത്രീ ശാക്തീകരണവും ഫെമിനിസവും അടക്കമുള്ള വിഷയങ്ങളെ ഇന്നും കേരളത്തില്‍ പോലും പലപ്പോഴും ഏറ്റവും പുച്ഛത്തോടെ നോക്കി കാണുന്ന ഒരവസ്ഥയുണ്ട്. എവിടെയാണ് തിരുത്തലുകള്‍ സാധ്യമാകുന്നത്?

azadi arundhati roy

ഫെമിനിസത്തെ സ്ത്രീകളുമായി ബന്ധപ്പെടുത്തി മാത്രം മനസ്സിലാക്കേണ്ട ഒന്നല്ല. അത് വളരെ പ്രാധാന്യമര്‍ഹിക്കുന്ന ഒന്നാണ്. കാരണം ഫെമിനിസ്റ്റല്ലാത്ത നിരവധി സ്ത്രീകളുണ്ട്. ഫെമിനിസ്റ്റുകളായ നിരവധി പുരുഷന്മാരുമുണ്ട്. ഇന്ന് ഫെമിനിസത്തിന് എന്‍ജിഒ പരിവേഷം വന്നിട്ടുണ്ട്. എന്നെ സംബന്ധിച്ചിടത്തോളം നര്‍മ്മദയിലെ പോരാട്ടം ഫെമിനിസമാണ്. സ്ത്രീകളാണ് മുന്‍നിരയില്‍ നിന്ന്  പോരാടിയത്. ബസ്തറിലെ കാടുകള്‍ക്കുള്ളില്‍ പോരാടിയ ക്രാന്തികാരി ആദിവാസി മഹിള സംഘടനയില്‍ 90,000 അംഗങ്ങളുണ്ട്. പക്ഷെ ധനസഹായം ലഭിക്കുന്ന എന്‍ജിഒ സംഘടനകളിലെ സ്ത്രീകള്‍ അവരെ ഫെമിനിസ്റ്റുകളായി കണക്കാക്കാറില്ല. എന്നാല്‍ അവര്‍ പോരാടുന്നത് യഥാര്‍ത്ഥ മൗലികാവകാശങ്ങള്‍ക്ക് വേണ്ടിയാണ്. അത് കൊണ്ടതന്നെ എന്‍ ജി ഒ പ്രവര്‍ത്തനങ്ങളോ, അക്കാദമിക പഠനങ്ങളോ മാത്രമല്ല സാമ്രാജ്യതത്വത്തിനും കോര്‍പ്പറേറ്റുകള്‍ക്കും എതിരായി നടത്തുന്ന പ്രക്ഷോഭങ്ങള്‍ കൂടിയാണ് ഫെമിനിസം. അങ്ങനെ സമഗ്രമായ കാഴ്ചപ്പാടിലുടെ വേണം ഫെമിനിസത്തെ മനസ്സിലാക്കാന്‍. തുല്യതക്ക് വേണ്ടി സ്ത്രീകള്‍ക്ക് ഒറ്റക്ക് ഒരു പോരാട്ടം നടത്താന്‍ സാധിക്കില്ല എന്നത് പോലെ തന്നെ നിരവധി സ്ത്രീകള്‍ ഇന്ന് ഫാഷിസ്റ്റ് പദ്ധതികളുടെ പങ്കാളികളാണ് എന്ന വസ്തുത കൂടി മനസ്സിലാക്കണം.

താങ്കള്‍ ശ്രദ്ധിച്ചിട്ടുണ്ടോ എന്നറിയില്ല ..കുറേ കാലങ്ങളായി വൈകല്യമാര്‍ന്ന വികസനത്തിനെതിരേയും കുടിയിറക്കലിന് എതിരെയുമൊക്കെ നടന്നിട്ടുള്ള കേരളത്തിലെ ഒട്ടനവധി സമരങ്ങളില്‍.. ഉദാഹരണമായി മൂലമ്പിള്ളി, കീഴാറ്റുര്‍, കെ റെയില്‍, വിഴിഞ്ഞം തുടങ്ങിയ സമരങ്ങളില്‍ പ്രത്യക്ഷമായ സ്ത്രീ സാന്നിധ്യവും ശക്തമായ നിലയില്‍ രാഷ്ട്രീയം പറഞ്ഞ് കൊണ്ടുള്ള വീട്ടമ്മമാരുടെയും പെണ്‍കുട്ടികളുടെയും നേതൃനിര നമുക്ക് കാണാനായി. ആക്ടിവിസ്റ്റ് പ്രതിരോധ നിരയിലെ സ്ത്രീ സാന്നിധ്യത്തെ എങ്ങിനെ കാണുന്നു.  താങ്കള്‍ അവര്‍ക്കൊപ്പം ഉടന്‍ ചേരുമെന്ന് പ്രതീക്ഷിക്കാമോ?

നിക്കറിയാം പക്ഷെ എനിക്ക് തോന്നുന്നത് ചില വ്യക്തികള്‍ മാത്രം നിരന്തരം മുന്‍ നിരയില്‍ വേണമെന്ന് പ്രതീക്ഷിക്കുന്നതില്‍ ഒരു അപകടമുണ്ട് എന്നാണ് ഞാന്‍ കരുതുന്നത്. അത് ആര്‍ക്കും ഗുണം ചെയ്യില്ല. മറ്റുള്ള എഴുത്തുകാരും വരണം. ഒരുപാട് കാര്യങ്ങള്‍ എഴുതുന്നതിനെ കുറിച്ചും ചെയ്യുന്നതിനെ കുറിച്ചമൊക്കെ ചിന്തിയിലാണ് ഞാന്‍. കാര്യങ്ങള്‍ കൃത്യമായി മനസ്സിലാക്കാനും ആഴത്തില്‍ പഠിക്കാനുമുള്ള സമയവും വേണം. അത് കൊണ്ട് ഇപ്പോഴതറിയില്ല.

തന്റെ പുസ്തകത്തില്‍ സ്വന്തം അവതാരികയില്‍ അരുന്ധതി റോയ് ഒരിക്കല്‍ എഴുതിയത് ഉത്തരവാദിത്വത്തോടെയുള്ള വലിയ സ്വതന്ത്ര്യമാണ് നോവല്‍ എന്ന സാഹിത്യരൂപം തനിക്ക് നല്‍കിയിട്ടുള്ളത് എന്നാണ്. എന്നിട്ടും തന്റെ ആദ്യ നോവല്‍ ഇറങ്ങി 20 വര്‍ഷം കാത്തിരുന്നു രണ്ടാമത്തെ നോവല്‍ എഴുതാന്‍. നോവല്‍ എഴുത്തിന്റെ പരമമായ സ്വാതന്ത്ര്യം അവര്‍ മാറ്റി വെക്കുകയായിരുന്നില്ല മറിച്ച് സ്വാതന്ത്ര്യത്തിന്റെ കൈകകളും കാലുകളും വിരലുകളും ശിരസ്സ് തന്നെയും മുറിച്ച് മാറ്റപ്പെടുന്ന ഒരു ലോകത്ത് അവര്‍ എഴുതി കൊണ്ടേ ഇരിക്കുകയായിരുന്നു. നോണ്‍ ഫിക്ഷനായും യാത്രകുറിപ്പായും അനുഭവ കുറിപ്പായും രാഷട്രീയ പ്രതിരോധവും ആയി ഒക്കെ അവ നമ്മുടെ രാഷ്ട്രീയ മണ്ഡലത്തില്‍ നിറഞ്ഞ് നില്‍ക്കുകയാണ്. അരുന്ധതിയുടെ ഓരോ അക്ഷരത്തിനും അപാരമായ കരുത്തുണ്ട്. വാക്കുകള്‍ക്കും അങ്ങിനെ തന്നെ. അവരുടെ ഇടപെടലുകള്‍ ഉറ്റ് നോക്കുന്നതും അങ്ങിനെ തന്നെ.

മാന്‍ ബുക്കര്‍ സമ്മാനത്തിനര്‍ഹയായ ആദ്യ ഇന്ത്യന്‍ വനിതയാണ് അരുന്ധതി റോയ്. അരുന്ധതിയുടെ ദ് ഗോഡ് ഓഫ് സ്മാള്‍ തിങ്ങ്‌സ് (കുഞ്ഞുകാര്യങ്ങളുടെ ഒടേതമ്പുരാന്‍) എന്ന കൃതിക്ക് 1997-ലെ ബുക്കര്‍ പുരസ്‌കാരം ലഭിച്ചു. 1961ല്‍ നവംബര്‍ 24ന് മേഘാലയയിലെ ഷില്ലോങ്ങില്‍ ആണ് ജനനം. അമ്മ കോട്ടയം, അയ്മനം സ്വദേശിനി മേരി റോയ്. പിതാവ് രാജീബ് റോയ്. പഠനത്തിനു ശേഷം ആര്‍കിടെക്റ്റ്, എയ്‌റോബിക് പരിശീലക എന്നീ നിലകളില്‍ ജോലി ചെയ്തു. ‘ഇന്‍ വിച് ആന്നീ ഗിവ്‌സ് ഇറ്റ് ടു ദോസ് വണ്‍സ്’, ‘ഇലെക്ട്രിക് മൂണ്‍’ എന്നീ ചലച്ചിത്രങ്ങള്‍ക്കും പല ടി.വി. പരിപാടികള്‍ക്കും വേണ്ടി തൂലിക ചലിപ്പിച്ചു. എഴുത്തുകാരി എന്നതിലുമുപരിയായി അറിയപ്പെടുന്ന ഒരു സാമൂഹികപ്രവര്‍ത്തക കൂടിയാണ് അരുന്ധതി റോയ്.

FAQs – ചോദ്യോത്തരങ്ങൾ

എന്താണ് പുൽവാമ ആക്രമണം?

ജമ്മു കാശ്മീരില്‍ പുല്‍വാമ ജില്ലയിലെ അവാന്തിപുരക്കടുത്ത് സുരക്ഷാ ഉദ്യോഗസ്ഥരുമായി സഞ്ചരിച്ചിരുന്ന വാഹനങ്ങള്‍ക്കു നേരെ 2019 ഫെബ്രുവരി പതിനാലാം തീയതി, തീവ്രവാദികള്‍ മനുഷ്യബോംബ് ആക്രമണം നടത്തി. 49 സി.ആര്‍.പി.എഫ് ജവാന്മാരുടെ മരണത്തിനിടയാക്കിയ ആക്രമണത്തിന്റെ ഉത്തരവാദിത്തം തീവ്രവാദ സംഘടനയായ ജെയ്ഷ് ഇ മൊഹമ്മദ് ഏറ്റെടുത്തിരുന്നു.

എന്താണ് ഇന്ത്യൻ പാർലമെന്റ് ആക്രമണം?

2001 ഡിസംബര്‍ 13നാണ് ലഷ്‌കര്‍-ഇ-ത്വയ്യിബ, ജെയ്ഷ്-ഇ-മുഹമ്മദ് എന്നീ തീവ്രവാദ സംഘടനകള്‍ ചേര്‍ന്ന് ഇന്ത്യന്‍ പാര്‍ലമെന്റ് ആക്രമിച്ചത്. സുരക്ഷ ഉദ്യോഗസ്ഥരടക്കം 9 പേര്‍ക്ക് ആക്രമണത്തില്‍ ജീവന്‍ നഷ്ടമായി. 5 തീവ്രവാദികളെ സുരക്ഷാസേന വധിച്ചു.

ആരാണ് പ്രണോയ് റോയ്?

പ്രമുഖ മാദ്ധ്യമപ്രവര്‍ത്തകനും എന്‍ ഡി ടി വി സ്ഥാപകനുമാണ് പ്രണോയ് റോയ്.എന്‍.ഡി.ടി.വി.യുടെ പ്രമോട്ടര്‍ കമ്പനിയായ ആര്‍.ആര്‍.പി.ആര്‍. ഹോള്‍ഡിങ് പ്രൈവറ്റ് ലിമിറ്റഡിന്റെ (ആര്‍.ആര്‍.പി.ആര്‍.എച്ച്.) ഡയറക്ടര്‍ ബോര്‍ഡ് സ്ഥാനത്തുനിന്ന് പ്രണോയ് റോയും ഭാര്യ രാധിക റോയും രാജിവെച്ചത് നവംബര്‍ 29നാണ്. അദാനി എന്റര്‍പ്രൈസസ് ലിമിറ്റഡിന്റെ (എ ഇ എല്‍) അനുബന്ധ സ്ഥാപനമായ എ എം ജി മീഡിയ നെറ്റ്വര്‍ക്ക്‌സ് ലിമിറ്റഡിന്റെ (എഎംഎന്‍എല്‍) ഉടമസ്ഥതയിലുള്ള ഉപസ്ഥാപനമായ വിശ്വപ്രധാന്‍ കൊമേഴ്സ്യല്‍ പ്രൈവറ്റ് ലിമിറ്റഡ് (വി സി പി എല്‍) ആര്‍ ആര്‍ പി ആര്‍ ഹോള്‍ഡിംഗ് പ്രൈവറ്റ് ലിമിറ്റഡിന്റെ 99.5 ശതമാനം ഓഹരി സ്വന്തമാക്കിയിരുന്നു.പിന്നാലെ എന്‍ ഡി ടിവിയുടെ 26 ശതമാനം ഓഹരി അദാനി ഗ്രൂപ്പ് സ്വന്തമാക്കി. ഇതോടെ എന്‍ഡിടിവിയിലെ തങ്ങളുടെ ശേഷിക്കുന്ന 32.26 ശതമാനം ഓഹരികളില്‍ 27.26 ശതമാനവും അദാനി ഗ്രൂപ്പിന് വില്‍ക്കാന്‍ പ്രണോയ് റോയും രാധിക റോയും തീരുമാനിക്കുകയായിരുന്നു.

എന്താണ് ഇറാനിലെ ഹിജാബ് വിരുദ്ധ പ്രക്ഷോഭം?

അനുചിതമായ വസ്ത്രം ധരിച്ചുവെന്ന് ആറോപിച്ച് അറസ്റ്റ് ചെയ്ത ഇറാനിയന്‍ – കുര്‍ദിഷ് വനിത മഹ്‌സ അമിനി മതകാര്യ പോലിസിന്റെ കസ്റ്റഡിയില്‍ വെച്ച് കൊല്ലപ്പെട്ടതിനെ തുടര്‍ന്നാണ് ഹിജാബ് വിരുദ്ധ പ്രക്ഷോഭം പൊട്ടിപുറപ്പെട്ടത്. മുന്‍ പ്രസിഡന്റ് മെഹമൂദ് അഹമ്മദിനെജാദ് 2006ലാണ് ‘ഗഷ്ട് ഇ എര്‍ഷാദ്’ എന്ന മതകാര്യ പൊലീസ് രൂപം കൊടുത്തത്. 1979 മുതല്‍ സ്ത്രീകളുടെ വസ്ത്രധാരണം സംബന്ധിച്ച് കടുത്ത യാഥാസ്ഥിതിക നിയമങ്ങളാണ് ഇറാനില്‍ നിലനില്‍ക്കുന്നത്. 2006-ല്‍ പ്രസിഡന്റ് മഹമൂദ് അഹമ്മദിനെജാദിന്റെ നേതൃത്വത്തിലാണ് രാജ്യത്ത് ‘അച്ചടക്കത്തിന്റെയും ഹിജാബിന്റെയും സംസ്‌കാരം ഉറപ്പുവരുത്തുന്നതിന്’ ഗാഷ്ദ് ഇ ഇര്‍ഷാദ് എന്ന പേരിലുള്ള മതകാര്യപോലീസിന് രൂപംനല്‍കിയത്. ഇതിനു ശേഷം സ്ത്രീകളുടെ വസ്ത്രധാരണം നിരീക്ഷിക്കുകയും നിയമലംഘനം ആരോപിച്ച് നിരവധി പേരെ അറസ്റ്റ് ചെയ്യുകയും ചെയ്തിരുന്നു.അനൗദ്യോഗിക കണക്കുകള്‍ പ്രകാരം 500ാേളം പ്രക്ഷോഭകര്‍ കൊല്ലപ്പെട്ടതായാണ് വിവരം.63 കുട്ടികളും 32 സ്ത്രീകളും കൊല്ലപ്പെട്ടിട്ടുണ്ട. പ്രക്ഷോഭത്തില്‍ പങ്കെടുത്ത 3 പേരെ ഭരണകൂടം തൂക്കി കൊല്ലുകയും ചെയ്തു.

ആരാണ് ഗോഡ് ഓഫ് സ്‌മോൾ തിങ്ക്സ് രചിച്ചത്?

ഇന്ത്യന്‍ എഴുത്തുകാരിയും സാമൂഹിക പ്രവര്‍ത്തകയുമായ അരുന്ധതി റോയ് ആണ് ഗോഡ് ഓഫ് സ്‌മോള്‍ തിങ്കസ് രചിച്ചത്. 1996ല്‍ പൂര്‍ത്തിയാക്കിയ ഗോഡ് ഓഫ് സ്‌മോള്‍ തിങ്ക്‌സ് എന്ന കൃതിക്ക് 1997ല്‍ ആണ് മാന്‍ ബുക്കര്‍ പ്രൈസ് ലഭിക്കുന്നത്.

“ഇന്ത്യന്‍ ജനാധിപത്യത്തിന് ഏറ്റ ക്ഷതങ്ങള്‍ തിരുത്താനാവാത്തതാണ്.ലോകത്തിലെ ഏറ്റവും മോശം സ്ഥലമാണ് ഇന്ത്യ എന്നതല്ല നമ്മുടെ ദുരന്തം. ആ അവസ്ഥയിലേക്ക് നാം എത്തി കൊണ്ടിരിക്കുകയാണ് എന്നതാണ് ദുരന്തം. സ്വന്തം വീട് നമ്മള്‍ തന്നെ തീവെച്ച് നശിപ്പിക്കുകയാണ്.അപകടകരമാം വിധം അതിവേഗം തോറ്റുകൊണ്ടിരിക്കുന്ന പരീക്ഷണമാണ് ഇന്ന് ഇന്ത്യ” – അരുന്ധതി റോയ്.

ആളെ കൊല്ലുന്ന ഹോട്ടല്‍ ഭക്ഷണം; സമ്പൂര്‍ണ പരാജയമായി സര്‍ക്കാര്‍ സംവിധാനങ്ങള്‍

0
Reading Time: 5 minutes

 

ഭക്ഷ്യ വിഷബാധയും അതേതുടര്‍ന്നുള്ള മരണങ്ങളും ഗുരുതരമായ ആരോഗ്യ പ്രശ്‌നങ്ങളും നിരന്തരം റിപ്പോര്‍ട്ട് ചെയ്യപ്പെടുന്ന അവസ്ഥയിലാണ് കേരളമിപ്പോള്‍. വാര്‍ത്തകളും പരാതികളും ഉണ്ടാകുമ്പോള്‍ മാത്രം ‘ഉണര്‍ന്നു പ്രവര്‍ത്തിക്കുന്ന’ ഭക്ഷ്യസുരക്ഷാ വകുപ്പും ആരോഗ്യ വകുപ്പുമാണ് സംസ്ഥാനത്തുള്ളത്. ഭക്ഷ്യ സുരക്ഷാ മേഖലയില്‍ പ്രവര്‍ത്തിക്കുന്ന സകല ഡിപ്പാര്‍ട്ട്‌മെന്റുകളുടെയും കെടുകാര്യസ്ഥത വീടിന് പുറത്തിറങ്ങി ഭക്ഷണം കഴിക്കാനാകാത്ത അവസ്ഥയിലേക്ക് കാര്യങ്ങളെ കൊണ്ടെത്തിച്ചിട്ടുണ്ട്. പഴകിയ, ചീഞ്ഞ ഇറച്ചികള്‍ കൊണ്ടുണ്ടാക്കുന്ന ഭക്ഷണങ്ങള്‍ സംസ്ഥാനത്തിന്റെ വിവിധ പ്രദേശങ്ങളില്‍ വില്‍ക്കുന്നുവെന്ന് വ്യക്തമായിട്ടും നടപടികള്‍ സ്വീകരിക്കാതെ ഭക്ഷ്യസുരക്ഷാ വകുപ്പ് മരണങ്ങള്‍ക്ക് വേണ്ടി കാത്തിരിക്കുകയാണ്.

 

കഴിഞ്ഞ ദിവസം കൊച്ചിയില്‍ നിന്നും പിടിച്ച 500 കിലോ കോഴിയിറച്ചിയും ഇത്തരത്തില്‍പ്പെട്ടതാണ്. സുനാമി ഇറച്ചിയെന്ന് വിളിക്കുന്ന ഇവ മരണത്തിന് വരെ കാരണമാക്കുന്നവയാണ്. ഷവര്‍മ, ചിക്കന്റോള്‍, പഫ്സ്, കട്‌ലെറ്റ്, അല്‍ഫാം, ഷവായ്, ബര്‍ഗര്‍, സാന്‍ഡ് വിച്ച് തുടങ്ങിയവ ഫാസ്റ്റ് ഫുഡ് നിര്‍മ്മിക്കാന്‍ വേണ്ടിയാണ് ഇത്തരം സുനാമി ഇറച്ചികള്‍ ഉപയോഗിക്കുന്നത്. ഫാമുകളില്‍ വെച്ച് ചത്തതും അസുഖം വന്നതും വൈകല്യങ്ങളുള്ളതുമായ കോഴികളെയാണ് ഫ്രീസ് ചെയ്ത് എത്തിക്കുന്നതെന്ന് ഭക്ഷ്യ സുരക്ഷാ വകുപ്പില്‍ ജോലി ചെയ്യുന്ന ഹെല്‍ത്ത് ഇന്‍സ്‌പെക്ടര്‍ സുനില്‍ താഹ വോക്ക് മലയാളത്തോട് പറഞ്ഞു.

കളമശ്ശേരി കൈപ്പടമുകളിലെ വീട് കേന്ദ്രീകരിച്ച് ഹോട്ടലുകളിലേക്ക് വിതരണം ചെയ്യാനിരുന്ന 500 കിലോ പഴകിയ ഇറച്ചിയുടെ ഉറവിടം ഇതുവരെ കണ്ടെത്താനായിട്ടില്ല. മലപ്പുറം സ്വദേശി ജുനൈസ് എന്ന വ്യക്തിയുടെ ഉടമസ്ഥതയിലാണ് ഇറച്ചി സൂക്ഷിച്ചിരുന്ന വീടുള്ളത്. ഇയാളെയും ഇതുവരെ കണ്ടെത്താന്‍ ആയിട്ടില്ലെന്ന് സുനില്‍ താഹ പറഞ്ഞു. കഴിഞ്ഞ ആറു മാസമായി ഈ വീട് കേന്ദ്രീകരിച്ച് പഴകിയ ഇറച്ചി വില്‍പ്പന നടത്തുന്നുണ്ട്. വീട്ടുമുറ്റത്തും തെങ്ങിന്‍ചുവട്ടിലുമായി സൂക്ഷിച്ചിരുന്ന ഫ്രീസറുകളില്‍ നിന്നാണ് ഇറച്ചി കണ്ടെത്തിയത്. വീട്ടില്‍ നിന്ന് വന്‍ ദുര്‍ഗന്ധം വമിച്ചതോടെ പരിസരവാസികള്‍ ബുധനാഴ്ച വൈകുന്നേരത്തോടെ നഗരസഭയില്‍ പരാതിപ്പെടുകയായിരുന്നു. തുടര്‍ന്നാണ് കളമശ്ശേരി നഗരസഭയിലെ ആരോഗ്യ വിഭാഗം ഉദ്യോഗസ്ഥര്‍ ഇവിടെ പരിശോധന നടത്തിയത്.

‘ആറു മാസമായി ഈ വീട് കേന്ദ്രീകരിച്ച് ഹോട്ടല്‍ തൊഴിലാളികള്‍ താമസിക്കുന്നുണ്ട്. പല തവണ ഈ വീട്ടില്‍ നിന്നും ദുര്‍ഗന്ധം വരുന്നുണ്ടെന്ന് പരിസര വാസികള്‍ അവരോട് തന്നെ പറയുന്നുണ്ടായിരുന്നു. എന്നാല്‍ പരാതിയുമായി ആരും മുന്നോട്ടു പോയില്ല. അവര്‍ തന്നെ പറഞ്ഞു തീര്‍ക്കാന്‍ ശ്രമിച്ചു. രൂക്ഷ ഗന്ധം വമിച്ചതോടെയാണ് അയല്‍വാസികള്‍ ഞങ്ങളെ വിളിക്കുന്നത്. അവിടെ എത്തിയപ്പോഴാണ് സംഭവത്തിന്റെ വ്യാപ്തി ഞങ്ങള്‍ക്ക് മനസ്സിലാവുന്നത്. 500 കിലോ ഫ്രോസണ്‍ കോഴി ഉണ്ടായിരുന്നു. ഇതര സംസ്ഥാനത്ത് നിന്നും വന്ന കോഴിയാണ്. വൃത്തിഹീനമായ ചുറ്റുപാടിലാണ് ഇറച്ചി സൂക്ഷിച്ചിരുന്നത്. മാസങ്ങള്‍ പഴക്കമുള്ള ഇറച്ചിയാണ് പിടിച്ചെടുത്തത്. ഇറച്ചി ഇന്നലെ തന്നെ നശിപ്പിച്ചു. ഇറച്ചിയുടെ കാലപ്പഴക്കം അറിയാന്‍ ഭക്ഷ്യ സുരക്ഷാ വകുപ്പ് സാമ്പിളുകള്‍ ശേഖരിച്ചിട്ടുണ്ട്.’, സുനില്‍ താഹ വോക്ക് മലയാളത്തോട് പറഞ്ഞു.

ശീതീകരണ സംവിധാനമില്ലാത്ത തെര്‍മോക്കോള്‍ ബോക്സുകളിലാണ് കേരളത്തിലേക്ക് ഇത്തരം ഇറച്ചി കടത്തുന്നത്. ‘പൂനെ മുതല്‍ ഇങ്ങോട്ടുള്ള സ്ഥലങ്ങളില്‍ ഇറച്ചി ഫാമുകള്‍ വളരെ അധികം ഉണ്ട്. അവര്‍ പ്രധാനമായും ലക്ഷ്യമാക്കുന്ന വിപണി കേരളം ആണ്. കേരളത്തിലേയ്ക്ക് കൊണ്ട് വരുന്നതിനിടെ കോഴികളില്‍ ചെറിയൊരു ശതമാനം ചത്തുപോകും. അത് തിരിച്ചു ഫാമില്‍ എത്തിക്കണം എന്നാണ് നിയമം. എന്നാല്‍ പല സപ്ലൈമാരും ചെയ്യുന്നത് ഈ കോഴികളെ എവിടെയെങ്കിലും കളയും, ഇല്ലെങ്കില്‍ ചെറിയ പൈസയ്ക്ക് ഹോട്ടലുകാര്‍ക്ക് വില്‍ക്കും. സ്റ്റാര്‍ ഹോട്ടലുകള്‍ മുതല്‍ തട്ടുകട വരെ ഇത്തരത്തില്‍ ഭക്ഷണകാര്യത്തില്‍ വീഴ്ചകള്‍ വരുത്തുന്നുണ്ട്. നമ്മുക്ക് മനസ്സിലാക്കാന്‍ കഴിയില്ല എവിടെയാണ് പ്രശ്‌നങ്ങള്‍ സംഭവിക്കുന്നത് എന്ന്. മീന്‍ കൊണ്ടുവരുമ്പോള്‍ തന്നെ ചീഞ്ഞ ഭാഗങ്ങള്‍ കളഞ്ഞ് ചീയാത്ത ഭാഗങ്ങള്‍ എടുക്കും. കഷ്ണങ്ങള്‍ ആക്കിയാണ് മീന്‍ കൊണ്ടുവരുന്നതെങ്കില്‍ ചീഞ്ഞതാണോ അല്ലയോ എന്ന് കണ്ടുപിടിക്കാനും കഴിയില്ല.’, സുനില്‍ താഹ കൂട്ടിച്ചേര്‍ത്തു.

പഴകിയ മാംസത്തില്‍ രൂപപ്പെടുന്ന ഇ.കോളി, സാല്‍മോണെല്ല, ലിസ്റ്റീരിയ, സ്റ്റഫയിലോ കോക്കസ്, ക്ലോസ്ട്രിഡിയം, ക്യാമ്പയിലോബാക്ടര്‍ പോലുള്ള ബാക്ടീരിയകള്‍ അത്യന്തം അപകടകാരികളാണ്. പഴകിയ മാംസം കറി വച്ചാല്‍ രുചിവ്യത്യാസം അറിയാന്‍ കഴിയും. എന്നാല്‍ ഷവര്‍മ, കട്‌ലറ്റ്, ബര്‍ഗര്‍ പോലെയുള്ളവയുടെ രുചിയില്‍ വലിയ മാറ്റമുണ്ടാകില്ല. ഇതാണ് സുനാമി ഇറച്ചികള്‍ക്ക് ആവശ്യക്കാര്‍ വര്‍ദ്ധിക്കാന്‍ കാരണം.

ജനങ്ങളെ സംബന്ധിച്ചിടത്തോളം അതിപ്രധാനമാണ് ഭക്ഷ്യസുരക്ഷ. ഇന്ന് ഒട്ടുമുക്കാല്‍ ജനങ്ങളും ഹോട്ടലുകളെ ഒരു നേരത്തെ ഭക്ഷണത്തിനു വേണ്ടി ആശ്രയിക്കുന്നുണ്ട്. ഹോട്ടലുകളിലും തട്ടുകടകളിലും ഭക്ഷ്യസുരക്ഷാ മാനദണ്ഡങ്ങളും ശുചിത്വവും പാലിക്കുന്നുവെന്ന് സ്വയം വിശ്വാസം വരുത്തിയാണ് ഓരോരുത്തരും ഭക്ഷണം വാങ്ങി കഴിക്കുന്നത്. ചെലവാക്കുന്ന പണത്തിനു മൂല്യമുള്ള ഭക്ഷണമല്ല ഉപയോക്താവിന് ലഭിക്കുന്നതെങ്കില്‍ അത് ഉറപ്പുവരുത്തേണ്ടത് സര്‍ക്കാരാണ്. എന്നാല്‍ ഭക്ഷ്യസുരക്ഷാ മേഖലയില്‍ സര്‍ക്കാര്‍ സമ്പൂര്‍ണ പരാജയമാണെന്നാണ് അടിക്കടി ഉണ്ടാവുന്ന പ്രശ്‌നങ്ങള്‍ സൂചിപ്പിക്കുന്നത്.

ഭക്ഷ്യസുരക്ഷാ സൂചികയില്‍ കേരളത്തിന്റെ ഗ്രാഫ് താഴെക്കാണ്. തമിഴ്നാടിനും ഗുജറാത്തിനും മഹാരാഷ്ട്രക്കും ഹിമാചല്‍ പ്രദേശിനും പശ്ചിമ ബംഗാളിനും മധ്യപ്രദേശിനും പിറകെ ഏഴാം സ്ഥാനത്താണ് ഫുഡ് സേഫ്റ്റി ആന്‍ഡ് സ്റ്റാന്‍ഡേര്‍ഡ്സ് അതോറിറ്റി ഓഫ് ഇന്ത്യ (എഫ്എസ്എസ്എഐ) യുടെ 2021-22ലെ സംസ്ഥാന ഭക്ഷ്യസുരക്ഷാ സൂചികാ പട്ടികയില്‍ കേരളത്തിന്റെ സ്ഥാനം. 2019-20 വര്‍ഷത്തില്‍ 75 പോയിന്റിലേറെ നേടി ഒന്നാം സ്ഥാനത്തും 2020-21 വര്‍ഷത്തില്‍ രണ്ടാം സ്ഥാനത്തുമായിരുന്നു കേരളം. മികച്ച ഭരണനിര്‍വഹണം, സുസ്ഥിര വികസനം, ആരോഗ്യ സുരക്ഷ തുടങ്ങിയ കാര്യങ്ങളിലെല്ലാം മറ്റു സംസ്ഥാനങ്ങളേക്കാള്‍ മികച്ചു നില്‍ക്കുകയും സൂചികാ പട്ടികകളില്‍ പ്രഥമ സ്ഥാനം നിലനിര്‍ത്തുകയും ചെയ്യുന്ന കേരളം എന്തുകൊണ്ടാണ് ഭക്ഷ്യസുരക്ഷാ സൂചികയില്‍ പിന്തള്ളപ്പെടുന്നതെന്ന് സര്‍ക്കാര്‍ സ്വയം പരിശോധന നടത്തേണ്ടതുണ്ട്.

കഴിഞ്ഞ ഓഗസ്റ്റ് വരെയുള്ള അഞ്ചു വര്‍ഷത്തെ കണക്കുപ്രകാരം പരിശോധനകള്‍ക്കായി കേരളം 4.24 കോടി രൂപ ചെലവഴിച്ചിട്ടുണ്ട്. അഞ്ചു ജില്ലകളില്‍ മാത്രമാണ് പരിശോധനാ ലാബുകളുള്ളത്. 9 ജില്ലകളില്‍ കൂടി ലാബുകള്‍ സ്ഥാപിക്കാനുളള തീരുമാനം കടലാസിലാണ്. കേരളത്തിലെ ഒരു ലാബിനും എന്‍എബിഎല്‍ അക്രഡിറ്റേഷനില്ല. പിടിച്ചെടുക്കുന്ന സാംപിളുകള്‍ അക്രഡിറ്റേഷനുളള ലാബുകളില്‍ പരിശോധിച്ചാല്‍ മാത്രമേ കോടതികള്‍ അംഗീകരിക്കൂ. പ്രാദേശിക തലത്തില്‍ ഭക്ഷ്യ സുരക്ഷ ഉറപ്പാക്കുന്നതിനായി പഞ്ചായത്തുകള്‍ക്ക് തങ്ങളുടെ നേതൃത്വത്തില്‍ ഉദ്യോഗസ്ഥ നിയമനത്തിന് അനുമതി നല്‍കണമെന്ന് ഐഎംഎ ശുപാര്‍ശ ചെയ്തിട്ടുണ്ട്. തിരുവനന്തപുരം, പത്തനംതിട്ട, എറണാകുളം, കോഴിക്കോട്, കൂത്തുപറമ്പ് എന്നിവിടങ്ങളില്‍ ഭക്ഷ്യ ഉല്‍പന്നങ്ങളുടെ ഗുണനിലവാരം പരിശോധിക്കുന്ന ലാബുകള്‍ പ്രവര്‍ത്തിക്കുന്നുണ്ടെങ്കിലും എല്ലാ ജില്ലകളിലും സേവനം ലഭ്യമാക്കണമെന്നാണ് ആവശ്യം. ബാക്ടീരിയ അധിഷ്ഠിത വിഷബാധകള്‍ക്ക് മൈക്രോ ബയോളജിസ്റ്റുകളുടെ സേവനവും വേണ്ടിവരും.

ആവശ്യത്തിനു ഉദ്യോഗസ്ഥരില്ലാത്തതും വകുപ്പ് നേരിടുന്ന പ്രശ്‌നങ്ങളില്‍ ഒന്നാണ്. ഭക്ഷണം ഉണ്ടാക്കുകയും വില്‍ക്കുകയും വിതരണം ചെയ്യുകയും ചെയ്യുന്ന കേരളത്തിലെ 12 ലക്ഷത്തോളം സ്ഥാപനങ്ങളില്‍ ആറു ലക്ഷം സ്ഥാപനങ്ങളാണ് രജിസ്റ്റര്‍ ചെയ്തിട്ടുള്ളത്. ഇതില്‍ ഭക്ഷ്യസുരക്ഷ ലൈസന്‍സ് 40000 ല്‍ താഴെ എണ്ണത്തിന് മാത്രമാണ്. ആറു ലക്ഷം സ്ഥാപനങ്ങള്‍ പരിശോധിക്കാന്‍ ഫീല്‍ഡില്‍ ആകെയുള്ളത് 140 ഭക്ഷ്യ സുരക്ഷാ ഓഫീസര്‍മാര്‍ മാത്രം. നിലവിലെ ഉദ്യോഗസ്ഥര്‍ക്ക് കൈകാര്യം ചെയ്യുന്നതിന്റെ ഇരട്ടി ജോലിയാണുള്ളത്. നഗര മേഖലയില്‍ ഒരു ഫുഡ് സേഫ്റ്റി ഓഫിസര്‍ക്ക് 10,000 സ്ഥാപനങ്ങളിലെങ്കിലും പരിശോധന നടത്തേണ്ടിവരുന്നു. ഗ്രാമീണ മേഖലയില്‍ ഒരാള്‍ക്ക് 12 പഞ്ചായത്തുകളുടെയെങ്കിലും ചുമതലയുണ്ട്.

അരിക്കെന്ന പോലെ പച്ചക്കറികള്‍ക്കും ഇറച്ചിക്കും എല്ലാം കേരളീയര്‍ ആശ്രയിക്കുന്നത് ഇതര സംസ്ഥാനങ്ങളെയാണ്. എന്നാല്‍ ഇതിനൊക്കെ എത്രത്തോളം ഗുണമേന്മയുണ്ട് എന്നുള്ള പരിശോധനകള്‍ നടക്കുന്നില്ല. ചെക്ക് പോസ്റ്റ് വഴിയും ട്രെയിന്‍ മാര്‍ഗവും എത്തുന്ന കോഴി, ആട്, മാട്, പച്ചക്കറികള്‍ തുടങ്ങിയവ കേരളത്തിന്റെ അതിര്‍ത്തി കടക്കുന്നതിനു മുമ്പേ പരിശോധിക്കാനുള്ള സംവിധാനങ്ങള്‍ ഉണ്ടാവണം. കൂടാതെ തട്ടുകട മുതല്‍ സ്റ്റാര്‍ ഹോട്ടലുകളില്‍ വരെ ഭക്ഷ്യ സുരക്ഷാ വകുപ്പ് നിരന്തരമായ പരിശോധനകള്‍ നടത്തുകയും നിയമ നടപടികള്‍ കര്‍ശനമാക്കുകയും വേണം. ഭക്ഷ്യസുരക്ഷാ മാനദണ്ഡങ്ങളും ശുചിത്വവും പാലിക്കുന്നുവെന്ന് വകുപ്പ് ഉറപ്പുവരുത്തണം. ജനങ്ങളുടെ ആരോഗ്യവും ജീവനും തകരാറിലാക്കാതെ ബന്ധപ്പെട്ട വകുപ്പും ഉദ്യോഗസ്ഥരും ഇനിയെങ്കിലും ശക്തമായ നടപടികളിലേയ്ക്ക് നീങ്ങണം.

ബഫര്‍ സോണിന്റെ മറവില്‍ എറണാകുളം പഴയ റെയില്‍വേ സ്റ്റേഷന്‍ വികസനം അട്ടിമറിക്കാന്‍ നീക്കം

0
Reading Time: 3 minutes

കേരളത്തില്‍ മലയോര മേഖലകളില്‍ ബഫര്‍ സോണ്‍ വിഷയം വീണ്ടും ആളികത്തുമ്പോള്‍ സംസ്ഥാനത്തെ ഏക മെട്രോ നഗരമായ കൊച്ചിയിലെ ചരിത്ര പ്രധാന്യമുള്ള പഴയ റെയില്‍വേ സ്റ്റേഷനും ബഫര്‍ സോണ്‍ സര്‍വേയില്‍ ഉള്‍പ്പെട്ടത് നാട്ടുകാര്‍ക്ക് ആശങ്ക ഉളവാക്കുന്നതാണ്. ബഫര്‍ സോണിന്റെ മറവില്‍ റെയില്‍വേയുടെ വികസനം അട്ടിമറിക്കാനുള്ള ശ്രമമാണ് നടക്കുന്നത് എന്ന ആരോപണം ശക്തമായി ഉയരുകയാണ്. 120 വര്‍ഷം പഴക്കമുള്ള ചരിത്ര പ്രാധാന്യമുള്ള റെയില്‍വേ സ്റ്റേഷനാണ് എറണാകുളം പഴയ റെയില്‍വേ സ്റ്റേഷന്‍. അതിവേഗം വളര്‍ന്ന് കൊണ്ടിരിക്കുന്ന നഗരത്തിന്റെ ആവശ്യകതകള്‍ക്കനുസരിച്ച് റെയില്‍വേ സ്റ്റേഷന്‍ വികസിപ്പിക്കണമെന്ന ആവശ്യത്തിന് കാലങ്ങളുടെ പഴക്കമുണ്ട്. ഏതാണ്ട് പ്രതീക്ഷകള്‍ക്ക് ചിറക് മുളച്ചു തുടങ്ങിയപ്പോഴാണ് വെല്ലുവിളിയായി ബഫര്‍ സോണ്‍ എത്തുന്നത്.

ബഫര്‍ സോണിന്റെ മറവില്‍ റെയില്‍വേ വികസനം അട്ടിമറിക്കാനുള്ള നീക്കമാണ് നടക്കുന്നത്. ബഫര്‍ സോണ്‍ വിഷയം മുതലെടുത്ത് ചിലര്‍ സ്വാര്‍ത്ഥ താല്‍പര്യങ്ങള്‍ക്കായി നിലവിലെ അവസ്ഥ അട്ടിമറിക്കാന്‍ ശ്രമിക്കുന്നതായി സംശയിക്കുന്നതായി എറണാകുളം ഓള്‍ഡ് റെയില്‍വേ സ്റ്റേഷന്‍ വികസന സമിതി കണ്‍വീനര്‍ കെ പി ഹരിഹര കുമാര്‍ വോക്ക് മലയാളത്തോട് പറഞ്ഞു.

മംഗളവനം ദേശീയോദ്യാനം

കൊച്ചി നഗരത്തിന്റെ ഹൃദയഭാഗത്തുള്ള 2.74 ഹെക്ടര്‍ (0.0274 ചതുരശ്ര കിലോമീറ്റര്‍) മാത്രമുള്ള മംഗളവനം പക്ഷി സങ്കേതം ദേശിയോദ്യാനമാണ്. വനംവകുപ്പ് പ്രസിദ്ധീകരിച്ച ഭൂപടം അനുസരിച്ച് ഇതിന്റെ പത്ത് ഇരട്ടിയിലേറെ, അതായത് കൊച്ചി നഗരസഭയുടെ സിംഹഭാഗവും ബഫര്‍ സോണില്‍പ്പെടും. 2004ല്‍ നിലവില്‍ വന്ന മംഗളവനം പക്ഷി സങ്കേതം സംസ്ഥാന വനംവകുപ്പിന്റെ കീഴിലുള്ള ഏറ്റവും ചെറിയ സംരക്ഷിത പ്രദേശമാണ്. കണ്ടല്‍ വനങ്ങളില്‍ സ്ഥിതി ചെയ്യുന്ന കേരളത്തിലെ ഏക പക്ഷിസങ്കേതവുമാണിത്. മേയ് 2006 ല്‍ നടത്തിയ ഒരു സര്‍വ്വേ പ്രകാരം ഇവിടെ 32 ഇനത്തില്‍ പെടുന്ന 194 ലധികം പക്ഷികള്‍ ഉള്ളതായി കണക്കാക്കപ്പെടുന്നത്. ഈ ഭാഗത്ത് നിന്ന് ഇതുവരെ രേഖപ്പെടുത്തിയിട്ടുള്ള പക്ഷികളുടെ തരങ്ങള്‍ 72 ആണ്. ഇത് കൂടാതെ 17 തരത്തില്‍ പെട്ട ചിത്രശലഭങ്ങളും ഇവിടെ ഉള്ളതായി രേഖപ്പെടുത്തിയിട്ടുണ്ട്. കുടാതെ 51 തരം വര്‍ഗ്ഗത്തില്‍പ്പെട്ട ചിലന്തികളും ഉള്ളതായി ആണ് റിപ്പോര്‍ട്ട്. വിധി നടപ്പാക്കിയാല്‍ മംഗളവനം പക്ഷിസങ്കേതത്തിന്റെ 200 മീറ്റര്‍ മാത്രം അകലെയുള്ള കേരള ഹൈക്കോടതിയെ ഉള്‍പ്പെടെ ബാധിക്കുമെന്നതാണ് യാഥാര്‍ത്ഥ്യം. വനംവകുപ്പ് നടത്തിയ ഏരിയല്‍ സര്‍വേ പ്രകാരം മംഗളവനം പക്ഷി സങ്കേതത്തിന്റെ ബഫര്‍ സോണ്‍ പരിധിയില്‍ കേരള ഹൈക്കോടതി ഉള്‍പ്പടെ നിരവധി സ്ഥാപനങ്ങള്‍, വാണിജ്യ യൂണിറ്റുകള്‍, അപ്പാര്‍ട്ടുമെന്റുകള്‍ തുടങ്ങി 2500 ഓളം കെട്ടിടങ്ങളാണ് ഉള്‍പ്പെടുന്നത്. ഇത് നഗരത്തിന്റെ വികസനത്തെ ബാധിക്കുമോ എന്ന ആശങ്ക പലരും പങ്ക് വെക്കുന്നുണ്ട്.

എറണാകുളം ഓള്‍ഡ് റെയില്‍വേ സ്റ്റേഷനില്‍ ഉള്ള 42 ഏക്കര്‍ സ്ഥലം മംഗള വനത്തിന്റെ പേരില്‍ വികസനത്തില്‍ നിന്ന് പിന്മാറ്റാനാണ് ശ്രമം എന്ന ആരോപണം ശക്തമാകുന്നത് ഈ പശ്ചാത്തലത്തിലാണ്. 0.25 കി. മീറ്റര്‍ മാത്രം വിസ്തീര്‍ണമുള്ള മംഗളവനം റെയില്‍വേ സ്റ്റേഷന്‍ തുടങ്ങിയതിന് ശേഷം കാക്ക കാഷ്ടിച്ചുണ്ടായ കുറെ കാടുകളുടെ കൂട്ടമാണ് അവിടെ ഇപ്പോള്‍, പക്ഷികളില്ല. ഹൈക്കോടതി കെട്ടിടം വരുന്നതിനു മുന്‍പ് കുറെ പക്ഷികള്‍ അവിടെ വന്നിരുന്നു എന്നത് വാസ്തവമാണ്. എന്നാല്‍ ഹൈക്കോടതിയുടെ പടുകൂറ്റന്‍ കെട്ടിടവും മറ്റ് കെട്ടിടങ്ങളും വന്നതോടെ പക്ഷികളുടെ സഞ്ചാരപഥത്തില്‍ തടസ്സമുണ്ടായി. അതിനു ശേഷം അവിടെ പക്ഷികള്‍ വരാറില്ലായെന്നും ഹരിഹരന്‍ ആരോപിക്കുന്നു.

റെയില്‍വേ സ്റ്റേഷന്റെ ചരിത്രം


മഹാരാജ രാമവര്‍മ്മ പതിനഞ്ചാമന്‍ നിര്‍മ്മിച്ചതാണ് എറണാകുളത്തെ ആദ്യത്തെ റെയില്‍വേ സ്റ്റേഷന്‍. 1902 ജൂലൈ 16-നാണ് സ്റ്റേഷനില്‍ നിന്നു ആദ്യ യാത്രാ ട്രെയിനുകള്‍ സര്‍വീസ് തുടങ്ങുന്നത്. 1924ല്‍ വൈക്കം സത്യാഗ്രഹത്തില്‍ പങ്കെടുക്കാന്‍ പോകുന്ന വഴിയില്‍ മഹാത്മാഗാന്ധി ഇറങ്ങിയ സ്റ്റേഷനാണിത് എന്ന പ്രാധാന്യവുമുണ്ട്. സ്വാമി വിവേകാനന്ദന്റെയും രവീന്ദ്രനാഥ ടാഗോറിന്റെയും സന്ദര്‍ശനത്തിനും റെയില്‍വേ സ്റ്റേഷന്‍ സാക്ഷ്യം വഹിച്ചു. കൊച്ചി മഹാരാജാവ് രാമവര്‍മ്മ ഈ റെയില്‍വേ സ്റ്റേഷന്റെ വികസനത്തിന് ധനസഹായം നല്‍കുന്നതിനായി പൂര്‍ണ്ണത്രയീശ ക്ഷേത്രത്തിലെ ആനകളുടെ സ്വര്‍ണ്ണ അലങ്കാര മൂടികള്‍ വിറ്റിരുന്നു എന്നാണ് ചിരിത്രം പറയുന്നത്. 1960 വരെ പാസഞ്ചര്‍ ട്രെയിന്‍ സര്‍വീസുകള്‍ പതിവായി നടത്തിയിരുന്നു, എന്നാല്‍ സൗത്ത്, നോര്‍ത്ത് റെയില്‍വേ സ്റ്റേഷനുകളുടെ നവീകരണം പഴയ റെയില്‍വേ സ്റ്റേഷന്റെ മരണമണി മുഴക്കി. 2001ല്‍ സര്‍ക്കാര്‍ സ്റ്റേഷന്‍ ഗുഡ്സ് ഷെഡാക്കി മാറ്റിയെങ്കിലും അതും ക്രമേണ ഉപേക്ഷിക്കപ്പെട്ടു. നിലവില്‍ പഴയ റെയില്‍വേ സ്റ്റേഷന്‍, ഹൈക്കോടതി ജംഗ്ഷനു സമീപം 42 ഏക്കര്‍ വനത്തിനുള്ളില്‍, വള്ളിച്ചെടികളാല്‍ മൂടപ്പെട്ട നിലയിലാണ്.

രണ്ട് കോടിയുടെ വികസനം

സ്‌റ്റേഷന്‍ വികസിപ്പിക്കാനുള്ള നടപടികള്‍ ആരംഭിച്ച ഘട്ടത്തിലാണ് പുതിയ വെല്ലുവിളി ഉയരുന്നത്. സ്റ്റേഷനിലെ പഴയ സ്ലീപ്പറുകള്‍ മാറ്റിസ്ഥാപിക്കാനുള്ള പ്രവൃത്തികള്‍ക്ക് അനുമതി ലഭിച്ചിട്ടുണ്ട്. ഇതിനായി റെയില്‍വേ രണ്ട് കോടി രൂപ അനുവദിച്ച് സ്ലീപ്പറുകള്‍ മാറ്റുകയും ചെയ്തു. ഇതെല്ലാം സ്റ്റേഷന്റെ വികസനത്തിന് അനുകൂലമായ സൂചനകളായിരുന്നു. വൈകിയാലും റെയില്‍വേ സ്റ്റേഷന്‍ വികസനത്തിനു സാധ്യത നിലനില്‍ക്കെ ബഫര്‍ സോണിന്റെ പേരില്‍ ചിലര്‍ അനാവശ്യമായി ജനങ്ങളില്‍ ആശയക്കുഴപ്പം ഉണ്ടാക്കാന്‍ ശ്രമിക്കുകയാണെന്ന് എന്നാണ് ഹരിഹര കുമാര്‍ ഉള്‍പ്പടെയുള്ള സാമൂഹ്യപ്രവര്‍ത്തകരുടെ ആരോപണം.

ബഫര്‍സോണ്‍ കരട് വിജ്ഞാപനത്തില്‍ ഉള്‍പ്പെട്ട മേഖലകളില്‍ ഇളവ് അുവദിക്കണെമന്ന് കേരളത്തിന്റെ ആവശ്യം സുപ്രീംകോടതി 16 നാണ് വീണ്ടും പരിഗണിക്കുക. ഒരു കിലോമീറ്റര്‍ ബഫര്‍സോണ്‍ ചില കേസുകളിലെങ്കിലും പ്രായോഗികമല്ലെന്നും ഇളവ് നല്‍കേണ്ടി വരുമെന്നുമുള്ള കോടതിയുടെ നിരീക്ഷണത്തിലാണ് ഇനി പ്രതീക്ഷ.

ആഷര്‍: ബഷീറിന്റെ കൂട്ടുകാരന്‍, ദ്രാവിഡ ഭാഷയെ ലോകത്തിന്റെ മുന്നിലെത്തിച്ച സാഹിത്യകാരന്‍

0
Reading Time: 4 minutes

 

കേരളത്തിന്റെ വിശ്വസാഹിത്യകാരന്‍ വൈക്കം മുഹമ്മദ് ബഷീറിനെ ലോകത്തിനു മുമ്പില്‍ അവതരിപ്പിച്ച ഭാഷാ സാഹിത്യകാരന്‍ റൊണാള്‍ഡ് ഇ ആഷര്‍ ഓര്‍മയാവുമ്പോള്‍ ബാക്കിയാവുന്നത് ദ്രവീഡിയന്‍ സാഹിത്യലോകത്തിന് അദ്ദേഹം നല്‍കിയ ലോകോത്തര സംഭാവനകളാണ്. ഭാഷാ ഗവേഷകനും ദ്രാവിഡ ഭാഷാ പണ്ഡിതനും അധ്യാപകനും എഴുത്തുകാരനുമായ ആഷര്‍ ഇംഗ്ലണ്ടിലെ നോട്ടിങ്ങാംഷറിലാണ് ജനിച്ചത്. എഡിന്‍ബറോ സര്‍വകലാശാലയില്‍ ഭാഷാശാസ്ത്ര വിഭാഗത്തിന്റെ മേധാവിയായിരുന്നു. ഗവേഷണാര്‍ഥം ഇന്ത്യയിലെത്തിയ ആഷര്‍ ആദ്യം പഠിച്ചത് ദ്രാവിഡ ഭാഷയായ തമിഴാണ്. പിന്നീട് മലയാളവും. അതുവഴി മലയാള സാഹിത്യത്തിലെ ഭാഷയുടെ വൈവിധ്യങ്ങളും ആഷര്‍ അറിഞ്ഞു. പിന്നീട് അത് വിവര്‍ത്തനങ്ങളിലൂടെ ലോകത്തിന്റെ മുന്നിലെത്തിച്ചു.

ഭാഷ വൈവിധ്യത്തിന്റെ നിരവധി അടരുകളുള്ള ബഷീറിന്റെ കൃതികളാണ് ആഷര്‍ കൂടുതലും മൊഴിമാറ്റം ചെയ്തത്. തന്റെതായ ഭാഷാ സവിശേഷതകള്‍ കൊണ്ട് ഒരു സാഹിത്യ സര്‍വകലാശാല തന്നെ സ്ഥാപിച്ച ബഷീറിന്റെ കൃതികളുടെ ആഴം തൊടാന്‍ ആഷറിന് കഴിഞ്ഞു എന്ന് തന്നെ വേണം പറയാന്‍. ശക്തമായ ആക്ഷേപഹാസ്യവും ചിലപ്പോള്‍ രൂക്ഷ പരിഹാസം തന്നെയും വരികള്‍ക്കിടയില്‍ ഒളിപ്പിച്ച് വായനക്കാരെ കേവലാഹ്ലാദത്തില്‍ നിന്ന് ആഴത്തിലുള്ള ചിന്തകളിലേക്ക് ഉയര്‍ത്തിക്കൊണ്ടു പോകുന്ന ബഷീറിയന്‍ ശൈലി താരതമ്യങ്ങള്‍ക്കതീതമാണ്.

പളുങ്കൂസ്, ഈ വെളിച്ചത്തിനെന്തു വെളിച്ചം, ഇമ്മിണി ബല്യ ഒന്ന്, ചപ്ലാച്ചി, ബഡ്ക്കൂസ്, കുണ്ട്രപ്പി, ബുസ്സാട്ടോ, ഡ്രങ്ക് ഡിങ്കാഹോ, ഹുലീ ഹലീയോ ഹുലി, ഹുലാലോ, ഹന്‍ധോന്തു… തുടങ്ങിയ വാക്കുകള്‍ ബഷീറിന്റെ മാത്രം സംഭാവനയാണ്. ഈ വാക്കുകള്‍ക്ക് പകരംവെക്കാനുള്ള പദപ്രയോഗങ്ങള്‍ ലോകത്തെ മറ്റൊരു ഭാഷയിലുമില്ല. എന്നിരുന്നിട്ടും കഥയുടെ രസം ചോര്‍ന്നുപോകാതെ ബഷീറിന്റെ കൃതികള്‍ ആഷര്‍ മൊഴിമാറ്റം ചെയ്തു.

ബഷീറിന്റെ ‘ന്റുപ്പുപ്പാക്കൊരാനേണ്ടാര്‍ന്ന്’, തകഴിയുടെ ‘തോട്ടിയുടെ മകന്‍’ എന്നിവ ഇംഗ്ലിഷിലേക്കു തര്‍ജമ ചെയ്താണ് ആഷര്‍ മലയാളികള്‍ക്കിടയില്‍ പ്രിയങ്കരനായി തുടങ്ങിയത്. ‘ബാല്യകാലസഖി’, ‘പാത്തുമ്മയുടെ ആട്’ തുടങ്ങിയ കൃതികളും ഒട്ടേറെ ചെറുകഥകളും ഇംഗ്ലിഷിലേക്കു മൊഴിമാറ്റി. ആഷറിന്റെ അവസാനത്തെ പ്രധാനപ്പെട്ട കൃതി കെ പി രാമനുണ്ണിയുടെ ‘സൂഫി പറഞ്ഞ കഥ’യുടെ തര്‍ജമയായ ‘വാട്ട് ദ് സൂഫി സെഡ്’ ആണ്.

ബഷീറുമായി വലിയ ആത്മബന്ധമായിരുന്നു അദ്ദേഹത്തിന്. ബഷീറിന്റെ കൃതികള്‍ ഇംഗ്ലീഷിലേക്കു വിവര്‍ത്തനം ചെയ്യുകയെന്നത് ഏറെ വെല്ലുവിളികള്‍ നിറഞ്ഞതായിരുന്നു എന്ന് ആഷര്‍ തന്നെ തുറന്നു സമ്മതിച്ചിട്ടുണ്ട്. കഥാപാത്രങ്ങളുടെ ഭാഷയിലാണ് ബഷീര്‍ എഴുതുന്നത്. ഈ ഭാഷ ഇംഗ്ലീഷിലേയ്ക്ക് വിവരത്തനം ചെയ്യാന്‍ ബുദ്ധിമുട്ടായിരുന്നു എന്ന് ആഷര്‍ പറഞ്ഞിട്ടുണ്ട്.

‘ന്റുപ്പൂപ്പാക്കൊരാനേണ്ടാര്‍ന്ന്’ എന്നതിനെ ‘മൈ ഗ്രാന്‍ഡ് ഡാഡ് ഹാഡ് ആന്‍ എലിഫന്റ്’ എന്ന് ഇംഗ്ലീഷിലാക്കിയപ്പോഴും താന്‍ ഒട്ടും സംതൃപ്തനായിരുന്നില്ലെന്ന് ആഷര്‍ പറഞ്ഞിട്ടുണ്ട്. ബഷീറിന്റെ പ്രയോഗത്തിന്റെ മനോഹാരിത ഒരിക്കലും പരിഭാഷക്ക് പൂര്‍ണമായി വഴങ്ങിത്തരില്ലെന്ന് പറയുകയായിരുന്നു അദ്ദേഹം.

ബാല്യകാലസഖിയില്‍ സുഹറയുടെ മരണത്തില്‍ മജീദിന്റെ അവസ്ഥ ബഷീര്‍ വിവരിക്കുന്നുണ്ട്. ‘പ്രപഞ്ചം ശൂന്യമായെ’ന്നാണ് ബഷീര്‍ എഴുതിയത്. അത് ആഷര്‍ മൊഴിമാറ്റിയത് ഇങ്ങനെയാണ്- ‘The world was full of emptiness’.

‘ഉള്ളില്‍ നിന്നും രോമകൂപങ്ങള്‍ വഴി പൊന്തിയ തണുത്ത ആവിയില്‍ മജീദ് കുളിച്ചുപോയി എന്നുമാത്രം’ എന്ന് ബഷീര്‍ അടുത്ത വരിയായി എഴുതുന്നു, ഇതിലെ ആഷറിന്റെ പരിഭാഷ ഇങ്ങനെയാണ്- ‘It was just that Majid was soaked in perspiration that had come through all the pores of his skin’.

വളരെ പെട്ടെന്ന് അനാഥനായിപ്പോയ അതിതീവ്ര ദുഖത്തിലും ഒറ്റപ്പെടലിലും നില്‍ക്കുന്ന മജീദിന്റെ അവസ്ഥ അതിന്റെ എല്ലാ വൈകാരികതയിലും ബഷീര്‍ തന്റെ ഭാഷയിലൂടെ പ്രതിഫലിപ്പിച്ചു. ഒരു സംശയവും ഇല്ലാതെ വായനക്കാര്‍ മജീദിന്റെ ദുഖത്തില്‍ പങ്കാളികളായി. എന്നാല്‍ ആഷറിന്റെ വാക്കുകള്‍ അത്രകണ്ട് തീവ്രത വാനയക്കാരില്‍ എത്തിച്ചോ എന്നതില്‍ സംശയമാണ്.

‘ന്റുപ്പൂപ്പാക്കൊരാനേണ്ടാര്‍ന്ന്’ എന്ന കഥയിലെ ‘ആ ആന കുഴിയാനയായിരുന്നു’ എന്നു പറയുന്നത് ‘എലിഫന്റ് ആന്റ്’ എന്നാണ് ആഷര്‍ തര്‍ജമ ചെയ്തത്. കുഴിയാന എന്താണെന്ന് ഇംഗ്ലിഷുകാര്‍ക്ക് അറിയാന്‍ സാധ്യതയില്ലാ എന്ന് ആഷറിന് അറിയാമായിരുന്നു. ഓക്സ്ഫഡ് ഇംഗ്ലീഷ് ഡിക്ഷണറിക്ക് അലിക്കത്ത്, കാച്ചി, തട്ടം തുടങ്ങി അറുപതോളം മലബാര്‍ പദങ്ങള്‍ സംഭാവന നല്‍കിയതും ആഷറാണ്.

ദ്രാവിഡ ഭാഷകളില്‍ ആഷറിന്റെയും ആദ്യ ശ്രദ്ധ പതിഞ്ഞത് തമിഴിലാണ്. ക്രമേണ പ്രാചീന തമിഴിലും സംഘസാഹിത്യത്തിലും പ്രാവീണ്യം നേടി. അദ്ദേഹത്തിന് മലയാളത്തിലേക്ക് പ്രവേശിക്കാനുള്ള അവസരമൊരുക്കിയത് അണ്ണാമലൈ സര്‍വകലാശാലയിലുണ്ടായിരുന്ന കെ എം പ്രഭാകര വാര്യയറാണ്. ഭാഷാശാസ്ത്ര രംഗത്ത് അദ്ദേഹം ‘എന്‍സൈക്ലോപീഡിയ ഓഫ് ലാംഗ്വിജ് ആന്‍ഡ് ലിങ്ഗ്വിസ്റ്റിക്സ്’ എന്ന കൃതി പുറത്തിറക്കി. ‘മലയാളം ക്രിയാരൂപങ്ങളെ എങ്ങനെ വര്‍ഗീകരിക്കാം’, ‘സകര്‍മക പ്രയോജകങ്ങളെക്കുറിച്ച് എന്താണ് പറയാനുള്ളത്’ ഉള്‍പ്പെടെയുള്ള ലേഖനങ്ങളെല്ലാം ശ്രദ്ധ നേടി. മലയാള മഹാനിഘണ്ടുവിന്റെ വിപുലമായ നിരൂപണം അദ്ദേഹം എഴുതിയിട്ടുണ്ട്. തമിഴ് എഴുത്തുകാരന്‍ പുതുമൈപിത്തന്റെ 99 ചെറുകഥകളുടെ സമാഹാരവും ആഷര്‍ പരിഭാഷപ്പെടുത്തിയിട്ടുണ്ട്.

ബഷീര്‍ മുതല്‍ എം എന്‍ കാരശ്ശേരി വരെയുള്ള സാഹിത്യ സൗഹൃദ വലയമുണ്ട് ആഷറിന്. കോഴിക്കോട് ആഷറിന് സ്വന്തം നഗരംപോലെ പരിചിതമായിരുന്നു. പതിറ്റാണ്ടുകളുടെ സാഹിത്യയാത്ര അവസാനിപ്പിച്ച് ആഷര്‍ ചരിത്രമാവുമ്പോള്‍ ആ ചരിത്രത്തില്‍ ഈ കൊച്ചു കേരളവും ഇവിടുത്തെ വൈവിധ്യമാര്‍ന്ന സാഹിത്യ ലോകവും ചേര്‍ന്നുനില്‍ക്കുന്നുണ്ട്.

തമിഴ്‌നാട്ടിലും ഫെഡറലിസത്തിന്‍റെ ഭാവി ആശങ്കയില്‍

0
Reading Time: 4 minutes

ഗവര്‍ണര്‍-കാബിനറ്റ് ബന്ധത്തെക്കുറിച്ചും പാര്‍ലമെന്‍ററി ജനാധിപത്യത്തില്‍ ഗവര്‍ണറുടെ പങ്കിനെക്കുറിച്ചുമുള്ള ചര്‍ച്ചകളും വീണ്ടും ഉയരുന്നത് കഴിഞ്ഞ ദിവസം തമിഴ്‌നാട് നിയമസഭ സാക്ഷ്യം വഹിച്ച ദൗര്‍ഭാഗ്യകരമായ സംഭവങ്ങളിലൂടെയാണ്. 2023 ലെ ആദ്യ നിയമസഭാ സമ്മേളനം ആരംഭിക്കുന്നതിന്‍റെ ഭാഗമായി തമിഴ്‌നാട് ഗവര്‍ണര്‍ ആര്‍എന്‍ രവി നടത്തിയ നയപ്രഖ്യാപന പ്രസംഗം വന്‍ വിവാദങ്ങള്‍ക്കാണ് വഴി തുറന്നിരിക്കുന്നത്. പ്രസംഗത്തില്‍ ഗവര്‍ണര്‍ ചില ഭാഗങ്ങള്‍ വിട്ടുകളഞ്ഞതും, ചില വാക്കുകകള്‍ കൂട്ടി ചേര്‍ത്തതും ഡിഎംകെ അംഗങ്ങളുടെ പ്രതിഷേധത്തിന് ഇടയാക്കി. ബിജെപി സംഘപരിവാര്‍ അജണ്ട നടപ്പാക്കാനുള്ള ഗവര്‍ണറുടെ ശ്രമങ്ങള്‍, തമിഴ്‌നാട് എന്നതിന് പകരം തമിഴകം എന്നാക്കണമെന്ന പ്രസ്താവന, നിമയങ്ങള്‍ ഒപ്പിടാത്ത നടപടി തുടങ്ങിയ വിഷയങ്ങളില്‍ പ്രസംഗം ആരംഭിച്ചപ്പോള്‍ മുതല്‍ ഭരണപക്ഷ അംഗങ്ങളുടെ പ്രതിഷേധം ഉയര്‍ന്നിരുന്നു. ഓണ്‍ലൈന്‍ റമ്മി നിരോധന നിയമം അടക്കം സര്‍ക്കാര്‍ പാസാക്കിയ 21 ബില്ലുകള്‍ ഗവര്‍ണര്‍ ഒപ്പിടാതെ തടഞ്ഞു വെച്ചിട്ടുണ്ട്.

നയപ്രഖ്യാപന പ്രസംഗത്തില്‍ പെരിയാറിന്‍റേയും അംബേദ്കറുടേയും കാമരാജിന്റേയും അണ്ണാദുരയുടേയും കരുണാനിധിയുടേയും സിദ്ധാന്തങ്ങളും ആശയങ്ങളും പിന്‍തുടരുന്ന സര്‍ക്കാര്‍ ദ്രാവിഡ മോഡല്‍ ഭരണമാണ് നടത്തുന്നതെന്ന ഭാഗം ആര്‍എന്‍ രവി വായിക്കാതെ ഒഴിവാക്കി. തമിഴ്‌നാട്ടിലെ ക്രമസമാധാനനിലയെക്കുറിച്ച് പറയുന്ന ഭാഗവും ഗവര്‍ണര്‍ വായിച്ചില്ല, സമാധാനത്തിന്റെ തുറമുഖമാണ് തമിഴ്നാട് എന്നും വിദേശ നിക്ഷേപകരെ വന്‍ തോതില്‍ ആകര്‍ഷിക്കുന്ന സ്ഥിതി എംകെ സ്റ്റാലിന്‍ സര്‍ക്കാര്‍ സംജാതമാക്കിയെന്നും, സമസ്ത മേഖലയിലും പുരോഗതി കൊണ്ടുവരാന്‍ ഡിഎംകെ സര്‍ക്കാരിന് കഴിഞ്ഞുവെന്നും വായിക്കാന്‍ ഗവര്‍ണര്‍ ആര്‍എന്‍ രവി തയാറായില്ല. പ്രസംഗത്തിലെ 65ാം ഖണ്ഡികയിലുളള ദ്രാവിഡ മോഡല്‍ എന്ന പ്രയോഗവും ഒഴിവാക്കപ്പെട്ടു.

mk stalin

ഇതിന് പിന്നാലെ, സംസ്ഥാന സര്‍ക്കാര്‍ അംഗീകരിച്ച പ്രസംഗം മാത്രമേ സ്പീക്കര്‍ സഭാ രേഖകളില്‍ ഉള്‍പ്പെടുത്താവൂ എന്നും ഗവര്‍ണര്‍ കൂട്ടിച്ചേര്‍ത്ത ഭാഗങ്ങള്‍ രേഖകളില്‍ നിന്ന് ഒഴിവാക്കണമെന്നും ആവശ്യപ്പെട്ട് പ്രമേയം പാസാക്കി. ഇതില്‍ പ്രകോപിതനായി ഗവര്‍ണര്‍ സഭയില്‍ നിന്ന് ഇറങ്ങിപ്പോവുകയും ചെയ്തു. നിയമസഭയില്‍ നയപ്രഖ്യാപന പ്രസംഗ ചടങ്ങിന്‍റെ അവസാനം ദേശീയ ഗാനം ആലപിച്ച് പൂര്‍ത്തിയാക്കുന്നതിന് മുമ്പായി തന്നെ ആര്‍എന്‍ രവി ധൃതിയില്‍ പുറത്തേക്ക് നടന്നുപോയിരുന്നു, ഗവര്‍ണര്‍ ദേശീയഗാനത്തെ ആദരിക്കണമായിരുന്നു എന്ന വിമര്‍ശനവും ഉയര്‍ന്നു.

ഗവര്‍ണര്‍മാരും സംസ്ഥാന സര്‍ക്കാരുകളും തമ്മിലുള്ള തര്‍ക്കങ്ങള്‍ ഇന്നും ഇന്നലെയും തുടങ്ങിയതല്ല. ഭരണഘടനാ പദവിയില്‍ ഇരുന്നുകൊണ്ട് സര്‍ക്കാരുകളുടെ ഭരണകാര്യങ്ങളില്‍ ഗവര്‍ണര്‍മാര്‍ ഇടപെടുന്നത് വലിയ രാഷ്ട്രീയ തര്‍ക്കങ്ങളിലേക്കും വഴിയൊരുക്കിയിട്ടുണ്ട്. ഭരണഘടനാപദവിയാണെങ്കിലും വലിയ അധികാരങ്ങളൊന്നും ഗവര്‍ണര്‍ക്കില്ല. സംസ്ഥാന സര്‍ക്കാരിന്‍റെ ശുപാര്‍ശ കൂടി പരിഗണിച്ച് മാത്രമേ ഗവര്‍ണര്‍ക്ക് തീരുമാനമെടുക്കാനാവൂ. അത് മറികടന്ന ഗവര്‍ണര്‍ സ്വന്തം നിലക്ക് തീരുമാനം എടുത്താല്‍ സംസ്ഥാന സര്‍ക്കാരിന് അത് കോടതിയില്‍ ചോദ്യം ചെയ്യാം. 1989ല്‍ കര്‍ണാടകത്തിലെ എസ് ആര്‍ ബൊമ്മെ സര്‍ക്കാരിനെ പിരിച്ച് വിട്ട് രാഷ്ട്രപതി ഭരണം ഏര്‍പ്പെടുത്തിയത് സര്‍ക്കാരിന് ഭൂരിപക്ഷമില്ലെന്ന ഗവര്‍ണറുടെ റിപ്പോര്‍ട്ടിന്‍റെ അടിസ്ഥാനത്തിലായിരുന്നു. അഞ്ച് വര്‍ഷം കഴിഞ്ഞ് സുപ്രിംകോടതി സുപ്രധാനമായ വിധി പ്രസ്താവത്തിലൂടെ ഈ നടപടി അസാധുവാക്കി. ഇതോടെ ചട്ടം 356ന്‍റെ ദുരുപയോഗം ഇല്ലാതായി. സംസ്ഥാന സര്‍ക്കാരുകള്‍ക്ക് മുകളില്‍ നിയന്ത്രണം ഉറപ്പാക്കാന്‍ ഗവര്‍ണര്‍ പദവി പോല ഭരണഘടനാ പദവി അനിവാര്യമാണ് എന്ന് പറയുമ്പോഴും അത് കോളോണിയല്‍ നിയമത്തിലെ അധികാരങ്ങളുടെ അടിസ്ഥാനത്തില്‍ വേണമോ എന്നതാണ് പ്രധാന ചോദ്യം. ഗവര്‍ണമാരുടെ നിയമനം രാഷ്ട്രീയപരമായ തുടരുന്നതിനാല്‍ തന്നെ, രാഷ്ട്രീയത്തിന് അതീതമായി പ്രവര്‍ത്തിച്ച് സംസ്ഥാന സര്‍ക്കാരുകള്‍ ഒപ്പം നില്‍ക്കുമെന്ന് കരുതുക വയ്യ.

ഗവര്‍ണര്‍ നിയമനം സംബന്ധിച്ച് ബ്രിട്ടീഷുകാര്‍ കൊണ്ടുവന്ന 1935-ലെ ഗവണ്‍മെന്‍റ് ഓഫ് ഇന്ത്യ ആക്ടിലെ സെക്ഷന്‍ 93 അതേപടി ഇന്ത്യന്‍ ഭരണഘടനയില്‍ ഉള്‍പ്പെടുത്തുകയായിരുന്നു എന്നുള്ള ആക്ഷേപവും നേരത്തെ പല തവണ ഉയര്‍ന്നതാണ്. സര്‍ക്കാരിനെ നിലനിര്‍ത്തുക എന്നത് ഗവര്‍ണ്ണറുടെ ഉത്തരവാദിത്തമാണ്, കാരണം ഗവര്‍ണറുടെ തൃപ്തിക്ക് അനുസൃതമായാണ് ഒരു സംസ്ഥാന ഭരണകൂടം നിലകൊള്ളുന്നത് എന്നതായിരുന്നു ബി ആര്‍ അംബേദ്കറുടെ വിശദീകരണം. സംസ്ഥാന ഭരണകൂടത്തെ ഉപദേശിക്കാന്‍, ആവശ്യം വന്നാല്‍ മുന്നറിയിപ്പുകള്‍ നല്കാന്‍, പിന്നെ ചില നിലപാടുകളില്‍ ബദല്‍ നിര്‍ദ്ദേശങ്ങള്‍ ചൂണ്ടിക്കാണിക്കാന്‍ ഒക്കെ ഗവര്‍ണര്‍ക്ക് കഴിയണം എന്നും അദ്ദേഹം ഭരണഘടനാ നിര്‍മ്മാണ സഭയില്‍ വ്യക്തമാക്കിയതാണ്.

‘ഗവര്‍ണര്‍ എന്നത് അങ്ങേയറ്റം ആലങ്കാരികമായ പദവി മാത്രമാണ്. ഗവര്‍ണര്‍ക്ക് നിര്‍വഹിക്കേണ്ട ഒരു ചുമതലയും ഇല്ലെന്ന് ഈ ഭരണഘടനാ അസംബ്ലിയിലെ എല്ലാവര്‍ക്കും അറിയാമെന്ന് ഞങ്ങള്‍ കരടു തയ്യാറാക്കിയ കമ്മിറ്റി കരുതുന്നു. ഒരു പ്രശസ്തമായ പ്രയോഗം കടമെടുക്കുകയാണെങ്കില്‍, ഗവര്‍ണര്‍ക്ക് വിവേചനാധികാരത്തോടെയോ സ്വന്തം തീരുമാനത്തിന്‍റെ അടിസ്ഥാനത്തിലോ നിര്‍വഹിക്കേണ്ട ഒരു ചുമതലയും ഇല്ല എന്നതാണ്. പുതിയ ഭരണഘടനയുടെ തത്ത്വമനുസരിച്ച് എല്ലാ കാര്യങ്ങളിലും മന്ത്രിസഭയുടെ ഉപദേശത്തെ പിന്തുടരേണ്ടതുണ്ട്.’ എന്നാണ് അംബേദകര്‍ വ്യക്തമാക്കിയത്.

ഗവര്‍ണര്‍മാര്‍ പ്രസംഗം എഡിറ്റ് ചെയ്യുകയോ ഇല്ലാതാക്കുകയോ ചെയ്യുന്നത് ഒരു ഭരണഘടനാ പ്രതിസന്ധി സൃഷ്ടിച്ചേക്കാം. ഗവര്‍ണറുടെ പ്രസംഗത്തെക്കുറിച്ചുള്ള ചര്‍ച്ചയുടെ അവസാനത്തില്‍ മുഖ്യമന്ത്രി പ്രസംഗത്തെ പ്രതിരോധിക്കാന്‍ വിസമ്മതിച്ചേക്കാം, മുഖ്യമന്ത്രിക്ക് ഭൂരിപക്ഷം ലഭിച്ചാല്‍ ഗവര്‍ണറുടെ പ്രസംഗത്തെക്കുറിച്ചുള്ള പ്രമേയം സഭ നിരസിച്ചേക്കാം. ഇത്തരമൊരു സ്ഥിതിയാണ് തമിഴ്‌നാട് നിയമസഭയില്‍ ഉണ്ടായത്. ഗവര്‍ണര്‍ നയിക്കുന്നു, പക്ഷേ ഭരിക്കുന്നില്ല. സമര്‍ത്ഥനായ ഒരു ഉപദേഷ്ടാവ് എന്ന നിലയിലുള്ള തന്റെ പ്രധാന പങ്ക് ‘ആലോചിക്കപ്പെടുകയും മുന്നറിയിപ്പ് നല്‍കുകയും പ്രോത്സാഹിപ്പിക്കുകയും ചെയ്യുക’ എന്നതാണ് ഗവര്‍ണര്‍മാര്‍ക്ക് പ്രധാനമായും ചെയ്യാനുളളത്. ഗവര്‍ണര്‍മാരും മുഖ്യമന്ത്രിമാരും, ഭരണഘടനാ ഉദ്യോഗസ്ഥര്‍ എന്ന നിലയില്‍, പരസ്പരം ബഹുമാനിക്കുകയും നല്ല പ്രവര്‍ത്തന ബന്ധത്തില്‍ ഏര്‍പ്പെടുകയും ചെയ്യേണ്ടത് ഭരണത്തിന്റെ സുഗമമവും ക്രിയാത്മകവും ആയ മുന്നോട്ടു പോക്കിന് അത്യാവശ്യമാണ്. അല്ലെങ്കില്‍ അത് ഫെഡറല്‍ വ്യവസ്ഥയ്ക്ക് ഉയര്‍ത്തുന്ന വെല്ലുവിളികള്‍ വലുതായിരിക്കും.

ഇന്ത്യയും അതിന്‍റെ ഒരു ഫെഡറല്‍ യൂണിറ്റായ കേരളവുമെല്ലാം ജനാധിപത്യ സംവിധാനം നിലനില്‍ക്കുന്ന രാജ്യവും സംസ്ഥാനവുമാണ്. ലിഖിത ഭരണഘടനയുള്ള രാജ്യം. ഫെഡറലിസത്തിലധിഷ്ഠിതമായ യൂണിയന്‍ സ്റ്റേറ്റാണ് ഇന്ത്യ. ഇന്ത്യയുടെ ഭരണഘടന അനുസരിച്ചാണ് സര്‍ക്കാരുകള്‍ പ്രവര്‍ത്തിക്കുന്നത്. ഇന്ത്യയെപ്പോലെ ഒരു വലിയ രാജ്യത്ത്, വംശപരവും ഭാഷാപരവും മതപരവുമായ ബാഹുല്യം കൊണ്ട് സങ്കീര്‍ണമായ ഭരണഘടനാ പ്രശ്‌നങ്ങള്‍ പരിഹരിക്കപ്പെടുന്നതിന് ഏറ്റവും യോജിച്ച മാര്‍ഗമായിരുന്നു ഫെഡറല്‍ സമ്പ്രദായം. ആധുനിക ഭരണഘടനാ തത്ത്വങ്ങളില്‍ ഏറ്റവും പ്രധാനപ്പെട്ട ഒന്നാണ് ഫെഡറല്‍ സമ്പ്രദായം. ഫെഡറല്‍ സമ്പ്രദായത്തിന്റെ അടിസ്ഥാന ലക്ഷ്യം വൈവിധ്യത്തില്‍ ഏകത്വവും അധികാരങ്ങളുടെ ക്ലിപ്തതയും ഭരണത്തിന്‍റെ വികേന്ദ്രീകരണവുമാണ്. ഇവിടെയാണ് ഗവര്‍ണര്‍മാരുടെ ഇടപെടലുകളിലൂടെ ഫെഡറലിസത്തിന്റെ കടയ്ക്കല്‍ കേന്ദ്രം കത്തി വെക്കുന്നു എന്ന വാദം പ്രസക്തമാകുന്നത്. ബിജെപിക്കും ഇത്തരത്തില്‍ ഗവര്‍ണറുമായി ഏറ്റുമുട്ടിയ ചരിത്രമുണ്ട്, 2011 ല്‍ ലോകായുക്ത നിയമനവുമായി ബന്ധപ്പെട്ടാണ് ഗവര്‍ണര്‍ കമലാ ബെനിവാളും ബിജെപി സര്‍ക്കാരും തമ്മിലുള്ള തര്‍ക്കം തുടങ്ങുന്നത്. സ്വന്തം നിലയില്‍ ലോകായുക്തയെ നിയമിച്ച ഗവര്‍ണറുടെ നടപടി മുഖ്യമന്ത്രിയായിരുന്ന നരേന്ദ്ര മോദി തള്ളി. ലോകായുക്തയെ നിയമിക്കാനുള്ള നിലവിലെ നിയമത്തിലെ വ്യവസ്ഥകള്‍ നിയമസഭ ഭേദഗതി ചെയ്തു. ബെനിവാള്‍ ബില്ലില്‍ ഒപ്പിട്ടില്ല. രണ്ട് ലക്ഷം ജനങ്ങളെ പങ്കെടുപ്പിച്ച റാലിയാണ് മോദി അക്കാലത്ത് ഗവര്‍ണര്‍ക്കെതിരെ ഗുജറാത്തില്‍ സംഘടിപ്പിച്ചത്. ലോകായുക്തയെ നിയമിക്കാനുള്ള അധികാരം മുഖ്യമന്ത്രിലേക്ക് എത്തിക്കുന്നതായിരുന്നു ബില്‍. ഓംബുഡ്സ്മാനെ നിയമിക്കാനുള്ള ഗവര്‍ണറുടെയും ഹൈക്കോടതി ചീഫ് ജസ്റ്റിസിന്‍റെയും അധികാരം അവസാനിപ്പിക്കാനുള്ള ഭേദഗതിയും ബില്ലില്‍ ഉണ്ടായിരുന്നു.

അന്ന് മുഖ്യമന്ത്രിയായിരുന്ന മോദി പറഞ്ഞതിങ്ങനെ… “ഗവര്‍ണര്‍ സംസ്ഥാന സര്‍ക്കാരിന്റെ ഭരണകാര്യങ്ങളില്‍ ഇടപെടുകയാണ്. ഭരണഘടന ആര്‍ട്ടിക്കിള്‍ 164 പ്രകാരം മന്ത്രിസഭയുടെ ഉപദേശ നിര്‍ദേശങ്ങള്‍ പാലിക്കുക മാത്രമാണ് ഗവര്‍ണറുടെ കടമ.” അതേ മോദി തന്നെയാണ് ഇപ്പോള്‍ ബിജെപി ഇതര സംസ്ഥാനങ്ങളില്‍ ഗവര്‍ണര്‍മാരെ കളിപ്പാവയായി ഉപയോഗിക്കുന്നത്. ആര്‍ എസ് എസ് സംഘപരിവാര്‍ ആശയങ്ങള്‍ എക്കാലത്തും ഫെഡറലിസത്തിനും ഭരണഘടനയ്ക്കും എതിരായിരുന്നുവെന്ന് തിരിച്ചറിവിലൂടെ വേണം വിഷയം പരിശോധിക്കാന്‍. മതനിരപേക്ഷതയേയും ജനാധിപത്യത്തേയും ഇന്ത്യയുടെ ഫെഡറല്‍ സമ്പ്രദായത്തെയും ഇല്ലാതാക്കി ഹിന്ദുത്വമെന്ന ഏകാത്മകതയിലേക്ക് രാജ്യത്തെ പരിവര്‍ത്തിപ്പിച്ചെടുക്കാനുള്ള നീക്കമാണ് നടക്കുന്നത് എന്ന് ചുരുക്കം. 2025ല്‍ ആര്‍ എസ് എസിന്‍റെ 100ാം വാര്‍ഷികം ആഘോഷിക്കാന്‍ ഒരുങ്ങുമ്പോള്‍ ഇന്ത്യ എന്നത് വൈവിധ്യങ്ങളുടെ രാജ്യമെന്ന നമ്മുടെ അഭിമാനം നിലനില്‍ക്കുമോ എന്നും കണ്ടറിയണം.

വിദേശ സര്‍വകലാശാലകള്‍ ഇന്ത്യയില്‍ വന്നാല്‍ – ഗുണവും ദോഷവും

0
Reading Time: 3 minutes

വിദേശ സര്‍വകലാശാലകള്‍ക്കും വിദ്യാഭ്യാസ സ്ഥാപനങ്ങള്‍ക്കും ഇന്ത്യയില്‍ കാമ്പസുകള്‍ സ്ഥാപിക്കാന്‍ ഉടന്‍ അനുമതി ലഭിച്ചേക്കും. യൂണിവേഴ്സിറ്റി ഗ്രാന്റ്‌സ് കമ്മീഷന്‍ (യുജിസി) ഇതിനനുസരിച്ച് (Setting up and Operation of Campuses of Foreign Higher Educational Institutions in India Regulations 2023) കരട് ചട്ടങ്ങള്‍ പുറത്തിറക്കി. ഇത് സംബന്ധിച്ച് ആശകളും ആശങ്കകളും നിരവധിയാണ്.

ഒരു ആഗോള വിദ്യാഭ്യാസ കേന്ദ്രമായി ഇന്ത്യയെ പ്രോത്സാഹിപ്പിക്കുക എന്നതിലൂടെ വിദേശ വിനിമയ നഷ്ടം ലാഭിക്കുക എന്നതാണ് പ്രധാന ലക്ഷ്യം. ചൈനീസ് വിദ്യാര്‍ത്ഥികള്‍ കഴിഞ്ഞാല്‍, യുഎസ്, യുകെ, ഓസ്ട്രേലിയ തുടങ്ങിയ രാജ്യങ്ങളിലെ വിദേശ വിദ്യാര്‍ത്ഥികളുടെ ഏറ്റവും വലിയ വിഭാഗം ഇന്ത്യക്കാരാണ്. വിദേശകാര്യ മന്ത്രാലയത്തിന്റെ കണക്കുകള്‍ പ്രകാരം 2022ല്‍ ഏകദേശം 13 ലക്ഷം വിദ്യാര്‍ത്ഥികള്‍ വിദേശത്ത് പഠിക്കുന്നുണ്ട്, ആര്‍ബിഐയുടെ കണക്കനുസരിച്ച്, 2021-2022 സാമ്പത്തിക വര്‍ഷത്തില്‍ വിദ്യാര്‍ത്ഥികള്‍ വിദേശത്തേക്ക് പോയത് മൂലം 5 ബില്യണ്‍ രൂപയുടെ വിദേശനാണ്യം നഷ്ടപ്പെട്ടുവെന്നാണ് പറയുന്നത്. നാലര ലക്ഷത്തിലേറേ ഇന്ത്യന്‍ വിദ്യാര്‍ത്ഥികളാണ് 2021ല്‍ മാത്രം വിദേശ രാജ്യങ്ങളില്‍ ഉപരി പഠനത്തിന് പോയത്. 2800 മുതല്‍ 3000 കോടി ഡോളര്‍ വരെ ഇതിലൂടെ രാജ്യത്തിന് പുറത്തേക്ക് പോയെന്നാണ് കണക്ക്. വിദേശ സര്‍വകലാശാലകള്‍ രാജ്യത്തേക്ക് വരുമ്പോള്‍ പുറത്ത് പോയി പഠിക്കാന്‍ സാമ്പത്തിക ശേഷിയില്ലാത്ത് വിദ്യാര്‍ത്ഥികള്‍ക്കും മികച്ച ഉപരി പഠനം സാധ്യമാകുമെന്നാണ് യുജിസിയുടെ വിലയിരുത്തല്‍.

students

രാജ്യത്തെ ഉന്നത വിദ്യാഭ്യാസ മേഖല സംബന്ധിച്ച ഏറ്റവും നിര്‍ണ്ണായകമായ തീരുമാനങ്ങളില്‍ ഒന്ന് നടപ്പിലാക്കാനൊരുങ്ങുമ്പോള്‍ അത് സംബന്ധിച്ച് പ്രായോഗികത മുതല്‍ പുറംതള്ളല്‍ വരെ നിരവധി വിഷയങ്ങള്‍ ചര്‍ച്ചയാകുന്നുണ്ട്. ഇന്ത്യയിലെ എത്ര വിദ്യാര്‍ഥികള്‍ക്ക് വിദേശ കാമ്പസുകളിലെ ഈ സ്ഥാപനങ്ങളില്‍ പഠിക്കാനും ഉന്നത നിലവാരമുളള വിദ്യ അഭ്യസിക്കാനും കഴിയും എന്നത് പ്രസക്തമായ ചോദ്യമാണ്. ഇത്തരം കാമ്പസുകളില്‍ വിദേശ വിദ്യാര്‍ഥികളെ പ്രവേശിപ്പിക്കുന്നതിന് യാതൊരു വിലക്കും ഏര്‍പ്പെടുത്തിയിട്ടില്ല. ഇന്ത്യയിലെ പൊതു വിദ്യാഭ്യാസ മേഖലയിലെ മികച്ച അധ്യാപകര്‍ ഈ വിദേശ കാമ്പസുകളിലേക്ക് മാറാനും സാധ്യതയുണ്ട്, ഇത് നമ്മുടെ പൊതു വിദ്യാഭ്യാസ മേഖലയില്‍ മികച്ച അധ്യാപകരുടെ കുറവിലേക്ക് നയിക്കപ്പെട്ടേക്കാം. വിദേശ സ്ഥാപനങ്ങളുടെ വരവ് രാജ്യത്തെ സാമ്പത്തികമായി മേല്‍തട്ടിലുളള ഒരു ചെറിയ വിഭാഗത്തിന് മാത്രമാണ് പ്രയോജനപ്പെടുകയെന്ന വിമര്‍ശനവും ശ്രദ്ധേയമാകുന്നത് ഈ സാഹചര്യത്തിലാണ്. പ്രായോഗികത സംബന്ധിച്ച് ഉയരുന്ന മറ്റൊരു സംശയം വര്‍ഷം തോറും പോകുന്ന മിക്കവാറും പേര്‍ വിദേശത്തു പോകുന്നതു ഡിഗ്രി സമ്പാദിക്കാന്‍ മാത്രമല്ല. മറിച്ച്, ലഭ്യമായ തൊഴിലവസരങ്ങള്‍ പ്രയോജനപ്പെടുത്തി അവിടെത്തന്നെ ജീവിതം കരുപ്പിടിപ്പിക്കാനാണ്.

യുപിഎ ഭരണകാലത്ത് ഇതുസംബന്ധിച്ച നിര്‍ദേശങ്ങള്‍ കൊണ്ടുവന്നപ്പോള്‍ ഉപഗ്രഹ കാമ്പസുകളില്‍ നിന്ന് ലഭിക്കുന്ന പണം മാതൃസ്ഥാപനത്തിലേക്ക് അയയ്ക്കുന്നതിന് വിലക്കുണ്ടായിരുന്നു. 2010ല്‍ യുപിഎ രണ്ടാം സര്‍ക്കാര്‍ വിദേശ വിദ്യാഭ്യാസ സ്ഥാപന ബില്‍ കൊണ്ടുവന്നിരുന്നു, എന്നാല്‍ ബിജെപിയും സമാജ് വാദി പാര്‍ട്ടിയും ഇടത് പാര്‍ട്ടികളും എതിര്‍ത്തതിനാല്‍ പാസാക്കപ്പെട്ടില്ല. ഇപ്പോള്‍ പുറപ്പെടുവിച്ച മാര്‍ഗരേഖയില്‍ ഇതു എടുത്തു കളഞ്ഞിരിക്കുകയാണ്. പാര്‍ലമെന്റില്‍ ചര്‍ച്ച ചെയ്യേണ്ട വിഷയം യുജിസി വഴി നടപ്പാക്കിയിരിക്കുകയാണെന്നും വിമര്‍ശനമുണ്ട്. വിദ്യാഭ്യാസ രംഗത്തെ മാറ്റങ്ങള്‍ക്ക് അടിസ്ഥാനം രാഷ്ട്രീയ നേട്ടങ്ങളാണോ സാമ്പത്തിക ലക്ഷ്യങ്ങളാണോ എന്ന ചോദ്യവും ഉന്നയിക്കപ്പെടുന്നുണ്ട്.

students

ഏറ്റവും മികച്ച 500 ആഗോള റാങ്കിംഗില്‍ ഉള്‍പ്പെടുന്ന വിദേശ സര്‍വ്വകലാശാലയ്ക്ക് ഇന്ത്യയില്‍ കാമ്പസ് സ്ഥാപിക്കുന്നതിന് അപേക്ഷിക്കാമെന്നാണ് യുജിസി നിര്‍ദേശമുളളത്. ഈ കാമ്പസിന് അവരുടെ സ്വന്തം പ്രവേശന പ്രക്രിയയും ആഭ്യന്തര, വിദേശ വിദ്യാര്‍ത്ഥികളെ പ്രവേശിപ്പിക്കുന്നതിനുള്ള മാനദണ്ഡവും വികസിപ്പിക്കാന്‍ സാധിക്കുന്നതാണ്. ഇവര്‍ക്ക് ഫീസ് ഘടന തീരുമാനിക്കാനുള്ള സ്വയംഭരണാധികാരം ഉണ്ടായിരിക്കുമെന്ന നിര്‍ദേശം പ്രത്യേകം ശ്രദ്ധിക്കേണ്ടതുണ്ട്. ഇന്ത്യയിലും വിദേശത്തുമുള്ള ഫാക്കല്‍റ്റികളെയും സ്റ്റാഫിനെയും റിക്രൂട്ട് ചെയ്യുന്നതിനുള്ള സ്വയംഭരണാധികാരം ഇത്തരം സ്ഥാപനങ്ങള്‍ക്ക് ഉണ്ടായിരിക്കുന്നതാണ്. യുജിസി നിയന്ത്രണങ്ങള്‍ക്കും ചട്ടങ്ങള്‍ക്കും വിധേയമായാകും അവ പ്രവര്‍ത്തിക്കുക. ഏഴു പേജുള്ള കരടുരേഖയില്‍ വിദേശ സര്‍വകലാശാലകളെ ഇന്ത്യയിലേക്കു സ്വാഗതം ചെയ്യുക എന്ന ലക്ഷ്യത്തിനപ്പുറം മറ്റ് വിശദാംശങ്ങളില്ല. വിദേശത്തു പ്രവര്‍ത്തിക്കുന്ന ഇന്ത്യക്കാരായ ഒരു വിഭാഗം അധ്യാപകരെയും ഗവേഷകരെയും ഈ സര്‍വകലാശാലകള്‍ ആകര്‍ഷിച്ചേക്കാം. ഒപ്പം ഇന്ത്യയില്‍നിന്നും വിദേശത്തുനിന്നും പിഎച്ച്ഡി നേടിയ ചെറുപ്പക്കാര്‍ക്കും തൊഴില്‍ അവസരങ്ങളുണ്ടാകും. അനധ്യാപക തൊഴിലവസരങ്ങള്‍ പൂര്‍ണമായും ഇന്ത്യക്കാര്‍ക്കു തന്നെയാകും ലഭിക്കുക എന്നാണ് ഔദ്യേഗിക ഭാഷ്യം.

വിദേശ സര്‍വകലാശാലാ ഡിഗ്രികള്‍ രാജ്യത്ത് തൊഴില്‍ മേഖലയിലും മറ്റും എന്തു മാറ്റങ്ങളാണ് ഉണ്ടാക്കുക എന്നതിനെക്കുറിച്ചും പരാമര്‍ശമില്ല. രാജ്യത്തെ വിദ്യാഭ്യാസമേഖലയില്‍, മൊത്തം ആഭ്യന്തര ഉല്‍പാദനത്തിന്റെ 6% ചെലവിടാനാണ് 1968ലെ ദേശീയ വിദ്യാഭ്യാസനയം ലക്ഷ്യമിട്ടത്. എന്നാല്‍, പതിറ്റാണ്ടുകള്‍ കഴിഞ്ഞിട്ടും ഇത് ഏകദേശം മൂന്നു ശതമാനത്തിനു മുകളില്‍ മാത്രമാണെന്നത് ഒരു പാളിച്ചയായി 2020ലെ ദേശീയ വിദ്യാഭ്യാസനയ രേഖയില്‍ എടുത്തുപറയുന്നുണ്ട്. ഓര്‍ഗനൈസേഷന്‍ ഫോര്‍ ഇക്കണോമിക് കോര്‍പ്പറേഷന്‍ ആന്‍ഡ് ഡവലപ്‌മെന്റ് രാജ്യങ്ങളില്‍ ശരാശരി 11 ശതമാനത്തോളമാണ് വിദ്യാഭ്യാസത്തിനു ചെലവാക്കുന്നത്. ഈ നയം ഇന്ത്യന്‍ ഉന്നത വിദ്യാഭ്യാസ മേഖലയെ തകര്‍ക്കുന്നതിനും വാണിജ്യവത്കരണം ശക്തിപ്പെടുത്തുന്നതിനും മാത്രമേ ഇടയാക്കൂ എന്നാണ് വിമര്‍ശനം. വിദ്യാഭ്യാസം ചെലവേറിയതാകുകയും ദളിതര്‍, ആദിവാസികള്‍ ന്യൂനപക്ഷ വിഭാഗങ്ങള്‍ എന്നിവരെ ദോഷകരമായി ബാധിക്കുകയും ചെയ്യും. സംവരണം, സാമുഹ്യ നീതി എന്നിവയെല്ലാം പുതിയ തീരുമാനത്തിലൂടെ തകര്‍ക്കപ്പെടും എന്ന ആരോപണത്തിന് ബലം കൂടുന്നത് ഈ പശ്ചാത്തലത്തിലാണ്.

മലയാളി തിരിച്ചറിയാതെ പോയ സാറ അബൂബക്കര്‍

0
Reading Time: 3 minutes

 

ജന്മം കൊണ്ടും എഴുത്ത് കൊണ്ടും പൂര്‍ണ മലയാളി ആയിരുന്നിട്ടും കേരളത്തില്‍ വേണ്ടവിധത്തില്‍ അറിയപ്പെടാതെ പോയ സാഹിത്യകാരിയാണ് കഴിഞ്ഞ ദിവസം നമ്മളെ വിട്ടുപിരിഞ്ഞ സാറാ അബൂബക്കര്‍. കന്നടയില്‍ എഴുത്തിന്റെ വഴിവെട്ടിയ ധീരയായ മുസ്ലിം വനിത എന്നറിയപ്പെട്ടിരുന്ന സാറ തികഞ്ഞ ഒരു സ്ത്രീവിമോചക പ്രവര്‍ത്തകയായിരുന്നു. മലയാളി ആയിരുന്നിട്ടും കന്നഡ എഴുത്തുകാരി ആയാണ് സാറ അറിയപ്പെട്ടിരുന്നത്. സ്ത്രീകള്‍, പ്രത്യേകിച്ചും മുസ്ലിം സമുദായത്തില്‍പ്പെട്ടവര്‍ എഴുത്തിലേക്ക് രംഗപ്രവേശനം ചെയ്യാന്‍ മടിച്ചിരുന്ന കാലത്താണ് കാസര്‍ഗോഡ് ഒരു സാധാരണ ഗ്രാമത്തില്‍ ജനിച്ച സാറാ അബൂബക്കര്‍ തന്റെ വ്യത്യസ്തമായ രചനാവൈഭവം കൊണ്ട് കന്നഡ സാഹിത്യത്തെ സമ്പുഷ്ടമാക്കിയത്.

കൊല്ലപ്പെട്ട മാധ്യമ പ്രവര്‍ത്തക ഗൗരി ലങ്കേഷുമായി അടുത്ത ബന്ധം പുലര്‍ത്തിയ സാറാ, ഗൗരിയുടെ ലങ്കേഷ് പത്രികയിലൂടെയായിരുന്നു ശ്രദ്ധേയയായ എഴുത്തുകാരിയായത്. വിവര്‍ത്തകയും നോവലിസ്റ്റും ചെറുകഥാകൃത്തുമായ അവര്‍ ഒട്ടേറെ പ്രമുഖ മലയാളം കൃതികള്‍ കന്നടയിലേക്ക് വിവര്‍ത്തനം ചെയ്തിട്ടുണ്ട്. എഴുത്തില്‍ ആരുടെയും ചേരികളില്‍പെടാതെ സ്വന്തമായ ഇടം കണ്ടെത്തി ധീരമായി സാഹിത്യ ജീവിതം നയിച്ച എഴുത്തുകാരിയായിരുന്നു സാറാ അബൂബക്കര്‍.

ലങ്കേഷ് പത്രികയില്‍ എഴുതിയ ‘മുസ്ലിം മഹിളെ ശാലകെ ഹോതതു’ പരമ്പരയ്ക്ക് വന്‍ സ്വീകാര്യത ലഭിച്ചു. 1981ല്‍ രചിച്ച ‘ചന്ദ്രഗിരിയ തീറദല്ലി’ (ചന്ദ്രഗിരിയുടെ തീരത്ത്) നോവലിന് കര്‍ണാടക സര്‍ക്കാരിന്റെയടക്കം നിരവധി പുരസ്‌കാരങ്ങള്‍ ലഭിച്ചു. നോവലിന്റെ ആദ്യഭാഗങ്ങള്‍ ലങ്കേഷ് പത്രികയില്‍ വന്നതോടെ മതമൗലിക വാദികളില്‍ നിന്നും കടുത്ത എതിര്‍പ്പ് നേരിടുകയുണ്ടായി. തുടര്‍ച്ചയായി വിദ്വേഷ പ്രചരണങ്ങള്‍ വന്നതോടെ മാനനഷ്ടക്കേസ് ഫയല്‍ ചെയ്ത് നിയമപോരാട്ടം നടത്തി വിജയിച്ചിട്ടുണ്ട് സാറ. ഈ പോരാട്ടങ്ങള്‍ക്ക് സാറയും ഒപ്പം ഗൗരി ലങ്കേഷും കാണിച്ച ധൈര്യവും നിലപാടുകളും നോവലിനെ വല്ലാത്തൊരു രാഷ്ട്രീയ, സാമൂഹിക പശ്ചാത്തലത്തിലേക്ക് നയിച്ചു.

ഗൗരി കൊല്ലപ്പെട്ടപ്പോള്‍ സാറ ശക്തമായ പ്രതിഷേധക്കുറിപ്പുകളിറക്കി. ‘ശബ്ദിക്കുന്നവരെ ആര്‍ക്കാണ് പേടി, വിഷലിപ്തമായ വര്‍ഗീയതയ്‌ക്കെതിരേ ഉറക്കെ പറഞ്ഞവളാണ് ഗൗരി. ആ ശബ്ദം ഭയപ്പെട്ടവര്‍ അവളെ ഇല്ലാതാക്കി’, സാറ കുറിച്ചു. മതമൗലികവാദികളുടെ ശത്രുപക്ഷത്തായ സാറയ്ക്കുനേരെ നിരവധി ആക്രമണങ്ങളുണ്ടായി. 1985ല്‍ പുത്തൂരില്‍ സാഹിത്യ സമ്മേളനത്തില്‍വച്ച് സാറ ആക്രമിക്കപ്പെട്ടു. ദക്ഷിണ കന്നടയില്‍ സംഘപരിവാറിന്റെ ഭിന്നിപ്പിക്കല്‍ ശ്രമങ്ങള്‍ക്കെതിരായ ഇടതുപക്ഷ പ്രസ്ഥാനങ്ങളുടെ പോരാട്ടത്തിലും അവര്‍ ഭാഗമായി. ചന്ദ്രഗിരി പ്രകാശന എന്ന പേരില്‍ സ്വന്തമായി ഒരു പ്രസാധക സംരഭം നടത്തി, കര്‍ണാടക റൈറ്റേഴ്സ് ആന്‍ഡ് റീഡേഴ്സ് അസോസിയേഷന്‍ എന്ന കൂട്ടായ്മയ്ക്ക് നേതൃത്വം നല്‍കി. സ്ത്രീപക്ഷ പോരാട്ടവേദിയായ കരാവലി ലേഖിയകര വാചകീയകര സംഘത്തിന്റെ അധ്യക്ഷയായി രണ്ടുതവണ പ്രവര്‍ത്തിച്ചു.

കര്‍ണാടക സാഹിത്യ അക്കാദമി അവാര്‍ഡ്, അനുപമ നിരഞ്ചന അവാര്‍ഡ്, ഭാഷാ സമ്മാന്‍, കന്നട രാജ്യോത്സവ അവാര്‍ഡ്, രത്നമ്മ ഹെഗ്ഡെ മഹിളാ സാഹിത്യ അവാര്‍ഡ്, ദാന ചിന്താമണി ആട്ടി മബ്ബെ അവാര്‍ഡ്, സാഹിത്യ സമഗ്ര സംഭാവനക്കുള്ള ഹംപി സര്‍വകലാശാല നഡോജ പുരസ്‌കാരം എന്നിങ്ങനെ ഒട്ടേറെ പുരസ്‌കാരങ്ങള്‍ ലഭിച്ച സാറക്ക് മംഗളുരു സര്‍വകലാശാല ഡോക്ടറേറ്റും നല്‍കി ആദരിച്ചിരുന്നു.

ചന്ദ്രഗിരിയ തീരതല്ലി (1981), സഹന (1985), വജ്രഗളു (1988), കദന വിരാമ (1991), സുളിയല്ലി സിക്കവരു (1994) തല ഒഡേഡ ധോനിയല്ലി (1997), പഞ്ചറ (2004) എന്നീ നോവലുകളും ചപ്പാലിഗളു, പായന, അര്‍ധരാത്രിയല്ലി ഹുട്ടിട കൂസു, കെദ്ദാ, സുമയ, ഗണസാക്ഷി എന്നീ ചെറുകഥകളും രചിച്ചിട്ടുള്ള സാറ, കമലാദാസിന്റെ ‘മനോമി’, ബി എം സുഹറയുടെ ‘ബലി’, പി കെ. ബാലകൃഷ്ണന്റെ ‘ഇനി ഞാനുറങ്ങട്ടെ’, ഖദീജ മുംതാസിന്റെ ‘ബര്‍സ’, ആര്‍ ബി ശ്രീകുമാര്‍ ഗുജറാത്ത് വംശഹത്യയെക്കുറിച്ച് എഴുതിയ ‘ഗുജറാത്ത് ബിഹൈന്‍ഡ് കര്‍ട്ടന്‍’, ഈച്ചരവാര്യരുടെ ‘ഒരച്ഛന്റെ ഓര്‍മക്കുറിപ്പുകള്‍’ തുടങ്ങിയ കൃതികള്‍ കന്നടയിലേക്ക് വിവര്‍ത്തനം ചെയ്തിട്ടുണ്ട്.

1936 ജൂണ്‍ 30ന് പ്രമുഖ അഭിഭാഷകനായിരുന്ന ഫോര്‍ട്ട് റോഡ് തെരുവത്ത് കുന്നില്‍ പുതിയ പുരയില്‍ അഹമ്മദിന്റെയും സൈനബിയുടെയും ആറുമക്കളില്‍ ഏക മകളായാണ് ജനനം. കാസര്‍കോട് ചെമ്മനാട് സ്‌കൂളില്‍ മലയാളം പഠിച്ച് തുടക്കം. നാലാം ക്ലാസു മുതല്‍ കന്നട മീഡിയത്തിലേക്ക്. തുടര്‍ന്ന് കാസര്‍കോട് മലയാളം പഠിക്കാന്‍ സൗകര്യമില്ലാത്തതിനാല്‍ കന്നടയിലേക്ക് മാറി. സാറ കര്‍ണാടകത്തില്‍ മെട്രിക്കുലേഷന്‍ പാസായ ആദ്യ മുസ്ലിം പെണ്‍കുട്ടിയായി. കര്‍ണാടക ഹൗസിങ് ബോര്‍ഡില്‍ എക്‌സിക്യൂട്ടീവ് എഞ്ചിനിയറായിരുന്ന പരേതനായ അബൂബക്കറാണ് ഭര്‍ത്താവ്. നാല് ആണ്‍മക്കള്‍ക്കൊപ്പം മംഗളൂരു ലാല്‍ബാഗിലെ വീട്ടിലായിരുന്നു താമസം.