ക്രീസിലുറച്ച്​ കോഹ്​ലി​,തകർത്തടിച്ച്​ അശ്വിൻ; ഇംഗ്ലണ്ടിന്​ നെഞ്ചിടിപ്പ് കൂടുന്നു

ചെന്നൈ:

ബാറ്റ്​സ്​മാൻമാരുടെ ശവപ്പറമ്പായ ചെപ്പോക്ക്​ സ്​റ്റേഡിയത്തിൽ ഇംഗ്ലീഷ്​ സ്​പിൻ ബൗളർമാരെ അതിജീവിച്ച്​ ഇന്ത്യ ലീഡുയർത്തുന്നു. തുടക്കത്തിൽ തകർച്ചക്ക്​ ശേഷം ക്രീസിലുറച്ച നായകൻ വിരാട്​ കോഹ്​ലിയും(56) ഏഴാമതായി ഇറങ്ങി ആത്മവിശ്വാസത്തോടെ ബാറ്റുചെയ്​ത രവിചന്ദ്രൻ അശ്വിനുമാണ് (50)​ ഇന്ത്യയെ
മുന്നോട്ട്​ നയിക്കുന്നത്​. ആറുവിക്കറ്റ്​ നഷ്​ടത്തിന്​ 190 റൺസെന്ന നിലയിലാണ് ഇന്ത്യ. ആകെ ലീഡ്​ 385 റൺസായതോടെ ഇംഗ്ലണ്ടിന്​ ചങ്കിടിപ്പേറി.

ഒരുവിക്കറ്റിന്​ 54 എന്ന നിലയിൽ മൂന്നാംദിനം ബാറ്റിങ്ങിനിറങ്ങിയ ഇന്ത്യ തുടക്കം തകർച്ചയോടെയായിരുന്നു. 7 റൺസുമായി ചേതേശ്വർ പുജാര റൺ ഔട്ടായി മടങ്ങി. വൈകാതെ ജാക്​ ലീഷിന്‍റെ പന്തിൽ സ്റ്റംപിങ്ങിനിരയായി 26 റൺസുമായി രോഹിത്​ ശർമയും തിരികെ നടന്നു. ഋഷഭ്​ പന്ത്​ (8), അജിൻക്യ രഹാനെ (10), അക്​സർ പ​ട്ടേൽ (7) എന്നിവരും കാര്യമായ സംഭാവനകളില്ലാതെ മടങ്ങിയപ്പോഴും ഒരുവശത്ത് കോഹ്​ലി ക്രീസിലുറച്ചുനിൽക്കുകയായിരുന്നു.

കഴിഞ്ഞ ഇന്നിങ്​സിലെ പിഴവ്​ സംഭവിക്കാതിരിക്കാൻ പഴുതടച്ച പ്രതിരോധവുമായാണ് കോഹ്‌ലി​ ബാറ്റേന്തിയത്​. ഏഴാമനായി ബാറ്റിങ്ങിനെത്തിയ അശ്വിനാക​ട്ടെ, മുൻനിരയെ കവച്ചുവെക്കുന്ന പ്രകടനമാണ്​ നടത്തിയത്​.