പോർട്ടോ അലെഗ്രോ:
ചിലിയെ തകർത്ത് പെറു കോപ്പ അമേരിക്ക ഫൈനലിൽ. രണ്ടാം സെമിയിൽ എതിരില്ലാത്ത മൂന്നു ഗോളുകൾക്കായിരുന്നു പെറുവിന്റെ ജയം.
21-ാം മിനിറ്റിൽ എഡിസണ്‍ ഫ്ളോറസും 38-ാം മിനിറ്റിൽ യോഷമിർ യോടുനുമാണ് പെറുവിനായി ഗോളുകൾ നേടിയത്. ഇഞ്ചുറി ടൈമിൽ പൗലോ ഗുറിയേരോ മൂന്നാം ഗോൾ നേടി.
കഴിഞ്ഞ രണ്ടുവട്ടവും കിരീടം നേടിയ ചിലി ഹാട്രിക് ലക്ഷ്യമിട്ടാണ് ഇത്തവണ മൽസരത്തിനെത്തിയത്. പ്രാഥമിക റൗണ്ടിൽ ജപ്പാനെയും ഇക്വഡോറിനെയും തോൽപ്പിച്ച് ചിലി ക്വാർട്ടർ ഉറപ്പാക്കുകയും ചെയ്തിരുന്നു. കൊളംബിയയ്ക്കെതിരെ ഷൂട്ടൗട്ടിൽ വിജയം (5–4) കണ്ടാണ് അവർ സെമിബർത്ത് ഉറപ്പിച്ചത്.
1975-നുശേഷം ഇതാദ്യമായാണു പെറു ഫൈനലിൽ എത്തുന്നത്. ക്വാർട്ടറിൽ പെനൽറ്റി ഷൂട്ടൗട്ടിൽ യുറഗ്വായെ 5–4ന് തോൽപ്പിച്ചാണ് അവർ സെമിയിൽ എത്തിയത്.
ഫൈനലിൽ ബ്രസീലാണ് പെറുവിന്റെ എതിരാളികൾ. ചിരവൈരികളായ അർജന്‍റീനയെ എതിരില്ലാത്ത രണ്ടു ഗോളുകൾക്കു തോൽപിച്ചാണു ബ്രസീൽ ഫൈനലിൽ കടന്നത്. ഞായറാഴ്ച മാരക്കാന സ്റ്റേഡിയത്തിലാണ് ഫൈനൽ.