നാഗപട്ടണം:
ബീഫ് സൂപ്പ് കഴിക്കുന്ന ചിത്രം ഫേസ്ബുക്കില്‍ പോസ്റ്റ് ചെയ്തതിന് മുസ്ലിം യുവാവിനു മര്‍ദ്ദനം. തമിഴ്നാട്ടിലെ നാഗപട്ടണത്താണു സംഭവം. നാഗപട്ടണം പൊറവച്ചേരി സ്വദേശി മുഹമ്മദ് ഫൈസാനെയാണ് ആളുകൾ ആക്രമിച്ചത്. പരിക്കേറ്റ ഫൈസാന്‍ നാഗപട്ടണം സര്‍ക്കാര്‍ ആശുപത്രിയില്‍ ചികിത്സയിലാണ്.
വ്യാഴാഴ്ച ബീഫ് സൂപ്പ് കഴിക്കുന്ന ചിത്രവും സൂപ്പിന്റെ രുചിയും വിവരിച്ചു ഫൈസാന്‍ ഫേസ്ബുക്കില്‍ കുറിപ്പെഴുതിയിരുന്നു. അന്നു രാത്രി തന്നെ ഈ പോസ്റ്റ് പിന്‍വലിക്കണമെന്ന് ആവശ്യപ്പെട്ടു ചിലര്‍ ഫൈസാന്‍റെ വീട്ടില്‍ എത്തി ഭീഷണിപ്പെടുത്തി. ഇതിനു വിസമ്മതിച്ചതോടെ ആക്രമിക്കുകയായിരുന്നെന്നു പരാതിയില്‍ പറയുന്നു.
അക്രമവുമായി ബന്ധപ്പെട്ടു നാലു പേരെ അറസ്റ്റ് ചെയ്തതായി പോലീസ് അറിയിച്ചു. വധശ്രമം അടക്കമുള്ള കുറ്റങ്ങള്‍ ചുമത്തിയാണ് അക്രമികള്‍ക്കെതിരെ പോലീസ് കേസെടുത്തിട്ടുള്ളത്. ഇവര്‍ ഹിന്ദു മക്കള്‍ കച്ചി അംഗങ്ങളാണെന്നാണു പോലീസ് നല്‍കുന്ന സൂചന.