തിരുവനന്തപുരം:
അധികാരത്തിലെത്തിയാല്‍ ലൈഫ്മിഷന്‍ പിരിച്ചു വിടുമെന്ന് പറഞ്ഞ യുഡിഎഫ് കണ്‍വീനര്‍ എം.എം. ഹസനെ തിരുത്തി കെപിസിസി പ്രസിഡന്‍റ് മുല്ലപ്പള്ളി രാമചന്ദ്രന്‍. യുഡിഎഫ് അധികാരത്തിലെത്തിയാല്‍ ലൈഫ് മിഷന്‍ പദ്ധതി പിരിച്ചുവിടില്ലെന്നും പട്ടിണിപ്പാവങ്ങളായ നിരവധി പേര്‍ക്ക് വീട് നല്‍കുന്ന പദ്ധതിയാണ് ലൈഫ് മിഷനെന്നും മുല്ലപ്പള്ളി വ്യക്തമാക്കി.
മുകളിലാകാശം മാത്രമായി നില്‍ക്കുന്ന പതിനായിരക്കണക്കിന് പാവങ്ങളുണ്ട്. അവര്‍ക്കൊരു ഭവനപദ്ധതി. ആ പദ്ധതി ആവിഷ്‌കരിച്ച്‌ നടപ്പാക്കിയത് ഞങ്ങളാണ്. യുഡിഎഫ് നാളെ അധികാരത്തില്‍ വന്നാല്‍ ആ പദ്ധതി ത്വരിതഗതിയില്‍ മുന്നോട്ടുകൊണ്ടുപോകും. ഈ നാട്ടില്‍ വീടില്ലാത്ത ഒരാളുപോലും ഉണ്ടാകാന്‍ പാടില്ല എന്ന സ്ഥിതിയിലേക്ക് സംസ്ഥാനത്തെ വളര്‍ത്തിക്കൊണ്ടു വരികയും ചെയ്യുമെന്ന് മുല്ലപ്പള്ളി പറഞ്ഞു.
ലൈഫ് മിഷന്‍ ക്രമക്കേടുമായി ബന്ധപ്പെട്ട് സിബിഐ അന്വേഷണം നടക്കുകയാണ്. അന്വേഷണം നടക്കട്ടെയെന്ന് മുല്ലപ്പള്ളി രാമചന്ദ്രന്‍ പറഞ്ഞു. തദ്ദേശ തെരഞ്ഞെടുപ്പിന് മുമ്ബാണ് ഹസ്സന്‍ യുഡിഎഫ് അധികാരത്തില്‍ എത്തിയാല്‍ ലൈഫ് മിഷന്‍ പദ്ധതി പിരിച്ചുവിടുമെന്ന് അഭിപ്രായപ്പെട്ടത്.