കടുത്തുരുത്തി:
മുൻ രാഷ്ട്രപതി ഡോ കെ ആർ നാരായണൻെറ സ്മരണക്കായി കൂത്താട്ടുകുളത്തുനിന്ന് തിരുവനന്തപുരത്തേക്ക് സർവിസ് നടത്തിയിരുന്ന കെ എസ് ആർ ടി സി ഫാസ്റ്റ് പാസഞ്ചർ ബസ് സർവിസ് പുനരാരംഭിക്കാൻ നടപടി സ്വീകരിക്കണമെന്ന് ആവശ്യപ്പെട്ട് അഡ്വ മോൻസ് ജോസഫ് എം എൽ എ ഗതാഗതമന്ത്രി ആൻറണി രാജുവിന് നിവേദനം നൽകി.
കടുത്തുരുത്തി മണ്ഡലത്തിലെ വിവിധ പ്രദേശങ്ങളെ ബന്ധിപ്പിച്ച് വർഷങ്ങളായി സർവിസ് നടത്തിയിരുന്ന ബസ് അടുത്തിടെയാണ് നിർത്തിയത്. സർവിസ് ജനങ്ങൾക്ക് ഏറ്റവും ഉപകാരപ്രദമായിരുന്നുവെന്ന് മന്ത്രിയെ ധരിപ്പിച്ചു. സർവിസ് പുനരാരംഭിക്കുന്നത് സംബന്ധിച്ച് പരിശോധിച്ച് റിപ്പോർട്ട് സമർപ്പിക്കാൻ ഗതാഗതവകുപ്പ് പ്രിൻസിപ്പൽ സെക്രട്ടറിയെ ചുമതലപ്പെടുത്തിയതായും മോൻസ് പറഞ്ഞു.
കടുത്തുരുത്തി മണ്ഡലത്തിൽ മുടങ്ങിപ്പോയ മുഴുവൻ കെ എസ് ആർ ടി സി സർവിസുകളും പുനരാരംഭിക്കണമെന്നും എം ൽ എ ആവശ്യപ്പെട്ടു. ആപ്പാഞ്ചിറ പോളിടെക്നിക് ജങ്ഷനിൽ സൂപ്പർ ഫാസ്റ്റ്, ലിമിറ്റഡ് സ്റ്റോപ് ബസുകൾക്ക് സ്റ്റോപ് അനുവദിക്കണമെന്ന ആവശ്യത്തിൽ മന്ത്രി തുടർനടപടി സ്വീകരിച്ചതായി ട്രാൻസ്പോർട്ട് സെക്രട്ടറി അറിയിച്ചു.