Reading Time: < 1 minute
മ്യാൻമർ​:

സൈന്യം പുറത്താക്കിയ ജനാധിപത്യ സർക്കാറിന്‍റെ തലപ്പത്തുണ്ടായിരുന്ന മ്യാൻമർ നേതാവ്​ ഓങ്​ സാൻ സൂചിയുടെ വിചാരണ തിങ്കളാഴ്​ച പട്ടാള കോടതിയിൽ ആരംഭിച്ചു. ഫെബ്രുവരി ഒന്നിനാണ്​ സൂചി നയിച്ച സർക്കാറിനെ സൈന്യം അട്ടിമറിച്ചിരുന്നത്​. 11 കിലോ സ്വർണം കൈവശം വെച്ചതുമുതൽ കോളനി കാല സ്വകാര്യത നിയമത്തിന്‍റെ ലംഘനം ഉൾപെടെ നിരവധി കുറ്റങ്ങളാണ്​ നൊബേൽ ജേതാവായ സൂചിക്കെതിരെ സൈന്യം ചുമത്തിയിട്ടുള്ളത്​.

വാക്കിടോക്കികൾ ഇറക്കുമതി ചെയ്യൽ,കൊവിഡ് നിയന്ത്രണങ്ങളുടെ ലംഘനം എന്നിവയും സൂചിക്കെതിരായ കുറ്റങ്ങളാണ്​. വീട്ടുതടങ്കലിൽ കഴിയുന്ന സൂചിയെ കാണാൻ രണ്ടു തവണ മാത്രമാണ്​ അഭിഭാഷകർക്ക്​ അവസരം നൽകിയിരുന്നത്​. ജൂലൈ 26നകം വിചാരണ പൂർത്തിയാക്കും. എല്ലാ തിങ്കളാഴ്ചകളിലുമായിരിക്കും കോടതി നടപടികൾ.

കുറ്റക്കാരിയെന്ന്​ കോടതി വിധിച്ചാൽ 10 വർഷ​ത്തിലേറെ ജയിൽ ശിക്ഷ അനുഭവിക്കേണ്ടിവരും. പുറത്താക്കപ്പെട്ട പ്രസിഡന്‍റ്​ വിൻ മിന്‍റിനൊപ്പം ചുമത്തിയ രാജ്യദ്രോഹക്കേസിൽ ജൂൺ 15ന്​ വേറെയും വിചാരണ ആരംഭിക്കുന്നുണ്ട്​. സൂചിയുടെ കക്ഷിയായ എൻഎൽഡിയിലെ മുതിർന്ന അംഗവും പ്രതി ചേർക്കപ്പെട്ട കേസാണിത്​​. നിയമവിരുദ്ധമായി ആറു ലക്ഷം ഡോളർ കൈപ്പറ്റിയ കേസിൽ വിചാരണ ആരംഭിക്കാനിരിക്കുകയാണ്​.

ജനാധിപത്യ സർക്കാറിനെ പുറത്താക്കി സൈന്യം അധികാരം പിടിച്ചതിനു ശേഷം പ്രതിഷേധവുമായി ജനം തെരുവിലുണ്ട്​. 850 പേർ ഇതുവരെ സൈനിക വേട്ടക്കിരയായിരുന്നു.5,000 ഓളം പേർ കസ്റ്റഡിയിലുണ്ട്​.

അതേ സമയം, മുമ്പും 15 വർഷം വീട്ടുതടങ്കലിലായിരുന്നു സൂചി. 2010ലാണ്​ മോചിതയായത്​. ലോകം ആദരിച്ച നേതാവായ സൂചി പക്ഷേ, മ്യാന്മറിൽ റോഹിങ്ക്യകൾക്കെതിരെ നടന്ന വംശഹത്യയെ കുറിച്ച്​ പ്രതികരിക്കാത്തത്​ കടുത്ത പ്രതിഷേധത്തിനിടയാക്കിയിരുന്നു.

Advertisement