ഡൽഹി:
67-ാമത് ദേശീയ ചലച്ചിത്ര പുരസ്കാരങ്ങൾ ഡൽഹിയിൽ പ്രഖ്യാപിച്ചു. കൊവിഡ് കാരണം അനിശ്ചിതമായി കാലതാമസം നേരിട്ട പുരസ്കാരങ്ങളാണ് ഇപ്പോൾ പ്രഖ്യാപിച്ചത്. 2019 മുതലുള്ള സിനിമകൾക്കാണ് പുരസ്കാരങ്ങൾ നൽകുന്നത്.
വാർത്താവിതരണ പ്രക്ഷേപണ മന്ത്രാലയത്തിന്‍റെ കീഴിലുള്ള ഡയറക്ടറേറ്റ് ഓഫ് ഫിലിം ഫെസ്റ്റിവലാണ് പരിപാടി സംഘടിപ്പിക്കുന്നത്. സിനിമ സൗഹൃദ സംസ്ഥാനമായി സിക്കിമിനെ തിരഞ്ഞെടുത്തു. സിനിമയെക്കുറിച്ചുള്ള മികച്ച പുസ്തകം സഞ്ജയ് സൂരി എഴുതിയ ‘എ ഗാന്ധിയൻ അഫയർ: ഇന്ത്യാസ് ക്യൂരിയസ് പോർട്രയൽ ഓഫ് ലവ് ഇൻ സിനിമ’ക്കാണ്.
മികച്ച ചലച്ചിത്ര നിരൂപകൻ സോഹിനി ഛത്തോപാധ്യായാണ്. സജിൻബാബു സംവിധാനംചെയ്ത മലയാള സിനിമയായ ബിരിയാണിക്ക് പ്രത്യേക പരാമർശം ലഭിച്ചു. മികച്ച തമിഴ് സിനിമ വെട്രിമാരൻ സംവിധാനം ചെയ്ത അസുരനാണ്. മികച്ച മലയാള സിനിമ രാഹുൽ റിജി നായർ സംവിധാനം ചെയ്ത കള്ളനോട്ടം ആണ്.