സിലിഗുരി:
തനിക്ക് കൊവിഡ് -19 ബാധിച്ചാൽ പശ്ചിമ ബംഗാൾ മുഖ്യമന്ത്രി മമത ബാനർജിയെ കെട്ടിപ്പിടിക്കുമെന്ന് പറഞ്ഞ ബിജെപി ദേശീയ സെക്രട്ടറി അനുപം ഹസ്രയ്‌ക്കെതിരെ തൃണമൂൽ കോൺഗ്രസ് പരാതി നൽകി.
ഞായറാഴ്ച വൈകുന്നേരം സൗത്ത് 24 പർഗാനാസിൽ നടന്ന പാർട്ടി പരിപാടിയിൽ ഹസ്ര അങ്ങനെ അഭിപ്രായപ്പെട്ടതിനെത്തുടർന്ന് ഭരണകക്ഷിയുടെ സിലിഗുരി യൂണിറ്റാണ് പരാതി നൽകിയത്.
“ഞങ്ങളുടെ പ്രവർത്തകർ കൊറോണയേക്കാൾ വലിയ ശത്രുവിനോട് പോരാടുകയാണ്. അവർ മമത ബാനർജിയോട് പോരാടുകയാണ്. മുഖംമൂടിയില്ലാതെ മമത ബാനർജിക്കെതിരെ പോരാടാൻ അവർക്ക് (ബിജെപി പ്രവർത്തകർക്ക്) കഴിഞ്ഞപ്പോൾ, മാസ്ക് ധരിക്കാതെ കൊവിഡ് -19 നെതിരെ പോരാടാമെന്നും അവർ കരുതുന്നു,” ഹസ്ര പറഞ്ഞതായി വാർത്ത ഏജൻസി പിടിഐ റിപ്പോർട്ടു ചെയ്തു.
“എനിക്ക് കൊറോണ വൈറസ് ബാധിച്ചാൽ പോയി മമത ബാനർജിയെ കെട്ടിപ്പിടിക്കുമെന്ന് ഞാൻ തീരുമാനിച്ചു,” ഹസ്ര കൂട്ടിച്ചേർത്തു.
തൃണമൂൽ കോൺഗ്രസ്സിന്റെ സിലിഗുരി യൂണിറ്റ് ബിജെപി നേതാവിനെതിരെ പരാതി നൽകുകയും റാലി നടത്തുകയും ചെയ്തു.
സംസ്ഥാന ബിജെപി നേതൃത്വം പക്ഷേ, നേതാവിന്റെ പ്രസ്താവനയെ പിന്തുണച്ചില്ല. തങ്ങൾ അത്തരം അഭിപ്രായങ്ങളെ പിന്തുണയ്ക്കുന്നില്ലെന്നും, ഇത്തരം പരാമർശങ്ങൾ ഒഴിവാക്കണമെന്നും ഒരു ബിജെപി നേതാവ് പറഞ്ഞു.