Reading Time: < 1 minute

തിരുവനന്തപുരം:

സ്‌പ്രിന്‍ക്ലറില്‍ സര്‍ക്കാരിനെതിരെയുള്ള പ്രതിപക്ഷ ആരോപണം ശരിയെന്ന് തെളിഞ്ഞുവെന്ന് പ്രതിപക്ഷനേതാവ് രമേശ് ചെന്നിത്തല.  ​സ്പ്രിൻക്ലർ കരാറിൽ കള്ളം കൈയോടെ പിടിക്കപ്പെട്ടപ്പോൾ കളവ്​ മുതൽ ഉപേക്ഷിക്കുകയാണ് സംസ്ഥാന സർക്കാർ ചെയ്​തതെന്നും​ ചെന്നിത്തല പറഞ്ഞു. തൊണ്ടിമുതലും ദൃക്സാക്ഷിയും സിനിമയിലെ കള്ള​ന്‍റേതിന് സമാനമാണ്​ സർക്കാർ നിലപാടെന്നും ചെന്നിത്തല പരിഹസിച്ചു.

സ്​പ്രിൻക്ലർ കരാറിൽ സർക്കാർ മലക്കം മറിഞ്ഞു. കരാറുമായി മുന്നോട്ട്​ പോയിരുന്നെങ്കിൽ മലയാളികളുടെ ആരോഗ്യവിവരങ്ങൾ സ്​പ്രിൻക്ലറിന്‍റെ കെെയ്യിലിരുന്നേനെ.  ഇത്​ തെരഞ്ഞെടുപ്പുകൾക്കായി ഉപയോഗിക്കപ്പെടുമായിരുന്നുവെന്നും ചെന്നിത്തല പറഞ്ഞു.

ഡാറ്റ അനാലിസിസ്​ സ്​പ്രിൻക്ലറിൽ നിന്ന്​ സി-ഡിറ്റിലെത്തിയത്​ പ്രധാന നേട്ടമാണ്​. കരാറിൽ നിന്ന്​ സി-ഡിറ്റിനേയും ഐടി മിഷനേയും മാറ്റി നിർത്തിയിരിക്കുകയായിരുന്നു. സിഡിറ്റും ഐടി മിഷനും ഉള്‍പ്പെടെയുള്ള സര്‍ക്കാര്‍ സ്ഥാപനങ്ങളെ വിവരശേഖരണത്തിനും വിശകലനത്തിനും വേണ്ടി ഉപയോഗിക്കണമെന്നാണ് പ്രതിപക്ഷം ആദ്യമേ ഉന്നയിച്ചിരുന്നത്. അന്ന് ഇതിനൊന്നും സൗകര്യമില്ലെന്നാണ് സര്‍ക്കാര്‍ പറഞ്ഞിരുന്നതെന്നും പ്രതിപക്ഷ നേതാവ് പറഞ്ഞു.

 

Advertisement