കിയവ്:
റഷ്യൻ അധിനിവേശത്തെ ചെറുക്കാൻ നാറ്റോയോട് കൂടുതൽ യുദ്ധവിമാനങ്ങളും വ്യോമ പ്രതിരോധ സംവിധാനങ്ങളും ആവശ്യപ്പെട്ട് യുക്രൈൻ. അമേരിക്കൻ സ്റ്റേറ്റ് സെക്രട്ടറി ആന്റണി ബ്ലിങ്കെനുമായി പോളണ്ടിൽ വെച്ച് നടത്തിയ കൂടിക്കാഴ്ചയിലാണ് യുക്രൈൻ വിദേശകാര്യ മന്ത്രി ഡിമിട്രോ കുലേബ ഈ ആവശ്യമുന്നയിച്ചത്. അതേസമയം, മരിയുപോളിൽ താൽക്കാലിക വെടിനിർത്തൽ പരാജയപ്പെട്ടതിനെത്തുടർന്ന് റഷ്യ ആക്രമണം പുനരാരംഭിച്ചു.
യുക്രൈൻ്റെ ആകാശത്ത് റഷ്യൻ വിമാനങ്ങൾക്ക് വിലക്കേർപ്പെടുത്താൻ നാറ്റോ ‘നോ ഫ്ലൈ സോൺ’ പ്രഖ്യാപിക്കണമെന്നും യുക്രൈൻ ആവശ്യപ്പെട്ടു. എന്നാൽ, ഈ ആവശ്യം റഷ്യയുമായി സമ്പൂർണ യുദ്ധത്തിനുള്ള പ്രകോപനമാകുമെന്ന് ചൂണ്ടിക്കാട്ടി നാറ്റോ നിരസിച്ചു. ‘നോ ഫ്ലൈ സോൺ’ പ്രഖ്യാപിച്ചാൽ യുക്രൈനുമായി മാത്രമല്ല, നാറ്റോയുമായിതന്നെ തങ്ങൾ യുദ്ധത്തിന് തയാറാണെന്ന് പുടിൻ മുന്നറിയിപ്പ് നൽകി.