ന്യൂഡല്‍ഹി:
ജമ്മു കശ്മീരിൽ 4ജി ഇന്റർനെറ്റ് സേവനം പുനഃസ്ഥാപിക്കണമെന്ന ഹർജിയിൽ ഉന്നതാധികാര സമിതി രൂപീകരിക്കാന്‍ സുപ്രീംകോടതിയുടെ നിര്‍ദേശം. ആഭ്യന്തര മന്ത്രാലയം, വാർത്താ വിനിമയ മന്ത്രാലയം, ജമ്മു കശ്മീർ ചീഫ് സെക്രട്ടറി തുടങ്ങിയവരുള്‍പ്പെടുന്ന ഉന്നതതല സമിതിയെ രൂപീകരിക്കാനാണ് നിര്‍ദേശിച്ചിരിക്കുന്നത്. 4ജി അനുവദിക്കുന്നതുമായി ബന്ധപ്പെട്ട വിഷയങ്ങൾ സമിതി പരിഗണിക്കണമെന്ന് ജസ്റ്റിസ് എൻവി രമണ അധ്യക്ഷനായ ബെഞ്ച് നിർദേശിച്ചു.
നിലവിൽ ലഭിക്കുന്ന 2ജി ഇൻറർനെറ്റ് സേവനം ലോക്ഡൗൺ സമയത്ത് വിദ്യാഭ്യാസത്തിനും ആരോഗ്യത്തിനും വാണിജ്യത്തിനും പര്യാപ്തമല്ലെന്ന് ചൂണ്ടികാട്ടിയാണ് കോടതിയില്‍ ഹര്‍ജി. ഫ്രീഡം ഫോർ മീഡിയ പ്രെഫഷനൽസ് , പ്രൈവറ്റ് സ്കൂൾ അസോസിയേഷൻ ജമ്മുകശ്മീർ എന്നിവരാണ് കോടതിയില്‍ ഹര്‍ജി സമര്‍പ്പിച്ചത്.
നേരത്തെ, മോശം ഇൻറർനെറ്റ് ബന്ധം മൂലം ഡോക്ടർമാർക്ക് കൊവിഡ് ചികിത്സയുമായി ബന്ധപ്പെട്ട വിവരങ്ങൾ ലഭ്യമാകുന്നില്ലെന്ന് ഹര്‍ജിക്കാർക്ക് വേണ്ടി ഹാജരായ മുതിർന്ന അഭിഭാഷകൻ ഹുസെഫ അഹ്മദി കോടതിയില്‍ വാദിച്ചിരുന്നു.