വാഷിങ്ടൺ:
അമേരിക്കയുടെ 46ാം പ്രസിഡന്‍റായി അധികാരമേറ്റ ജോ ബൈഡൻ ഒന്നാം നാൾ തിരുത്തിയത് 15 ട്രംപ്തീരുമാനങ്ങൾ. ഏഴു മുസ്ലിം രാജ്യങ്ങളിൽനിന്ന് അമേരിക്കയിലേക്ക് യാത്ര വിലക്കി 2017ൽ നടപ്പാക്കിയ നിയമനിർമാണമാണ് അതിലൊന്ന്. ഇനിയും കളയാൻ സമയം ബാക്കിയില്ലെന്നു പ്രഖ്യാപിച്ചായിരുന്നു നടപടി.
‘മുസ്ലിം വിലക്കി’ന് പ്രസിഡന്‍റ് അന്ത്യം കുറിച്ചിരിക്കുന്നു- ഒരു മതത്തോട് കടുത്ത വൈരവും വെറുപ്പും നിറഞ്ഞതായിരുന്നു ആ തീരുമാനം”- ബൈഡന്‍റെ വൈറ്റ്ഹൗസ് പ്രസ് സെക്രട്ടറി ജെൻ പെസ്കി പറഞ്ഞു.അമേരിക്കയിലെ മുസ്ലിം സമൂഹത്തിന് ഏറെ ആശ്വാസം പകരുന്നതാണ് പുതിയ തീരുമാനം. ഏഷ്യയിലെയും ആഫ്രിക്കയിലെയും മുസ്ലിം ഭൂരിപക്ഷ രാജ്യങ്ങൾക്കായിരുന്നു നേരത്തെ ഡോണൾഡ് ട്രംപ് യാത്ര വിലക്ക് പ്രഖ്യാപിച്ചത്.
ഇവിടങ്ങളിൽനിന്ന് യു എസിലേക്ക് യാത്ര ഇതോടെ മുടങ്ങിയിരുന്നു. ബൈഡന്‍റെ പുതിയ ഉത്തരവിന് പിന്നാലെ ഈ രാജ്യങ്ങളിൽനിന്ന് യാത്ര പുനരാരംഭിക്കാൻ വിസ നടപടികൾക്ക് തുടക്കം കുറിക്കാനും നിർദേശം നൽകി. ഇറാൻ, ലിബിയ, സോമാലിയ, ഇറാഖ്, സുഡാൻ, സിറിയ, യെമൻ എന്നീ രാജ്യങ്ങളിൽനിന്നുള്ളവർക്കാണ് ട്രംപ് വിലക്കേർപ്പെടുത്തിയിരുന്നത്.