ദോഹ:
ഹമദ് മെഡിക്കൽ കോർപറേഷൻ (എച്ച്എംസി) നടത്തുന്ന അവയവ മാറ്റിവെക്കൽ പദ്ധതിക്ക് വൻ വിജയം. രാജ്യത്ത് വർഷങ്ങളായി വൃക്ക മാറ്റിവെക്കൽ ശസ്ത്രക്രിയാപദ്ധതി വിജയകരമായി നടക്കുന്നുണ്ട്. ഇത്തരത്തിലുള്ള നിരവധി ശസ്ത്രക്രിയകൾ നടത്തുകയും ഏറെ പേരുടെ വൃക്ക വിജയകരമായി മാറ്റിവെക്കുകയും ചെയ്തിട്ടുണ്ട്.
ഇതിന്റെ ബലത്തിലും മുൻകാല വിജയം നൽകുന്ന ആത്മവിശ്വാസത്തിലുമാണ് രാജ്യത്ത് ഉടൻ ശ്വാസകോശം മാറ്റിവെക്കൽ ശസ്ത്രക്രിയയും പാൻക്രിയാസിസ് (ആഗ്നേയഗ്രന്ഥി) മാറ്റിവെക്കൽ ശസ്ത്രക്രിയയും നടക്കുകയെന്ന് അധികൃതർ അറിയിച്ചു. ആഴ്ചകൾക്കുള്ളിൽ ഖത്തറിലെ ആദ്യ ശ്വാസകോശം മാറ്റിവെക്കൽ ശസ്ത്രക്രിയ നടക്കുമെന്ന് ഹമദ് ജനറൽ ഹോസ്പിറ്റൽ മെഡിക്കൽ ഡയറക്ടറും അവയവം മാറ്റിവെക്കൽ കേന്ദ്രത്തിൻ്റെ ഡയറക്ടറുമായ ഡോ യൂസഫ് അൽ മസ്ലമാനി പറഞ്ഞു.