ഇസ്ലാമാബാദ്: പാകിസ്താന് മുന് പ്രധാനമന്ത്രി ഇമ്രാന് ഖാനെതിരെ ഗുരുതര ആരോപണങ്ങളുമായി പാകിസ്താന് ആരോഗ്യമന്ത്രി അബ്ദുല് ഖാദിര് പട്ടേല്. ഇമ്രാന് ഖാന്റെ അറസ്റ്റിന് പിന്നാലെ നടത്തിയ വൈദ്യപരിശോധനയില് ഇമ്രാന് ഖാന് മദ്യവും കൊക്കെയ്നും ഉപയോഗിച്ചിട്ടുണ്ടെന്ന് തെളിഞ്ഞതായാണ് ആരോഗ്യ മന്ത്രിയുടെ വെളിപ്പെടുത്തല്. ഇസ്ലാമാബാദിലെ പാകിസ്ഥാന് ഇന്സ്റ്റിറ്റ്യൂട്ട് ഓഫ് മെഡിക്കല് സയന്സില് നടത്തിയ പരിശോധനയിലാണ് ഇക്കാര്യം വ്യക്തമായതെന്നും ആരോഗ്യമന്ത്രി പറഞ്ഞു. അറസ്റ്റിലാകുന്ന സമയത്ത് ഇമ്രാന് ഖാന് സ്വബോധത്തിലായിരുന്നില്ലെന്നും, ആ സാഹചര്യം കണക്കിലെടുത്ത് ഇമ്രാനെ അന്നു തന്നെ വൈദ്യപരിശോധനയ്ക്ക് വിധേയനാക്കിയെന്ന് മന്ത്രി പറഞ്ഞു. അറസ്റ്റിന് പിന്നാലെ, പാകിസ്താനിലെ പ്രമുഖ സൈക്കോളജിസ്റ്റ് ഡോ. റിസ് വാന് താജ്, ഓര്ത്തോപീഡിക് മെഡിസിന് വിദഗ്ധര് തുടങ്ങിയവര് ഉള്പ്പെടുന്ന അഞ്ചംഗ മെഡിക്കല് ബോര്ഡ് രൂപീകരിച്ചിരുന്നതായും അദ്ദേഹം വ്യക്തമാക്കി. മെയ് ഒമ്പതിനാണ് ഇമ്രാന് ഖാന് അറസ്റ്റിലാകുന്നത്. മൂത്രസാമ്പിളുകളില് മദ്യത്തിന്റെയും കൊക്കെയ്നിന്റെയും സാന്നിധ്യത്തിന്റെ തെളിവുകള് കണ്ടെത്തിയതിനാല് ഇമ്രാന് നിയമവിരുദ്ധമായ ലഹരിവസ്തുക്കള് പതിവായി ഉപയോഗിക്കുന്നയാളാണെന്ന് മെഡിക്കല് ബോര്ഡ് കണ്ടെത്തിയതായും ആരോഗ്യമന്ത്രി വ്യക്തമാക്കി.