ന്യൂഡല്‍ഹി:
കടുത്ത സാമ്പത്തിക പ്രതിസന്ധിയണ് രാജ്യം നേരിടുന്നതെന്നും ഈ വിഷമഘട്ടത്തെ തരണം ചെയ്യാന്‍ പ്രധാനമന്ത്രിയുടെ ഓഫിസിന് തനിച്ച് കഴിയില്ലെന്നും റിസർവ് ബാങ്ക് മുൻ ഗവർണർ രഘുറാം രാജൻ. ഈ അവസ്ഥ മറികടക്കാൻ രാഷ്ട്രീയ ഭിന്നത നോക്കാതെ പ്രതിപക്ഷ നിരയിലുള്ള പ്രതിഭകളുടെ സഹായവും തേടണമെന്ന് അദ്ദേഹം ആവശ്യപ്പെട്ടു. ദി വയറിന് നല്‍കിയ അഭിമുഖത്തിലാണ് അദ്ദേഹം ഇക്കാര്യം വ്യക്തമാക്കിയത്.
‘ഏറ്റവും മോശം സാഹചര്യത്തിലൂടെയാണ് കാര്യങ്ങൾ പോകുന്നത്. ഇന്ത്യയുടെ സാമ്പത്തിക സാധ്യതകൾക്ക് ഭീഷണിയാണ് ഈ പ്രതിസന്ധി. രാജ്യം നേരിടുന്ന ദുരന്തത്തിന്‍റെ വ്യാപ്തിയെക്കുറിച്ച് താന്‍ വളരെയധികം ആശങ്കാകുലനാണ്. ഇതെല്ലാം തരണം ചെയ്യാൻ പ്രധാനമന്ത്രിയുടെ ഓഫിസിന് കഴിയില്ല. കഴിവുറ്റവരെ പുറത്തു നിന്നും കൊണ്ടുവരണം. രാജ്യത്തെ മികച്ച പ്രതിഭകളുമായി സർക്കാർ കൂടിയാലോചിക്കണം. അവരുടെ രാഷ്ട്രീയം എന്താണെന്ന് നോക്കേണ്ടതില്ല’ എന്നാണ് അദ്ദേഹം പറഞ്ഞത്.
മാത്രമല്ല, ബിജെപിയില്‍ തന്നെ കഴിവു തെളിയിച്ച മുന്‍ ധനമന്ത്രിമാരുണ്ട്. ഇവരുടെ ഉപദേശം ചെവിക്കൊളളണം. വൈറസിനെ നേരിടുന്നതിനൊപ്പം തന്നെ സുപ്രധാനമാണ് സമ്പദ് മേഖലയുടെ പുനരുജ്ജീവനമെന്നും അദ്ദേഹം പറഞ്ഞു.