വനിതകളുടെ 100 മീറ്ററിലെ മുന്‍ ലോകചാമ്പ്യനും ഒളിമ്പിക് മെഡല്‍ ജേതാവുമായ അമേരിക്കന്‍ അത്ലറ്റ് ടോറി ബോവി (32) അന്തരിച്ചു. ബുധനാഴ്ച ഫ്‌ളോറിഡയിലെ വീട്ടില്‍ മരിച്ചനിലയില്‍ കണ്ടെത്തുകയായിരുന്നു. മരണകാരണം വ്യക്തമല്ല. 2017-ലെ ലണ്ടന്‍ ലോക ചാമ്പ്യന്‍ഷിപ്പില്‍ 100 മീറ്റര്‍ ഓട്ടത്തിലെ സ്വര്‍ണജേതാവാണ്. 4×100 മീറ്റര്‍ റിലേ സ്വര്‍ണം നേടിയ അമേരിക്കന്‍ ടീമംഗവുമാണ്. 2015 ബെയ്ജിങ് ലോക ചാമ്പ്യന്‍ഷിപ്പില്‍ 100 മീറ്ററില്‍ വെള്ളി നേടി.
2016 റിയോ ഒളിമ്പിക്‌സില്‍, 4×100 റിലേ സ്വര്‍ണം നേടിയ അമേരിക്കന്‍ ടീമംഗമായിരുന്നു. റിയോയില്‍ 100 മീറ്ററില്‍ വെള്ളിയും 200 മീറ്ററില്‍ വെങ്കലവും നേടി.
ലണ്ടനില്‍, 10.85 സെക്കന്‍ഡില്‍ 100 മീറ്റര്‍ പൂര്‍ത്തിയാക്കിയാണ് സ്വര്‍ണം നേടിയത്. 10.78 സെക്കന്‍ഡാണ് 100 മീറ്ററില്‍ ടോറിയുടെ മികച്ച സമയം.