27.6 C
Kochi
Monday, November 29, 2021

Daily Archives: 12th June 2020

മുംബൈ: മഹാരാഷ്ട്രയിൽ സാമൂഹികനീതി വകുപ്പ് മന്ത്രിയായ ധനജ്ഞയ് മുണ്ഡേയ്ക്കും അദ്ദേഹത്തിന്റെ പേഴ്സണൽ സ്റ്റാഫ് അംഗങ്ങൾക്കും കൊവിഡ് സ്ഥിരീകരിച്ചു. രണ്ട് ഡ്രൈവർമാർ, പാചക്കകാരൻ, പേഴ്സണൽ അസിസ്റ്റൻ്റ് അടക്കമുള്ളവർക്കാണ് രോഗബാധ. ഇന്നലെ രാത്രിയോടെയാണ് ഇവരുടെ പരിശോധന ഫലം പുറത്തുവന്നത്. മഹാരാഷ്ട്രയിൽ ഭവനമന്ത്രി ജിതേന്ദ്ര അവാ‍ഡിനും പൊതുമരാമത്ത് മന്ത്രി അശോക് ചവാനും നേരത്തെ രോഗം സ്ഥിരീകരിച്ചിരുന്നു.
ഡൽഹി: കഴിഞ്ഞ 24 മണിക്കൂറിനിടെ രാജ്യത്ത് 10,956 പേർക്ക് കൊവിഡ് സ്ഥിരീകരിച്ചു. ഇതാദ്യമായാണ് പ്രതിദിന വർധന പതിനായിരം കടക്കുന്നത്. 396 പേർ മരണപ്പെടുകയും ചെയ്തു. ഡൽഹി, മഹാരാഷ്ട്ര, തമിഴ്നാട് ,ഗുജറാത്ത് ,ഉത്തർ പ്രദേശ് സംസ്ഥാനങ്ങളിൽ സ്ഥിതി രൂക്ഷമാണെന്നാണ് ഔദ്യോഗിക വിലയിരുത്തൽ. എന്നാൽ ഇത് വരെ 1,47,194 പേരാണ് രോഗമുക്തി നേടിയതെന്ന് ആരോഗ്യ വകുപ്പിന്റെ കണക്കുകൾ വ്യക്തമാക്കുന്നു. കൊവിഡ് രൂക്ഷമായ രാജ്യങ്ങളുടെ പട്ടികയിൽ ഇന്ത്യ നിലവിൽ നാലാം സ്ഥാനത്താണ്.
തിരുവനന്തപുരം: അതിരപ്പള്ളി പദ്ധതി ഒരു കാരണവശാലും നടപ്പാക്കാൻ അനുവദിക്കില്ലെന്നും ഇത് സംബന്ധിച്ച് മന്ത്രിസഭയിൽ ഒരു ചർച്ചയും നടന്നിട്ടില്ലെന്നും വനംവകുപ്പ് മന്ത്രി കെ രാജു. പാരിസ്ഥിതിക അനുമതിയോ കേന്ദ്ര അനുമതിയുടെ ക്ലിയറൻസോ ഈ പദ്ധതിക്കില്ലെന്നും അദ്ദേഹം പറഞ്ഞു. തന്നെ സംബന്ധിച്ച് ഇതൊരു അടഞ്ഞ അധ്യായമാണെന്നും ഈ വിഷയത്തിൽ സമവായമുണ്ടാക്കാനുള്ള യാതൊരു നീക്കവും നടന്നിട്ടില്ലെന്നും മന്ത്രി കൂട്ടിച്ചേർത്തു.
കണ്ണൂർ: കണ്ണൂരിൽ കൊവിഡ് നിരീക്ഷണത്തിലായിരുന്നു ഇരിക്കൂർ പട്ടുവം സ്വദേശി ഉസ്സൻ കുട്ടി മരിച്ചു. ഈ മാസം ഒൻപതാം തീയതി മുംബൈയിൽ നിന്ന് ട്രെയിൻ മാർഗം നാട്ടിലെത്തിയ ഇയാൾ വീട്ടിൽ നിരീക്ഷണത്തിൽ കഴിയുകയായിരുന്നു. പിന്നീട് പനി വന്നതോടെ കണ്ണൂ‌ർ ജില്ലാ ആശുപത്രിയിൽ ചികിത്സയിലായിരുന്നു. ഇദ്ദേഹത്തിന് കൊവിഡ് ബാധയുണ്ടായിരുന്നോ എന്നറിയാൻ സ്രവം പരിശോധനയ്ക്ക് അയച്ചിരിക്കുകയാണ്.