മുംബൈ:
രാജ്യത്ത് കൊവിഡ് വ്യാപനം അതിരൂക്ഷമായി തുടരുകയാണ്. പ്രതിദിനം രണ്ടരലക്ഷത്തോളം പേർക്കാണ് പുതുതായി രോഗം സ്ഥിരീകരിക്കുന്നത്. മരണനിരക്കും കുത്തനെ ഉയർന്നു. പ്രായഭേദമന്യേയാണ് ജനിതകമാറ്റം സംഭവിച്ച കൊറോണ വൈറസ് ആരോഗ്യനില വഷളാക്കുന്നത്. രോഗികളുടെ എണ്ണം കുതിക്കുന്നതോടെ മാനസിക-ആരോഗ്യ സമ്മർദത്തിലാകുന്നതാകട്ടെ മുൻനിര പോരാളികളും.
അത്തരത്തിൽ മുൻനിരപോരാളിയായ മുംബൈയിലെ ഡോക്ടറായ തൃപ്തി ഗിലാഡയുടെ ഒരു ഇൻസ്റ്റഗ്രാം വീഡിയോയാണ് ഇപ്പോൾ സാമൂഹിക മാധ്യമങ്ങളിൽ തരംഗം. കൊവിഡ് ബാധിച്ച് ജനങ്ങൾ മരിച്ചുവീഴുന്നതു കാണുമ്പോൾ നിസ്സഹായരായി നോക്കിനിൽക്കേണ്ട അവസ്ഥ വിവരിക്കുകയാണ് ഡോക്ടർ. അഞ്ചുമിനിറ്റ് മാത്രമാണ് വീഡിയോയുടെ ദൈർഘ്യം.
‘ഞങ്ങൾ നിസ്സഹായരാണ്. മുമ്പൊരിക്കലും ഇത്തരമൊരു സാഹചര്യം നേരിട്ടിട്ടില്ല. ജനങ്ങൾ പരിഭ്രാന്തരാണ്’ -എന്നു തുടങ്ങുന്നതാണ് ഡോക്ടറുടെ സന്ദേശം.