കോട്ടയം:
ബി.ഡി.ജെ.എസിന് അനുവദിച്ച മൂന്ന് സീറ്റുകളിൽ സ്ഥാനാർഥികളെ പ്രഖ്യാപിച്ചു. ബിജു കൃഷ്ണൻ (ഇടുക്കി), തഴവ സഹദേവൻ (മാവേലിക്കര), ടി.വി ബാബു (ആലത്തൂർ) എന്നിവരാണ് മത്സരിക്കുന്നത്. തൃശൂർ, വയനാട് സീറ്റുകളിൽ സ്ഥാനാർഥികളെ രണ്ടു ദിവസത്തിനകം പ്രഖ്യാപിക്കും. ചേർത്തലയിൽ വിളിച്ച് ചേര്‍ത്ത വാര്‍ത്താ സമ്മേളനത്തില്‍ ബി.ഡി.ജെ.എസ് അദ്ധ്യക്ഷന്‍ തുഷാര്‍ വെള്ളാപ്പള്ളിയാണ് സ്ഥാനാർഥികളെ പ്രഖ്യാപിച്ചത്. രാഹുൽഗാന്ധി വയനാട്ടിൽ മൽസരിച്ചേക്കുമെന്ന അഭ്യൂഹമാണ് വയാനാട്, തൃശൂര്‍ സീറ്റുകളുടെ കാര്യത്തില്‍ പ്രഖ്യാപനം നീട്ടിവെക്കാൻ കാരണമെന്നാണ് സൂചന.
വയാനാട്, തൃശൂര്‍ മണ്ഡലങ്ങളില്‍ രണ്ടു ദിവസത്തിനകം സ്ഥാനാർത്ഥിയെ പ്രഖ്യാപിക്കുമെന്ന് തുഷാര്‍ നേരത്തെ അറിയിച്ചിരുന്നു. കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി വയനാട് മത്സരിക്കാനെത്തിയാല്‍ ബി.ജെ.പിക്ക് സീറ്റ് വിട്ടുകൊടുക്കാന്‍ തടസമില്ല. സീറ്റുകള്‍ വച്ചുമാറുന്നതു സംബന്ധിച്ച്‌ ആലോചനകളൊന്നും നടന്നിട്ടില്ലെന്നും അദ്ദേഹം പറഞ്ഞു. യു.ഡി.എഫ് സ്ഥാനാർത്ഥിയായി കോൺഗ്രസ് അധ്യക്ഷൻ രാഹുൽഗാന്ധി വയനാട്ടിലെത്തിയാൽ എതിരേ തുഷാർ വെള്ളാപ്പള്ളി മത്സരിക്കാനാണ് സാധ്യത.
തങ്ങൾക്കുകിട്ടിയ സീറ്റ് ബി.ജെ.പി.ക്ക് തിരിച്ചുനൽകേണ്ടതില്ലെന്നും തൃശ്ശൂരിനു പകരം തുഷാർ വയനാട്ടിൽ മത്സരിക്കട്ടേയെന്നുമുള്ള വികാരമാണ് ബി.ഡി.ജെ.എസിനുള്ളത്. ഇക്കാര്യം ബി.ജെ.പി. നേതൃത്വത്തിനുമുന്നിലെത്തിയതായും സൂചനയുണ്ട്. അതേസമയം ബി.ഡി.ജെ.എസുമായി തര്‍ക്കങ്ങളില്ലെന്ന് ബി.ജെ.പി സംസ്ഥാന അധ്യക്ഷന്‍ ശ്രീധരന്‍ പിള്ള അറിയിച്ചു.
വയനാട്ടിൽ കോൺഗ്രസ് സ്ഥാനാർത്ഥി ആരാകും എന്നറിയും വരെ തൃശ്ശൂർ, വയനാട് സീറ്റുകളിൽ ബി.ഡി.ജെ.എസിന്‍റെ സ്ഥാനാർത്ഥികളെ പ്രഖ്യാപിക്കില്ല. രാഹുൽ വയനാട്ട് മത്സരിച്ചാൽ എൻ.ഡി.എ.യ്ക്ക് കരുത്തനായ സ്ഥാനാർത്ഥി വേണമെന്നാണ് ബി.ജെ.പി ആഗ്രഹിക്കുന്നത്. അതിനായി സീറ്റു തിരിച്ചെടുക്കുകയോ ബി.ഡി.ജെ.എസിലെ പ്രമുഖരെ മത്സരിപ്പിക്കുകയോ വേണമെന്നാണ് ആലോചന. പാർട്ടിയുടെതന്നെ പ്രതിനിധി വേണമെന്ന ആവശ്യത്തിനാണ് മുൻതൂക്കം. ഇതിനിടെയാണ് തുഷാർ മത്സരിക്കണമെന്ന ആവശ്യം അദ്ദേഹത്തിന്റെ പാർട്ടിയിൽ ഉയർന്നത്. ഇക്കാര്യം ബി.ജെ.പി. ദേശീയ അധ്യക്ഷൻ അമിത് ഷായ്ക്കുമുന്നിൽ എത്തിയതായാണ് വിവരം.
ഏതായാലും വയനാട് സീറ്റ് തിരിച്ചുനൽകുന്ന പ്രശ്‌നമില്ലെന്ന് ബി.ഡി.ജെ.എസ്. വൃത്തങ്ങൾ പറയുന്നു. തുഷാറാണ് വയനാട്ടിലെങ്കിൽ തൃശ്ശൂരിൽ മറ്റാരെയെങ്കിലും കണ്ടെത്തും. കോൺഗ്രസിന്‍റെ പ്രഖ്യാപനം കാത്തിരിക്കുകയാണ് ഇരുപാർട്ടികളും. തുഷാറിനെ വയനാട്ടിൽ മത്സരിപ്പിക്കാനുള്ള സാധ്യതയെപ്പറ്റി എസ്.എൻ.ഡി.പി. യോഗം ജനറൽ സെക്രട്ടറികൂടിയായ വെള്ളാപ്പള്ളി നടേശനും അടുപ്പമുള്ളവരോട് ആരാഞ്ഞിട്ടുമുണ്ട്. ജയസാധ്യതയല്ല, ദേശീയശ്രദ്ധ കിട്ടുമെന്നതാണ് തുഷാറിനെ വയനാട്ടിലേക്ക് ആകർഷിക്കുന്നത്.
എന്നാല്‍ രാഹുൽഗാന്ധിക്കെതിരേ വയനാട് സീറ്റിൽ സ്വന്തം സ്ഥാനാർത്ഥി മത്സരിക്കണമെന്ന്‌ ബി.ജെ.പി. കോർ കമ്മിറ്റിയിൽ നേരത്തെ ആവശ്യം ഉയര്‍ന്നിരുന്നു. എന്നാൽ, ഇക്കാര്യത്തിൽ തീരുമാനം എടുക്കേണ്ടത് ദേശീയതലത്തിലാണെന്നാണ് സംസ്ഥാന നേതൃത്വം നിലപാട് എടുത്തത്. രാഹുൽ കേരളത്തിൽ തിരഞ്ഞെടുപ്പിനെ നേരിടുമെന്ന്‌ ദേശീയഘടകം കരുതുന്നില്ല. മത്സരിക്കുകയാണെങ്കിൽ അപ്പോൾ അതേപ്പറ്റി ആലോചിക്കാമെന്നാണ് നിലപാട്. എങ്കിലും യോഗത്തിലുണ്ടായ വികാരം ദേശീയ നേതൃത്വത്തെ അറിയിക്കും.