പന്തളം രക്തസാക്ഷി ദിനാചരണം ഇന്ന്

പന്തളം:

പന്തളത്തി​ൻെറ മണ്ണിനെ രക്തപങ്കിലമാക്കിയ പൊലീസ് വെടിവെപ്പിന് തിങ്കളാഴ്ച 48 വയസ്സ്. 12 ഔൺസ് റേഷനരി വെട്ടിക്കുറച്ച കെ കരുണാകരൻ സർക്കാറി​ൻെറ നടപടിക്കെതിരെ ഇടതുപക്ഷം നടത്തിയ സമരത്തിനുനേരെയായിരുന്നു പൊലീസ് വെടിവെച്ചത്. സമരനിരയിൽ ഉണ്ടായിരുന്ന ഭാനു, നാരായണപിള്ള എന്നിവർ രക്തസാക്ഷികളായി.

1973 ആഗസ്​റ്റ്​ രണ്ടിനാണ് പന്തളത്ത് പൊലീസി​ൻെറ നരനായാട്ട്​ നടന്നത്​. ഭക്ഷ്യക്ഷാമത്തിനെതിരെയുള്ള പ്രതിഷേധം കേരളമൊട്ടുക്ക് ആളിക്കത്തിയ സമരമായിരുന്നു. ഇടതുപക്ഷത്തി​ൻെറ ശക്തികേന്ദ്രമായിരുന്ന പന്തളത്താണ് അതി​ൻെറ അലയൊലികൾ ശക്തിപ്രാപിച്ചത്.

ഒരാഴ്ച നീണ്ട സമരംകൊണ്ടും ഫലംകാണാതെ വന്നപ്പോഴാണ് ആഗസ്​റ്റ്​ രണ്ടിന് ഇടതുപക്ഷം കേരളത്തിൽ ബന്ദ് പ്രഖ്യാപിച്ചത്. പന്തളത്ത് സമരം അക്രമാസക്തമാകുമെന്ന് മുന്നിൽകണ്ട് നിരോധനാജ്ഞയും പ്രഖ്യാപിച്ചിരുന്നു. തുമ്പമൺ, മുട്ടം, ചേരിക്കൽ തുടങ്ങിയ സ്ഥലങ്ങളിൽനിന്ന്​ ചെറിയ പ്രകടനം പന്തളം ടൗൺ ലക്ഷ്യമാക്കി നീങ്ങി.

എം സി റോഡിൽ മെഡിക്കൽ മിഷൻ ജങ്​ഷന് സമീപം അന്നത്തെ പന്തളം എസ് ഐ ആയിരുന്ന ദാസി​ൻെറ നേതൃത്വത്തിലാണ് പ്രകടനക്കാർക്കുനേരെ വെടിവെച്ചത്​. അരക്കുതാഴെ വെടിയേറ്റ ഭാനുവും നാരായണപിള്ളയും ഉൾപ്പെടെ നാലുപേർ റോഡിൽ പിടഞ്ഞുവീണു. നാലുപേരെയും കട്ടിലിൽ കിടത്തി ചുമന്നാണ് പൊലീസ് സ്​റ്റേഷനു മുന്നിലെത്തിച്ചത്.

ഒന്നാംപ്രതിയായ ടി കെ ദാനിയേലുൾപ്പെടെ അമ്പതിലധികം പ്രവർത്തകർക്കെതിരെ പൊലീസ് കേസെടുത്തു. എല്ലാ വർഷവും ആഗസ്​റ്റ്​ രണ്ടിന് പന്തളത്ത് രക്തസാക്ഷി ദിനാചരണം നടത്തുന്നുണ്ട്.