ന്യൂഡൽഹി:
ലഡാക്കിലെ പാങ്ഗോങ് തടാകക്കരയിൽ നിന്ന് ചൈനീസ് സൈന്യം പിന്മാറിയതിന്‍റെ ഉപഗ്രഹ ചിത്രങ്ങൾ പുറത്ത്. മാക്സർ ടെക്നോളജീസ് ആണ് പാങ്ഗോങ് തടാകക്കരയുടെ ചൊവ്വാഴ്ച മുതലുള്ള ഉപഗ്രഹ ചിത്രങ്ങൾ പുറത്തുവിട്ടത്.പാങ്ഗോങ് തടാകത്തിന്‍റെ തെക്ക്-വടക്ക് മേഖലകളില്‍ നിന്ന് ഇന്ത്യ-ചൈന സൈന്യം പിന്മാറാൻ ധാരണയിലെത്തിയിരുന്നു.
ഇന്ത്യ-ചൈന അതിര്‍ത്തിയില്‍ ഇരുരാജ്യങ്ങളും സേനാ പിന്‍മാറ്റം തുടങ്ങിയതായി പ്രതിരോധ മന്ത്രി രാജ്‌നാഥ്‌സിങ് രാജ്യസഭയിൽ അറിയിച്ചതിന് പിന്നാലെയാണ് പിന്മാറുന്നതിന്‍റെ വീഡിയോ ഇന്ത്യൻ സൈന്യം പുറത്തുവിട്ടത്.ടെന്‍റുകളും ബങ്കറുകളുമായി മലകൾക്ക് മുകളിലൂടെ നടന്നു നീങ്ങുന്ന ചൈനീസ് സൈനികരെ ദൃശ്യങ്ങളിൽ കാണാം. ഏപ്രിലിന് ശേഷമുളള നിർമ്മാണ പ്രവര്‍ത്തനങ്ങൾ ഇരുരാജ്യങ്ങളും നീക്കുമെന്നും ചില വിഷയങ്ങളില്‍ കൂടി ധാരണയാകാനുണ്ടെന്നും രാജ്‌നാഥ് സിങ് അറിയിച്ചിരുന്നു.