തിരുവനന്തപുരം:
പിജെ ജോസഫും മോൻസ് ജോസഫും എംഎൽഎ സ്ഥാനം രാജിവച്ചു. ഇരുവരും തങ്ങളുടെ രാജിക്കത്ത് സ്പീക്കർക്ക് നൽകി. നാമനിർദ്ദേശ പത്രിക സമർപ്പിക്കുന്നതിന് തൊട്ടുമുൻപായാണ് ഇരുവരും രാജി വച്ചത്. അയോഗ്യത പ്രശ്നം ഒഴിവാക്കുന്നതിനായിട്ടാണ് ജോസഫും മോൻസും രാജിവച്ചത് എന്നാണ് സൂചന.
കേരള കോൺഗ്രസ് എം സ്ഥാനാർത്ഥികളായി രണ്ടില ചിഹ്നത്തിലാണ് പി ജെ ജോസഫും മോൻസ് ജോസഫും 2016 നിയമസഭ തിരഞ്ഞെടുപ്പിൽ മത്സരിച്ചു ജയിച്ചത്. കഴിഞ്ഞ ദിവസം പി സി തോമസ് നയിക്കുന്ന കേരള കോൺഗ്രസിൽ പി ജെ ജോസഫ് വിഭാഗം ലയിച്ചിരുന്നു.
പുതിയ പാർട്ടിയിൽ ലയിച്ച ശേഷവും കേരള കോൺഗ്രസ് എം എംഎൽഎമാരായി തുടരുന്നതിലെ നിയമപ്രശ്നം ഒഴിവാക്കാനാണ് രാജിവയ്ക്കുന്നതാണ് നല്ലത് എന്ന നിയമോപദേശത്തിൻ്റെ അടിസ്ഥാനത്തിലാണ് രണ്ട് പേരും രാജിവച്ചത്. ഇരുവരുടേയും രാജിക്കത്ത് ലഭിച്ചതായി സ്പീക്കറുടെ ഓഫീസ് അറിയിച്ചു.