കണ്ണൂർ:
കണ്ണൂർ കല്യാശ്ശേരിയിൽ രണ്ട് എടിഎമ്മുകൾ തകർത്ത് 20 ലക്ഷത്തോളം രൂപ കവർന്നു. മാങ്ങാട്ട് ബസാറിൽ ദേശീയപാതയോരത്തെ ഇന്ത്യ വണിന്റെ എടിഎം തകർത്ത് 1,75, 500 രൂപയും കല്യാശ്ശേരിയിലെ എസ്ബിഐ എടിഎം തകർത്ത് 18 ലക്ഷത്തോളം രൂപയും കവർന്നതായാണ് റിപ്പോർട്ട്.
റൂമിന്റെ ഷട്ടർ താഴ്ത്തി ഗ്യാസ് കട്ടർ ഉപയോഗിച്ചാണ് ഇരു എടിഎമ്മുകളും പൂർണമായി തകർത്തത്. ഞായറാഴ്ച പുലർച്ചയാണ് കവർച്ചകൾ നടന്നതെന്നാണ് പ്രാഥമിക നിഗമനം. കവർച്ചസംഘം മാങ്ങാട് തെരു കള്ളുഷാപ്പിനു സമീപത്തെ ആൾത്താമസമുള്ള മുറിയിൽ കയറി കവർച്ചക്കു ശ്രമിച്ചെങ്കിലും ഉറക്കമുണർന്ന താമസക്കാർ ബഹളംവെച്ചതോടെ ഇവർ രക്ഷപ്പെടുകയായിരുന്നു.
സംഘത്തിൽ മൂന്നുപേർ ഉണ്ടായിരുന്നതായി മുറിയിലെ താമസക്കാർ പറഞ്ഞു. കണ്ണൂരിൽനിന്ന് ഫോറൻസിക് വിഭാഗവും ഡോഗ് സ്ക്വാഡും എത്തി പരിശോധന നടത്തി. കണ്ണപുരം എസ്ഐ പരമേശ്വരന്റെ നേതൃത്വത്തിൽ പൊലീസ് അന്വേഷണം ഊർജിതപ്പെടുത്തി.
https://www.youtube.com/watch?v=pEucMkSqasg