കമ്പ്യൂട്ടർ ഭാഷകൾ പഠിച്ച്​ അധ്യാപകരെ ഞെട്ടിച്ച് അമൻ

കൊടിയത്തൂർ:

2020ലെ കോവിഡ്​ അവധിയിൽ സമയം പോവാതെ മുഷിഞ്ഞ്​ വീർപ്പുമുട്ടിയവരായിരിക്കും പലരും. പുറത്തുപോവാനാവാതെ കമ്പ്യൂട്ടർ ഗെയിമും മൊബൈലും ടി വിയുമായെല്ലാം കഴിച്ചുകൂട്ടി കാലം നീക്കി. എന്നാൽ, ഈ സമയം കമ്പ്യൂട്ടർ ഭാഷകൾ പഠിച്ച്​ സ്​കൂൾ അധ്യാപകരെ ഞെട്ടിച്ച ഒരു മിടുക്കനുണ്ട്​ പായൂർ ചിറ്റാലിപിലാക്കലിൽ.

കൊടിയത്തൂർ വാദിറഹ്​മ സ്​കൂളിലെ പത്താം ക്ലാസ്​ വിദ്യാർഥിയായ അമൻ കെ.എം ആണ്​ കോഡിങ്ങുകൾ കാണാപാഠം പഠിച്ചെടുത്ത്​ വിവര സാ​ങ്കേതിക വിദ്യാ ലോകത്തെ വരുതിയിലാക്കിയത്​. എല്ലാം സ്വന്തമായി ഇൻറർനെറ്റിൽ പരതിയും വായിച്ചുമാണ്​ പഠിച്ചത്​. സംശയങ്ങൾ അറിവുള്ളവരോട്​ ചോദിച്ച്​ തീർത്തു. അമൻ്റെ മിടുക്ക്​ നേരത്തെ മനസിലാക്കിയിരുന്ന സ്​കൂൾ അധികൃതർക്ക്​ ഇതൊരു അത്​ഭുമായിരുന്നില്ല. ആ കൊച്ചു മിടുക്കുനിൽ നിന്ന്​ അവർ ഇനിയും പ്രതീക്ഷിക്കുന്നുണ്ട്​.

അഞ്ചാം ക്ലാസിലെത്തിയപ്പോഴേക്കും അമൻ കോഡിങ്​ ലോകത്തെ പ്രാഥമിക കാര്യങ്ങൾ മനസിലാക്കിയിരുന്നു. പിതാവ്​ അബ്​ദുസ്സലാ​മിൻ്റെ സ്​ഥാപനത്തിലെ വൈഫൈ ഉപയോഗപ്പെടുത്തിയാണ്​ ഇൻറർനെറ്റ്​ ലോകത്തു നിന്നും അക്കാര്യങ്ങൾ മനസിലാക്കിയത്​. ഒന്നു രണ്ടു വർഷങ്ങൾക്കുള്ളിൽ പല പ്രോഗ്രാമിങ് ലാംഗ്വേജുകളിലും പഠിച്ചെടുത്തു. ഇപ്പോൾ ജാവ സ്​ക്രിപ്​റ്റും എച്ച്​ ടി എം എല്ലും സി എസ്​ എസും ആൻഡ്രോയിഡുമെല്ലാം അമനിൻ്റെ വിരൽതുമ്പിൽ അനായാസം വഴങ്ങും.