തിരുവനന്തപുരം :
സംസ്ഥാനത്തു നാശം വിതച്ചു കടന്നുപോയ പേമാരിയെ തുടർന്ന്, എച്ച്. വൺ എൻ. വൺ ജാഗ്രതാ നിര്‍ദേശം. ഓഗസ്റ്റ് മാസത്തിൽ മാത്രം കേരളത്തിൽ 38 പേര്‍ക്കാണ് രോഗം സ്ഥിരീകരിച്ചത്. എച്ച് വൺ എൻ വൺ ബാധിതരായി മൂന്നുപേർ മരണമടയുകയും ചെയ്തു. ഈ സാഹചര്യത്തിലാണ് ആരോഗ്യ വകുപ്പ് ജാഗ്രതാനിര്‍ദേശം പുറപ്പെടുവിച്ചിരിക്കുന്നത്.
സംസ്ഥാനത്തുടനീളം നിരവധി പേരാണ് ദുരിതാശ്വാസ ക്യാമ്പുകളിലും മറ്റുമായി കഴിയുന്നത്. രോഗം പടരാനുള്ള സാധ്യതയെ ഇത് വർദ്ധിപ്പിക്കുന്നു. കേരളംമുഴുവനിലും താമസിക്കുന്നവർ ജാഗ്രതപാലിക്കേണ്ടതുണ്ട്. എല്ലാ ആശുപത്രികളിലും ആവശ്യമായ മരുന്നുകള്‍ എത്തിച്ചിട്ടുണ്ട്- ആരോഗ്യവകുപ്പ് മന്ത്രി കെ.കെ.ശൈലജ അറിയിച്ചു.
ആരോഗ്യവകുപ്പിന്റെ കണക്ക് പ്രകാരം സംസ്ഥാനത്താകെ, ഈ വര്‍ഷം 42 പേരും ഈ മാസം മാത്രം മൂന്ന് പേരുമാണ്, എച്ച് വണ്‍ എന്‍ വണ്‍ ബാധിച്ച് മരിച്ചത്. ഈ മാസം മാത്രം 38 പേര്‍ക്കും ഇതേ വര്‍ഷത്തിൽ 821 പേര്‍ക്കുമാണ് രോഗം സ്ഥിരീകരിച്ചിരിക്കുന്നത്.
എച്ച്. വണ്‍ എന്‍. വണ്‍ രോഗലക്ഷണങ്ങൾ
- സാധാരണയിലും കൂടുതലായി വർദ്ധിച്ച പനി
- വരണ്ട ചുമ
- ജലദോഷം
- തൊണ്ടവേദന
- വിറയല്‍
- മൂക്കൊലിപ്പ്
പ്രധാനമായും ജാഗ്രതപാലിക്കേണ്ടവർ
(ചെറിയ തോതിലെങ്കിലും ലക്ഷണങ്ങൾ കണ്ടു തുടങ്ങിയാൽ, ആദ്യഘട്ടത്തില്‍ തന്നെ ചികിത്സ തേടുക)
- ഗര്‍ഭിണികള്‍
- അഞ്ച് വയസ്സില്‍ താഴെയുള്ള കുട്ടികള്‍
- 65വയസ്സിന് മുകളില്‍ പ്രായമുള്ളവര്‍
- വൃക്ക, കരള്‍, ഹൃദ്രോഗം തുടങ്ങിയ ആരോഗ്യപ്രശ്‌നങ്ങളുള്ളവർ