Daily Archives: 19th March 2020
ഫുട്ബോൾ ലോകം കൊവിഡ് 19 ഭീഷണിയിൽ തുടരുമ്പോൾ മാഞ്ചസ്റ്റർ യുണൈറ്റഡിലെ മുഴുവൻ താരങ്ങൾക്കും ഒഫീഷ്യൽസിനും രോഗ ബാധയില്ലെന്ന് സ്ഥിരീകരണം. യുണൈറ്റഡിന്‍റെ പരിശീലനം ഇപ്പോൾ നിർത്തിവെച്ചിരിക്കുകയാണ്. താരങ്ങളോട് വീട്ടിൽ ഫിറ്റ്നസ് പരിശീലനം നടത്താനാണ് ടീം മാനേജ്മെന്‍റ് നിർദ്ദേശം നൽകിയിരിക്കുന്നത്.
വാഷിംഗ്‌ടൺ:
അമേരിക്കൻ പ്രസിഡന്റ് തെരഞ്ഞെടുപ്പിലെ ഡെമോക്രാറ്റിക് സ്ഥാനാര്‍ത്ഥിയാകാനുള്ള മത്സരത്തില്‍ ജോ ബൈഡന് വലിയ മുന്നേറ്റം. ബേണി സാന്‍ഡേഴ്‌സിനെ വലിയ ഭൂരിപക്ഷത്തിൽ തോൽപ്പിച്ചാണ് ബൈഡൻ മുന്നേറിയത്. ഇതോടെ നവംബറില്‍ നടക്കുന്ന തിരഞ്ഞെടുപ്പിൽ ഡോണള്‍ഡ് ട്രംപിന്റെ എതിരാളി ബൈഡനാകുമെന്ന് ഉറപ്പായി.
ജിദ്ദ:
കൊറോണ വ്യാപനത്തെ തുടർന്ന് ജിദ്ദയിൽ കുടുങ്ങിയ മലയാളികൾ ഉൾപ്പെടെയുള്ള ഉംറ തീർത്ഥാടക സംഘത്തെ തിരികെ നാട്ടിലെത്തിച്ചതായി ഇന്ത്യൻ കോൺസുലേറ്റ് അറിയിച്ചു. ഇതോടെ ഉംറക്കെത്തി ജിദ്ദയിൽ കുടുങ്ങിയ അവസാന ഇന്ത്യൻ സംഘവും തിരികെയെത്തി. അതേസമയം, ഫിലിപ്പീൻസിൽ കുടുങ്ങിയ മലയാളി മെഡിക്കൽ വിദ്യാർത്ഥികളെ തിരികെയെത്തിക്കാനായി ഇന്ത്യൻ എംബസി വിവരശേഖരണം തുടങ്ങി.എന്നാൽ യുഎഇയിൽ താമസവിസക്കാർക്ക് ഇന്ന് ഉച്ചയ്ക്ക് പന്ത്രണ്ട് മണി മുതൽ പ്രവേശന വിലക്ക് ഏർപ്പെടുത്തി. അവധിക്കായി നാട്ടിലെത്തിയ പ്രവാസികള്‍ക്ക് ഇന്നുമുതല്‍ യുഎഇയിൽ...
ലോകത്ത് കൊവിഡ് ബാധിച്ച് മരിച്ചവരുടെ എണ്ണം 8,944 ആയി ഉയർന്നു. ഇറ്റലിയിൽ ഇന്നലെ മാത്രം 475 പേരാണ് മരിച്ചത്. ഇതോടെ, ഇറ്റലിയിൽ ആകെ മരണം 2978 ആയി. ഇറാനിൽ 147ഉം സ്പെയിനിൽ 105ഉം പേർ ഒരുദിവസത്തിനുള്ളിൽ മരിച്ചു. ബ്രിട്ടണിൽ മരണം നൂറ് കടന്നു. ഇറ്റലിയെയും സ്പെയ്നെയും പിന്തുടർന്ന് ബെൽജിയം, ഗ്രീസ്, പോർച്ചുഗൽ, ചിലി എന്നീ രാജ്യങ്ങളും പൂർണമായി അടച്ചു.
കോഴിക്കോട്:
കോഴിക്കോട് ജില്ലയിൽ ഇന്ന് ഉഷ്ണതരംഗത്തിന് സാധ്യതയുണ്ടെന്ന് കാലാവസ്ഥാ വകുപ്പ് അറിയിച്ചു. സാധാരണ താപനിലയിൽ നിന്ന് 4.5 ഡിഗ്രി സെൽഷ്യസെങ്കിലും ചൂട് കൂടാനുള്ള സാഹചര്യമുള്ളതായാണ് അറിയിച്ചിരിക്കുന്നത്. പുറംജോലികളിൽ ഏർപ്പെടുന്നവരും നഗരങ്ങളിലും റോഡുകളിലുമുള്ളവർ വെയിലേൽക്കുന്ന സാഹചര്യം ഒഴിവാക്കണമെന്ന് സംസ്ഥാന ദുരന്തനിവാരണ അതോറിറ്റിയും നിർദ്ദേശം നൽകിയിട്ടുണ്ട്.
ഭോപ്പാൽ:
മധ്യപ്രദേശിലെ കോൺഗ്രസ്സ് സർക്കാറിന് ഭൂരിപക്ഷം നഷ്ടമായ സാഹചര്യത്തിൽ വിശ്വാസവോട്ട് തേടാൻ നിർദ്ദേശിക്കണമെന്ന് ആവശ്യപ്പെട്ട് ബിജെപി നൽകിയ ഹർജിയിൽ സുപ്രീംകോടതിയിൽ ഇന്ന് വാദം കേൾക്കൽ തുടരും. എംഎൽഎമാരെ ബന്ദിയാക്കിവെച്ചിരിക്കുന്നു എന്നാരോപിച്ച് കോൺഗ്രസ് നൽകിയ ഹർജിയും കോടതിക്ക് മുമ്പിലുണ്ട്. അതേസമയം, എംഎൽഎമാരുടെ രാജിക്കാര്യത്തിൽ സ്പീക്കറോട് ഇന്ന് നിലപാട് അറിയിക്കാൻ കോടതി ആവശ്യപ്പെട്ടിട്ടുണ്ട്.
തൃശൂർ:
കൊവിഡ് ബാധയ്ക്ക് വ്യാജചികിത്സ നൽകിയതിന്‍റെ പേരിൽ വ്യാജവൈദ്യൻ മോഹനൻ വൈദ്യരെ അറസ്റ്റ് ചെയ്തു. കൊവിഡ് 19ന് വ്യാജ ചികിത്സ നടത്തുന്നുവെന്ന രഹസ്യവിവരത്തിന്‍റെ അടിസ്ഥാനത്തിൽ പൊലീസിന്‍റെയും ഡിഎംഒയുടെയും നേതൃത്വത്തിൽ മോഹനൻ വൈദ്യരുടെ ചികിത്സ കേന്ദ്രമായ തൃശൂരിലെ രായിരത്ത് ഹെറിറ്റേജിൽ നടന്ന റെയ്ഡിന് ശേഷമായിരുന്നു അറസ്റ്റ്. ജാമ്യമില്ലാക്കുറ്റം ചുമത്തിയാണ് മോഹനൻ വൈദ്യരെ അറസ്റ്റ് ചെയ്തിരിക്കുന്നത്.
പത്തനംതിട്ട:
കൊവിഡ് 19 നിരീക്ഷണത്തില്‍ കഴിയുന്നവര്‍ സമയപരിധി കഴിയും മുന്‍പേ പുറത്തിറങ്ങിയാല്‍ കര്‍ശന നടപടി സ്വീകരിക്കുമെന്ന് പത്തനംതിട്ട ജില്ലാ കളക്ടര്‍ പിബി നൂഹ് മുന്നറിയിപ്പ് നല്‍കി. കൊവിഡ് 19 വൈറസ് ബാധയെ തടയേണ്ടത് സമൂഹത്തിന്‍റെ കൂട്ടായ ഉത്തരവാദിത്തമാണെന്നും അതു മനസ്സിലാക്കി എല്ലാവരും പ്രവര്‍ത്തിക്കണമെന്നും കളക്ടര്‍ പറഞ്ഞു. അതേസമയം, പത്തനംതിട്ടയിൽ ഇന്നലെ രണ്ട് പേരെ കൂടി ആശുപത്രിയിൽ നിരീക്ഷണത്തിലാക്കി. നിലവിൽ ജില്ലയിൽ 24 പേർ ആശുപത്രിയിലും രണ്ടായിരത്തിലേറെ പേര്‍ വീടുകളിലും നിരീക്ഷണത്തിലുണ്ട്.
തിരുവനന്തപുരം:
കൊവിഡ് 19 പശ്ചാത്തലത്തിലും സംസ്ഥാനത്തെ എസ്എസ്എല്‍സി, ഹയര്‍സെക്കന്‍ഡറി, സർവ്വകലാശാല പരീക്ഷകൾ മാറ്റമില്ലാതെ തുടരുമെന്ന് പൊതുവിദ്യാഭ്യാസ ഡയറക്ടര്‍ അറിയിച്ചു. എന്നാൽ, നിലവിൽ നടക്കുന്ന സിബിഎസ്‍ഇ, സര്‍വ്വകലാശാല പരീക്ഷകള്‍ നിര്‍ത്തിവെക്കാനാണ് കേന്ദ്ര മാനവ വിഭവശേഷി മന്ത്രാലയത്തിന്‍റെ തീരുമാനം. മാർച്ച് 31ന് ശേഷമായിരിക്കും ഈ പരീക്ഷകൾ ഇനി നടത്തുക.
ഡൽഹി:
കൊറോണ വൈറസ് വ്യാപനത്തെക്കുറിച്ചും അതിനെ തടയുന്നതിനുള്ള നീക്കങ്ങളെക്കുറിച്ചും സംസാരിക്കുന്നതിനായി പ്രധാനമന്ത്രി നരേന്ദ്ര മോദി ഇന്ന് രാത്രി എട്ട് മണിക്ക് രാജ്യത്തെ അഭിസംബോധന ചെയ്യും. കൊറോണ വൈറസ് ബാധ നേരിടുന്നതിന് സ്വീകരിച്ചു വരുന്ന നടപടിക്രമങ്ങള്‍ വിലയിരുത്താന്‍ പ്രധാനമന്ത്രിയുടെ അധ്യക്ഷതയില്‍ ഇന്നലെ ഉന്നതതല യോഗവും ചേർന്നിരുന്നു. യോഗത്തിന് ശേഷം വൈറസ് ബാധയെ നേരിടുന്നതിനുള്ള നടപടികള്‍ കൂടുതല്‍ ശക്തിപ്പെടുത്തുമെന്ന് അദ്ദേഹം തന്റെ ട്വീറ്റിലൂടെ പറഞ്ഞു.രാജ്യത്ത് കൊവിഡ് രോഗ ബാധിതരുടെ എണ്ണം 166 ആയതോടെ...