അഹമ്മദാബാദ്:
ഗുജറാത്തിലെ കൊവിഡ് ആശുപത്രിയിലുണ്ടായ തീപിടിത്തത്തിൽ 12 പേർ മരിച്ചു. ശനിയാഴ്ച പുലർച്ചെ ബറൂച്ചിലാണ് തീപിടിത്തമുണ്ടായത്. ആശുപത്രിയിൽ ചികിത്സയിലുണ്ടായിരുന്ന 50ഓളം മറ്റ് രോഗികളെ രക്ഷിച്ചു.
കൊവിഡ് വാർഡിൽ ചികിത്സയിലുണ്ടായിരുന്ന 12 പേരാണ് മരിച്ചതെന്ന് എസ്പി രാജേന്ദ്രസിൻഹ് ചുഡാസന അറിയിച്ചു. 50 പേരെ രക്ഷപ്പെടുത്തി. മരണസംഖ്യ ഉയരാൻ സാധ്യതയുണ്ടെന്നും അദ്ദേഹം പറഞ്ഞു. ശനിയാഴ്ച പുലർച്ചെ ഒരു മണിയോടെയാണ് കൊവിഡ് വാർഡ് സ്ഥിതി ചെയ്യുന്ന താഴത്തെ നിലയിൽ തീപിടത്തമുണ്ടായതെന്ന് ഫയർഫോഴ്സ് ഉദ്യോഗസ്ഥൻ ശൈലേഷ് സാൻസിയ പറഞ്ഞു.
തീപിടിത്തത്തിന്റെ കാരണം വ്യക്തമായിട്ടില്ല. ഒരു മണിക്കൂറനകം തന്നെ തീയണക്കാൻ സാധിച്ചിട്ടുണ്ട്. രോഗികളെ ഉടൻ തന്നെ മറ്റ് ആശുപത്രികളിലേക്ക് മാറ്റിയെന്നും അധികൃതർ അറിയിച്ചു.