ലണ്ടൻ :
റുമേനിയയുടെ സിമോണ ഹാലെപ്പ് വിംബിൾഡണ്‍ ടെന്നീസ് വനിതാ സിംഗിൾസ് ചാമ്പ്യൻ. അമേരിക്കയുടെ സെറീന വില്യംസിനെ തോൽപ്പിച്ചാണ് ഹാലെപ്പ് തന്റെ കന്നി വിംബിൾഡണ്‍ കിരീടം നേടിയത്. അമേരിക്കൻ താരത്തെ നിലംപരിശാക്കാൻ 56 മിനിറ്റ് മാത്രമാണ് ഹാലെപ്പിനു വേണ്ടിവന്നത്.
6-2, 6-2നായിരുന്നു ഹാലെപ്പിന്‍റെ ജയം. കഴിഞ്ഞ വർഷം ഫ്രഞ്ച് ഓപ്പണ്‍ നേടിയതായിരുന്നു ഹാലെപ്പിന്‍റെ ആദ്യ ഗ്രാൻസ്‌ലാം കിരീടം.ചാമ്പ്യന്‍ഷിപ്പില്‍ ഹാലെപ്പ് ഏഴാം സീഡും സെറീന പതിനൊന്നാം സീഡുമായിരുന്നു.
അതേസമയം 24 ഗ്രാന്‍സ്ലാം കിരീടമെന്ന കോര്‍ട്ടിന്‍റെ റെക്കോര്‍ഡിനൊപ്പമെത്താനുള്ള സെറീനയുടെ കാത്തിരിപ്പ് നീളുകയാണ്. ഗ്രാൻസ്‌ലാം കിരീടനേട്ടത്തിൽ മാർഗരറ്റ് കോർട്ടിന്റെ (24 എണ്ണം) ഓൾ ടൈം റിക്കാർഡിനൊപ്പമെത്താമെന്ന പ്രതീക്ഷയിലായിരുന്നു സെറീന. 2017ലെ ഓസ്ട്രേലിയന്‍ ഓപ്പണിൽ കിരീടം നേടിയ ശേഷം തുടര്‍ച്ചയായ മൂന്നാം ഗ്രാന്‍സ്ലാം ഫൈനലിലാണ് സെറീന തോൽക്കുന്നത്.
പുരുഷ ഫൈനലില്‍ നാളെ ജോക്കോവിച്ച്- ഫെഡററെ നേരിടും.