ന്യൂ ഡല്‍ഹി:
കേരളത്തിലെ കൊവിഡ് പ്രതിരോധ പ്രവര്‍ത്തനങ്ങളുടെ വിജയം ജനങ്ങള്‍ക്ക് അവകാശപ്പെട്ടതാണെന്ന് കോണ്‍ഗ്രസ് നേതാവ് രാഹുല്‍ ഗാന്ധി. കേരളത്തില്‍ വിവിധ ഘട്ടങ്ങളില്‍ ആരോഗ്യ വിദ്യാഭ്യാസ രംഗത്ത് പുരോഗതിയുണ്ടായി. വര്‍ഷങ്ങളായി കൈവരിച്ച നേട്ടമാണിത്. യുഡിഎഫിന്‍റെയും എല്‍ഡിഎഫിന്‍റെയും കാലഘട്ടത്തില്‍ ഈ രംഗങ്ങളില്‍ വളര്‍ച്ച കൈവരിച്ചു. കൊവിഡിനെതിരെ പോരാടി നേടിയ വിജയം കേരളത്തിലെ ഓരോ ജനതയ്ക്കും അവകാശപ്പെട്ടതാണെന്നും കേരളം മറ്റുള്ളവര്‍ക്ക് ഒരു മാതൃകയാണെന്നും രാഹുല്‍ഗാന്ധി ഓണ്‍ലൈനില്‍ നടത്തിയ സംവാദത്തില്‍ പറഞ്ഞു. അതേസമയം കേന്ദ്ര സര്‍ക്കാറിന്‍റെ സാമ്പത്തിക പാക്കേജിനെ വിമര്‍ശിച്ച അദ്ദേഹം പാക്കേജുകള്‍ കൊണ്ട് കാര്യമില്ലെന്നും കര്‍ഷകര്‍ക്കും തൊഴിലാളികള്‍ക്കും അവരുടെ അക്കൗണ്ടുകളില്‍ നേരിട്ട് പണം ലഭ്യമാക്കണമെന്നും പറഞ്ഞു.