കണ്ണൂർ:
പോസ്റ്റൽ വോട്ടുകളിലും കള്ളവോട്ടുകളിലും വിശ്വസിച്ച് തെരഞ്ഞെടുപ്പിനെ ജയിക്കാമെന്നാണ് സിപിഎം കരുതുന്നതെന്നും അത് അംഗീകരിക്കാനാവില്ലെന്നും കോൺഗ്രസ് നേതാവ് കെ സി വേണുഗോപാൽ. സംസ്ഥാനത്ത് പത്ത് ലക്ഷത്തിലധികം കള്ള വോട്ടർമാരെ തിരുകി കയറ്റിയിരിക്കുന്നുവെന്നാണ് പാർട്ടി നടത്തിയ പഠനത്തിൽ വ്യക്തമായത്.
കേരളത്തിലെ ചീഫ് ഇലക്ടറൽ ഓഫിസറുടെ മുമ്പാകെ പ്രതിപക്ഷനേതാവ് രമേശ് ചെന്നിത്തല നാലര ലക്ഷം പേരുടെ കള്ളവോട്ട് സംബന്ധിച്ച തെളിവുകൾ നൽകി കഴിഞ്ഞു. ഈ വിഷയത്തിൽ സത്വരവും ഫലപ്രദവുമായ നടപടി കൈക്കൊള്ളണമെന്ന് കേന്ദ്ര തിരഞ്ഞെടുപ്പ് കമ്മീഷനോട് അഖിലേന്ത്യാ കോൺഗ്രസ് കമ്മിറ്റി ആവശ്യപ്പെട്ടിട്ടുണ്ട്.
ജനഹിതത്തെ അട്ടിമറിക്കാനായി ആളുകളെ പെരുപ്പിച്ചു കാണിച്ചും ഇല്ലാത്ത ആളുകളെ ഉൾപ്പെടുത്തിയും വോട്ടർ പട്ടികയുണ്ടാക്കുന്നത് ജനാധിപത്യവിരുദ്ധ നടപടിയാണ്. ഇക്കാര്യത്തിൽ തിരഞ്ഞെടുപ്പ് കമ്മീഷന്‍റെ ശക്തമായ നടപടിയുണ്ടാവണമെന്നും കെ സി വേണുഗോപാൽ ആവശ്യപ്പെട്ടു.