ചെന്നൈ:
പെരുമാറ്റച്ചട്ട ലംഘനം കണ്ടെത്തിയതിനെ തുടര്‍ന്നു ബി.ജെ.പിയുടെ ഇരുനൂറോളം ഫെയ്സ്ബുക് അക്കൗണ്ടുകള്‍ തിരഞ്ഞെടുപ്പു കമ്മിഷന്‍ പൂട്ടിച്ചു. കോയമ്പത്തൂരിലെ ബി.ജെ.പി. സ്ഥാനാർത്ഥി സി.പി. രാധാകൃഷ്ണന്‍, പാര്‍ട്ടി സംസ്ഥാന ജനറല്‍ സെക്രട്ടറി വാനതി ശ്രീനിവാസന്‍ തുടങ്ങിയവരുടെ ഉള്‍പ്പെടെയുള്ള അക്കൗണ്ടുകള്‍ക്കെതിരെയാണു നടപടി. ചട്ടം ലംഘിക്കുന്നതായി കാണിച്ച്‌ ഒട്ടേറെ പരാതികള്‍ ലഭിച്ചതായി കമ്മിഷന്‍ അറിയിച്ചു.
വിവാദ പോസ്റ്റുകള്‍ നീക്കിയ ശേഷം രാധാകൃഷ്ണന്‍റെ അക്കൗണ്ട് വീണ്ടും ആക്ടിവേറ്റ് ചെയ്തു. വാനതിയുടേത് തുറന്നിട്ടില്ല. എതിർകക്ഷികൾ കൂട്ടമായി പരാതി നൽകി അക്കൗണ്ടുകൾ പൂട്ടിക്കുകയായിരുന്നെന്നു ബി.ജെ.പി. ആരോപിച്ചു.
അതേസമയം പ്രധാനമന്ത്രി നരേന്ദ്രമോദിയുടെ ജീവിതകഥ പറയുന്ന സിനിമയായ ‘പിഎം നരേന്ദ്ര മോദി’ വിലക്കിയതിന് പിന്നാലെ ബി.ജെ.പിയുടെ സ്പോണ്‍സര്‍ഷിപ്പിലുള്ള ‘നമോ’ ടിവിക്കും തിരഞ്ഞെടുപ്പ് കമ്മീഷന്‍ നിയന്ത്രണങ്ങള്‍ ഏര്‍പ്പെടുത്തി. രാഷ്ട്രീയ ഉള്ളടക്കമുള്ള പരിപാടികള്‍ പ്രക്ഷേപണം ചെയ്യുന്നതിനാണ് തിരഞ്ഞെടുപ്പ് കമ്മീഷന്‍ വിലക്കേര്‍പ്പെടുത്തിയത്. കമ്മീഷന്‍റെ സര്‍ട്ടിഫിക്കറ്റ് ലഭിക്കാത്ത പരിപ്പാടികള്‍ സംപ്രേക്ഷണം ചെയ്യാന്‍ പാടില്ലെന്നും കമ്മീഷന്‍ ഉത്തരവില്‍ പറയുന്നുണ്ട്.
സര്‍ഫിക്കറ്റ് ചെയ്യപ്പെടാത്ത ഏതെങ്കിലും തരത്തിലുള്ള രാഷ്ട്രീയ ഉള്ളടക്കമുള്ള പരിപാടികള്‍ ഉണ്ടെങ്കില്‍ ഉടന്‍ തന്നെ നീക്കം ചെയ്യണമെന്നും തിരഞ്ഞെടുപ്പ് കമ്മീഷന്‍ ദല്‍ഹി മുഖ്യ തെരഞ്ഞെടുപ്പ് ഓഫീസര്‍ക്ക് നല്‍കിയ കത്തില്‍ പറയുന്നു. തിരഞ്ഞെടുപ്പ് നീരീക്ഷക സമിതിയുടെ അനുമതി ലഭിച്ചാല്‍ രാഷ്ട്രീയ ഉള്ളടക്കമുള്ള പരിപാടികള്‍ സംപ്രേഷണം ചെയ്യാന്‍ സാധിക്കും. തെരഞ്ഞെടുപ്പ് പ്രചരണ പരിപാടികളും പരസ്യങ്ങളും സമിതിയുടെ അനുമതിയോടെ മാത്രമേ പ്രദര്‍ശിപ്പിക്കാവൂ എന്നും കമ്മീഷന്‍ പറഞ്ഞിട്ടുണ്ട്
ഏതാനും ദിവസം മുന്‍പ് ‘പിഎം നരേന്ദ്ര മോദി’ പ്രദര്‍ശിപ്പിക്കുന്നത് തിരഞ്ഞെടുപ്പ് കമ്മീഷന്‍ വിലക്കിയിരുന്നു. തിരഞ്ഞെടുപ്പു കഴിയും വരെ ചിത്രം പ്രദര്‍ശിപ്പിക്കരുതെന്നാണ് കമ്മീഷന്‍ ഉത്തരവിറക്കിയത്. അനുമതിയില്ലാതെ ചാനല്‍ സംപ്രേഷണം തുടങ്ങിയത് പെരുമാറ്റച്ചട്ട ലംഘനമാണെന്നു ചൂണ്ടിക്കാട്ടി കോണ്‍ഗ്രസും ആം ആദ്മി പാര്‍ട്ടിയും പരാതി നല്‍കിയിരുന്നു.
മുഴുവന്‍ സമയവും നരേന്ദ്ര മോദിയുടെയും ബി.ജെ.പിയുടെയും പ്രചാരണ പരിപാടികളും പ്രഭാഷണങ്ങളും മാത്രം സംപ്രേഷണം ചെയ്യുന്ന സ്വകാര്യ ടിവി ചാനലാണു നമോ ടിവി. പ്രധാന ഡി.ടി.എച്ച്‌. ശൃംഖലകള്‍ വഴി കഴിഞ്ഞ 31 മുതലാണ് നമോ ടി .വി. സംപ്രേഷണം തുടങ്ങിയത്. ട്വിറ്റര്‍ അറിയിപ്പിലൂടെ പ്രധാനമന്ത്രി നരേന്ദ്ര മോദിതന്നെയാണ് ഇ ചാനല്‍ ജനങ്ങള്‍ക്ക് മുന്‍പില്‍ അവതരിപ്പിച്ചത്. മോദിയുടെ ചിത്രം തന്നെ ലോഗോയായി ഉപയോഗിക്കുന്ന ചാനലില്‍ അദ്ദേഹത്തിന്‍റെ പ്രസംഗങ്ങള്‍, റാലികള്‍, ബി.ജെ.പി. നേതാക്കളുമായുള്ള അഭിമുഖങ്ങള്‍ എന്നിവയാണ് സംപ്രേക്ഷണം ചെയ്യുക.