കൊളംബിയക്ക്​ കോപ അമേരിക്ക ആതിഥേയത്വം നഷ്​ടമായി; ടൂർണമെന്‍റ്​ അർജന്‍റീനയിൽ

ബാരൻക്വില (കൊളംബിയ):

രാജ്യത്ത്​ സർക്കാർ വിരുദ്ധ പ്രക്ഷോഭം കൊടുമ്പിരികൊണ്ട സാഹചര്യത്തിൽ കൊളംബിയക്ക്​ കോപ അമേരിക്ക ടൂർണമെന്‍റിന്‍റെ ആതിഥേയത്വം നഷ്​ടമായി. അർജന്‍റീനയും കൊളംബിയയും സംയുക്തമായാണ്​ കോപ അമേരിക്കയുടെ 2021 എഡിഷന്​ ആതിഥേയത്വം വഹിക്കാനിരുന്നത്​. 105 വർഷത്തിനിടെ ആദ്യമായിട്ടായിരുന്നു കൊളംബിയക്ക്​ വൻകരയുടെ ടൂർണമെന്‍റിന്​ വേദിയാകാൻ അവസരം ലഭിച്ചിരുന്നത്​.

ജൂൺ 13 മുതൽ ജൂലൈ 10 വരെ നീണ്ടു നിൽക്കുന്ന ഫുട്​ബോൾ മാമാങ്കത്തിന്‍റെ ഫൈനൽ തലസ്​ഥാന നഗരമായ ബാറൻക്വില്ലയിലാണ്​ നടത്താൻ നിശ്ചയിച്ചിരുന്നത്​.

ടൂർണമെന്‍റ്​ നവംബറിലേക്ക്​ മാറ്റണമെന്ന കൊളംബിയയുടെ ആവശ്യം നിരസിച്ചാണ്​ ദക്ഷിണ അമേരിക്കൻ ഫുട്​ബാൾ ഫെഡറേഷൻ (കോൺമബോൾ) രാജ്യത്തെ ആതിഥേയത്വത്തിൽ നിന്ന്​ ഒഴിവാക്കിയത്​. ‘2021 കോപ അമേരിക്ക യാഥാർഥ്യമാകുമെന്ന്​ ഞങ്ങൾ ഉറപ്പ് നൽകുന്നു.

കൊളംബിയയിൽ നടക്കാനിരുന്ന മത്സരങ്ങളുടെ പുതുക്കിയ വേദി സംബന്ധിച്ച കൂടുതൽ വിവരങ്ങൾ വരും ദിവസങ്ങളിൽ അറിയിക്കും’ -കോൺമബോൾ അറിയിച്ചു.
ടൂർണമെന്‍റിന്​ മുഴുവനായി ആതിഥേയത്വം വഹിക്കാമെന്ന്​ അർജന്‍റീന സമ്മതിച്ചിട്ടുണ്ട്​.