Reading Time: < 1 minute
ന്യൂഡൽഹി:

അസമിൽ ബി ജെ പി എംഎൽഎയുടെ കാറിൽ വോട്ടിങ്​ യന്ത്രം കണ്ടെത്തിയ സംഭവം ജനാധിപത്യത്തിന്‍റെ മോശം അവസ്​ഥയാണ്​ വ്യക്​തമാക്കുന്ന​തെന്ന്​ കോൺഗ്രസ്​ നേതാവ്​ രാഹുൽ ഗാന്ധി. ‘ഇസിയുടെ കാർ മോശം, ബിജെപിയുടെ ഉദ്ദേശ്യം മോശം, ജനാധിപത്യത്തിന്‍റെ അവസ്ഥയും മോശം!’ അദ്ദേഹം ട്വീറ്റ്​ ചെയ്​തു.

രണ്ടാംഘട്ട വോ​ട്ടെടുപ്പ്​ നടന്ന വ്യാഴാഴ്ച രാ​ത്രിയാണ്​ പാതാർകണ്ടി എംഎൽഎ കൃഷ്​ണേന്ദു പാലിന്‍റെ വാഹനത്തിൽനിന്ന്​ വോട്ടിങ്​ മെഷീൻ കണ്ടെടുത്തത്​. ജനങ്ങൾ വാഹനം തടയുകയും ഇവിഎം കണ്ടെടുക്കുകയുമായിരുന്നു. സംഭവത്തിന്‍റെ വിഡിയോ ദൃശ്യങ്ങൾ വൻതോതിൽ പ്രചരിച്ചു. തുടർന്ന്​ സ്​ഥലത്ത്​ വൻ സംഘർഷാവസ്​ഥ ഉടലെടുത്തിരുന്നു.

കൃഷ്​ണേന്ദു പാലിന്‍റെ ഭാര്യയുടെ പേരിൽ രജിസ്​റ്റർ ചെയ്​തതാണ്​ വാഹനം. തിരഞ്ഞെടുപ്പ്​ സത്യവാങ്​മൂലത്തിൽ കൃഷ്​ണേന്ദു പാൽ ഇത്​ സൂചിപ്പിക്കുകയും ചെയ്​തിട്ടുണ്ട്​. സത്യവാങ്​മൂലത്തിൽ AS10B 0022 രജിസ്​ട്രേഷൻ ബൊലേറോ കാറിന്‍റെ വിവരം വെളിപ്പെടുത്തിയിരുന്നു. വാഹനത്തിൽനിന്ന്​ ഇവിഎം പിടികൂടിയതോടെ ജില്ല തിരഞ്ഞെടുപ്പ്​ അധികൃതർ സ്​ഥല​ത്തെത്തിയപ്പോൾ പോളിങ്​ ഓഫിസറോ തിരഞ്ഞെടുപ്പ്​ കമ്മീഷൻ അധികൃതരോ സ്​ഥലത്തുണ്ടായിരുന്നില്ലെന്ന്​ ഇലക്​ഷൻ കമ്മീഷൻ അധികൃതർ വ്യക്തമാക്കി.

ജില്ല തിരഞ്ഞെടുപ്പ്​ ഓഫിസർ അസം മുഖ്യതിരഞ്ഞെടുപ്പ്​ കമ്മീഷണർക്ക്​ റിപ്പോർട്ട്​ നൽകിയിരുന്നു.

Advertisement