ഓയൂർ:
വെളിനല്ലൂർ പഞ്ചായത്തിലെ ചെറിയ വെളിനല്ലൂർ മുളയറച്ചാലിൽ ചിക്കൻ വേസ്റ്റിൽനിന്ന് മൃഗങ്ങൾക്ക് ആഹാര ഉൽപന്നം നിർമിക്കുന്ന പ്ലാൻറിനെതിരെ പ്രദേശവാസികളുടെ പ്രതിഷേധം ശക്തമായി. പഞ്ചായത്ത് ഭരണസമിതി ഈ മാസം 18ന് ആലോചന യോഗം കൂടി പ്ലാൻറിന് അനുമതി നൽകാൻ തീരുമാനിച്ചിരുന്നു.
എന്നാൽ, ചെറിയ വെളിനല്ലൂരിൽ ജനങ്ങൾ സമരവുമായി രംഗത്തെത്തി. നാട്ടുകാർ ആക്ഷൻ കൗൺസിൽ രൂപവത്കരിക്കുകയും ഭാരവാഹികളെ തെരഞ്ഞെടുക്കുകയും ചെയ്തു. നിർദിഷ്ട പ്ലാൻറിനെതിരെ ചെറിയവെളിനല്ലൂർ ക്രിസ്ത്യൻ പള്ളി പ്രമേയം പാസാക്കുകയും ചെയ്തു.
അനുമതി നൽകാനുള്ള തീരുമാനത്തിൽനിന്ന് പഞ്ചായത്ത് പിന്മാറിയില്ലെങ്കിൽ സമര പരിപാടികൾ ശക്തിപ്പെടുത്താനാണ് നാട്ടുകാരുടെ തീരുമാനം. എന്നാൽ, പ്രതിഷേധക്കാർ കോടതിയെ സമീപിക്കണമെന്നും പഞ്ചായത്തിലെ 17 മെംബർന്മാരും ഐകകണ്ഠ്യേനയാണ് വിഷയം പാസാക്കിയതെന്നും വെളിനല്ലൂർ പഞ്ചായത്ത് പ്രസിഡൻറ് അഡ്വ എം അൻസർ പറഞ്ഞു.
പരാതിയിൽ കഴമ്പുണ്ടെങ്കിൽ പരിശോധിക്കുമെന്നും പ്ലാൻറ് സ്ഥാപിക്കുന്നവർ നിയമപരമായിട്ടാണ് മുന്നോട്ട് പോകുന്നതെന്നും അദ്ദേഹം പറഞ്ഞു. ആക്ഷൻ കൗൺസിൽ യാേഗത്തിൽ ജില്ല പരിസ്ഥിതി സംരക്ഷണ ഏകോപന സമിതി ജനറൽ കൺവീനർ എ എ കബീർ, വെൽഫെയർ പാർട്ടി പ്രതിനിധി അനീഷ്ഖാൻ, മെംബർമാരായ എസ് അമൃത്, പി ആർ സന്തോഷ് എന്നിവർ സംസാരിച്ചു.