Reading Time: < 1 minute
ഗുവാഹതി:

അസമിൽ മുസ്​ലിം ഭൂരിപക്ഷ പ്രദേശങ്ങൾ വരുതിയിലാക്കാൻ ലക്ഷ്യമിട്ട്​ ഇറക്കിയ എട്ട്​ മുസ്​ലിം സ്​ഥാനാർത്ഥികളും സംപൂജ്യരായതോടെ സംസ്​ഥാനത്ത്​ തുടങ്ങിയ എല്ലാ ന്യൂനപക്ഷ മോർച്ച യൂനിറ്റുകളും പിരിച്ചുവിട്ട്​ ബിജെപി. 126 അംഗ സഭയിൽ ഇത്തവണയും അധികാരം നിലനിർത്താനായെങ്കിലും മുസ്​ലിം പ്രാതിനിധ്യം ഉറപ്പാക്കാനാകാതെ പരാജയപ്പെടുകയായിരുന്നു.

പല ബൂത്തുകളിലും ഈ സ്​ഥാനാർത്ഥികൾക്ക്​ 20 വോട്ടുപോലും ലഭിച്ചിട്ടില്ല. ഇതോടെയാണ്​ ന്യൂനപക്ഷ മോർച്ച സംസ്​ഥാന, ജില്ലാ, മണ്​ഡല സമിതികൾ പിരിച്ചുവിടു​ന്നതായി ബിജെപി സംസ്​ഥാന അധ്യക്ഷൻ രഞ്​ജിത്​ ദാസ്​ അറിയിച്ചത്​.
തിരഞ്ഞെടുപ്പിൽ ബിജെപി നേതൃത്വം നൽകിയ എൻഡിഎ സഖ്യം 75 സീറ്റുകളുമായി അധികാരം നിലനിർത്തിയിട്ടുണ്ട്​.

കോൺഗ്രസ്​ നേതൃത്വം നൽകിയ മഹാസഖ്യം 50 ഇടത്തും ജയിച്ചു. ജയിലിലടച്ച സന്നദ്ധ പ്രവർത്തകൻ അഖിൽ ഗൊഗോയ്​ ഒരു ദിവസം പോലും പ്രചരണത്തിനെത്താനാകാതിരുന്നിട്ടും മികച്ച ഭൂരിപക്ഷത്തിന്​ ജയിച്ചു. എന്നാൽ, കോൺഗ്രസ്​ സഖ്യത്തിന്​ ഇത്തവണ 31 പേർ മുസ്​ലിംങ്ങളാണ്​.

അതേ സമയം, ന്യൂനപക്ഷ മോർച്ച പിരിച്ചുവിട്ടതിന്​ യഥാർത്ഥ കാരണം അറിവായിട്ടില്ലെന്ന്​ മോർച്ച അധ്യക്ഷൻ മുഖ്​താർ ഹുസൈൻ ഖാൻ പറഞ്ഞു. ബംഗാളി വംശജരായ മുസ്​ലിംങ്ങൾ ഭൂരിപക്ഷമുള്ള പടിഞ്ഞാറൻ ആസാമിൽ പലയിടത്തും വോട്ടുശതമാനം രണ്ടക്കം കടത്താൻ പോലും ബിജെപി സ്​ഥാനാർത്ഥികൾക്ക്​ കഴിഞ്ഞില്ല.

ജലേശ്വറിൽ 9.38ഉം ബാഗ്​ബറിൽ രണ്ടും ശതമാനം വോട്ടുകളാണ്​​ ബിജെപി സ്​ഥാനാർത്ഥികളുടെ പെട്ടിയിൽ വീണത്​. മറുവശത്ത്​ കോൺഗ്രസ്​ സ്​ഥാനാർത്ഥികൾ 50 ശതമാനത്തിനുമേൽ വോട്ടുപിടിക്കുകയും ചെയ്​തു. നിലവിലെ ബിജെപി മന്ത്രിസഭയിലെ ഡെപ്യൂട്ടി സ്​പീക്കർ അമീനുൽ ഹഖ്​ ലസ്​കർ വരെ പരാജയപ്പെട്ടവരിൽ ​പെടും.

Advertisement