ദുബൈ:
സുഹൃത് രാജ്യങ്ങളെ സഹായിക്കാൻ ലക്ഷ്യമിട്ട് യുഎഇ മറ്റ് രാജ്യങ്ങളിലേക്ക് അയച്ചത് രണ്ട് കോടി ഡോസ് വാക്സിൻ. 26 രാജ്യങ്ങളിലേക്കാണ് യുഎഇയുടെ സഹായമൊഴുകിയത്. അബൂദബി കേന്ദ്രീകരിച്ച് രൂപവത്കരിച്ച ഹോപ്കൺസോർഷ്യത്തിന്റെ നേതൃത്വത്തിലാണ് വാക്സിൻ എത്തിക്കുന്നത്. വാക്സിൻ സ്റ്റോറേജിനായി അബൂദബി പോർട്ടിൽ വമ്പൻ സൗകര്യമൊരുക്കിയിട്ടുണ്ട്.
മറ്റ് രാജ്യങ്ങളിലെ വിമാനത്താവളത്തിൽ എത്തിക്കുക മാത്രമല്ല, ആവശ്യമായ ആശുപത്രികളിലെത്തിച്ചുകൊടുക്കാനും യുഎഇ സൗകര്യമേർപെടുത്തിയിട്ടുണ്ടെന്ന് ഹോപ് കൺസോർഷ്യം ഓപറേഷൻസ് ചെയർമാൻ മുഹമ്മദ് ജമാ അൽ ഷംസി പറഞ്ഞു. മറ്റ് രാജ്യങ്ങളിലേക്ക് ഏറ്റവും എളുപ്പത്തിൽ എത്തിപ്പെടാൻ കഴിയുന്നതിനാലാണ് യുഎഇയിൽ നിന്ന് കൂടുതൽ സഹായം ഏർപെടുത്തുന്നത്.
അബൂദബി ആരോഗ്യ വിഭാഗം, ഇത്തിഹാദ് കാർഗോ, അബൂദബി പോർട്ട് ഗ്രൂപ്പ് തുടങ്ങിയവയുമായി സഹകരിച്ചാണ് വാക്സിൻ ഉൾപെടെയുള്ള മെഡിക്കൽ സഹായങ്ങൾ അയക്കുന്നത്.