Reading Time: < 1 minute
ന്യൂഡൽഹി:

കൊവിഡ് മഹാമാരിയും പശ്ചിമേഷ്യയിലെ സംഘർഷാവസ്​ഥയുടെയും വാർത്തകൾക്കിടയിൽ മുങ്ങിപ്പോയ ഒന്നുണ്ട്​, രാജ്യ തലസ്​ഥാനത്ത്​ മാസങ്ങളായി നടക്കുന്ന കർഷക സമരം. കേന്ദ്ര സർക്കാറിന്‍റെ കർഷക നിയമങ്ങൾക്കെതിരെ പ്രതിഷേധിക്കുന്ന കർഷകരെ കുറിച്ച്​ രാജ്യത്തെ വീണ്ടും ഓർമിപ്പിക്കുകയാണ്​ ഒളിമ്പ്യനും ബോക്​സിങ്​ താരവുമായ വിജേന്ദർ സിങ്​.

‘നിങ്ങൾ ഞങ്ങളെ മറന്നില്ലെന്ന്​ കരുതുന്നു. ഭാവിക്ക്​ വേണ്ടി ഞങ്ങൾ ഇവിടെ കർഷക സമരം തുടരുകയാണ്​’ ഇങ്ങനെ​ എഴുതിയ ചിത്രമാണ്​ താരം ഫേസ്​ബുക്കിൽ പങ്കുവെച്ചത്​. സമരഭൂമിയിൽ ഇരിക്കുന്ന കർഷകനെയാണ്​ പോസ്റ്ററിൽ കാണാനാകുക. ‘കിസാൻ ഏകത സിന്ദാബാദ്​’ എന്ന ഹാഷ്​ടാഗോട്​ കൂടിയാണ്​ വിജേന്ദർ ചിത്രം പങ്കുവെച്ചിരിക്കുന്നത്​.

കേന്ദ്രസർക്കാറിന്‍റെ കാർഷിക നിയമങ്ങൾക്കെതിരായ പ്രക്ഷോഭത്തിൽ നേരത്തെ വിജേന്ദർ സിങ് അണിചേർന്നിരുന്നു. ഒളിമ്പിക്സ് ബോക്സിങ്ങിൽ ഇന്ത്യയ്ക്കുവേണ്ടി മെഡൽ നേടിയ ആദ്യ താരമാണ് ഹരിയാനക്കാരനായ വിജേന്ദർ സിങ്. 2019ലെ ലോക്സഭ തിരഞ്ഞെടുപ്പിൽ സൗത്ത്​ ഡൽഹിയിൽ നിന്ന് കോൺഗ്രസ് ടിക്കറ്റിൽ മത്സരിച്ചെങ്കിലും പരാജയപ്പെട്ടിരുന്നു.

Advertisement