തിരുവനന്തപുരം:
മകൾ ആൻസി എംബിബിഎസ് പഠനം പൂർത്തീകരിച്ച് വീട്ടിലെത്തിയ സന്തോഷം പങ്കിട്ട് കോൺഗ്രസ് നേതാവും എംപിയുമായ ടിഎൻ പ്രതാപൻ. മകളുടെ പഠനവുമായി ബന്ധപ്പെട്ട് ലഭിച്ച സഹായങ്ങളും പിന്നിട്ട വഴികളിൽ അനുഭവിച്ച കഷ്ടതകളും ഉൾപ്പെടെ വികാര നിർഭരമായ കുറിപ്പാണ് അദ്ദേഹം തന്‍റെ ഫേസ്ബുക്കിൽ പങ്കു വെച്ചത്. ‘ഹൗസ് സർജൻസി കഴിഞ്ഞ് അവൾ വീട്ടിലെത്തി. ഒരച്ഛന്‍റെ കണ്ണ് നിറയുകയാണ്; സന്തോഷം, അഭിമാനം’ -അദ്ദേഹം കുറിച്ചു. മകളുടെ പഠനത്തിനാവശ്യമായ ഫീസ് നൽകി സഹായിച്ച എംഎ യൂസഫലിയെ അദ്ദേഹം നന്ദിയോടെ സ്മരിച്ചു.
”ഒരു ദിവസം ആഷിഖിനെ പറ്റിയും ആൻസിയെ പറ്റിയും യൂസഫലിക്ക അന്വേഷിച്ചപ്പോഴാണ് വിവരങ്ങളറിയുന്നത്. ‘ആൻസി എന്‍റെ മകളാണ്. അവളെ ഞാൻ പഠിപ്പിക്കും. നീ വിഷമിക്കണ്ട.’ ഇക്കയുടെ എൻആർഐ അക്കൗണ്ടിൽ നിന്ന് കോളജിലെ അക്കൗണ്ടിലേക്ക് ഫീസ് വന്നുകൊണ്ടിരുന്നു.” -പ്രതാപൻ കുറിച്ചു.