കൊല്ലം:
എന്തേലും രോഗം പിടിപെട്ട്‌ വിവിധ ആശുപത്രികൾ കയറിയിറങ്ങൂമ്പോൾ നേരത്തെ കാണിച്ച ആശുപത്രിയിലെ ഡോക്ടറുടെ നിർദേശങ്ങൾ എന്തൊക്കെ എന്ന ചോദ്യം വരാറില്ലേ. പലപ്പോഴും ഇത്‌ രോഗികളുടെ കൈയിൽ ഉണ്ടാകില്ല. ഇതിനൊക്കെ പരിഹാരമായി ഒരാളുടെ ആരോഗ്യ വിവരങ്ങൾ അടങ്ങിയ ഇ ഹെൽത്ത് പദ്ധതി ജില്ലയിൽ വിപുലീകരിക്കുന്നു.
തഴവ പ്രാഥമികാരോഗ്യ കേന്ദ്രം, ശക്തികുളങ്ങര, എഴുകോൺ, പവിത്രേശ്വരം കുടുംബാരോഗ്യ കേന്ദ്രങ്ങളെകൂടി പദ്ധതിയിൽ ഉൾപ്പെടുത്തി. ഇതോടെ ഇ–ഹെൽത്ത് പദ്ധതി നടപ്പാക്കിയ സ്ഥാപനങ്ങളുടെ എണ്ണം ജില്ലയിൽ 16 ആയി.
സംസ്ഥാന സർക്കാരിന്റെ ആർദ്രം പദ്ധതിയുടെ ഭാഗമായാണ്‌ ഇ –ഹെൽത്ത് നടപ്പാക്കുന്നത്‌.
വിളക്കുടി, അഴീക്കൽ, ആലപ്പാട്, വെസ്റ്റ് കല്ലട, കരവാളൂർ, പൂയപ്പള്ളി, വള്ളിക്കാവ്, നെടുവത്തൂർ, പെരിനാട് എന്നീ ആരോഗ്യ കേന്ദ്രങ്ങളും ഉടൻ പദ്ധതിയുടെ ഭാഗമാകും. പുതുതായി പദ്ധതിയുടെ ഭാഗമായ 50 സ്ഥാപനങ്ങളെ ഉൾപ്പെടുത്തി സംസ്ഥാനതല ഉദ്ഘാടനം മുഖ്യമന്ത്രി പിണറായി വിജയൻ ഓൺലൈനായി ഞായറാഴ്ച നിർവഹിക്കും. ആരോഗ്യ മന്ത്രി വീണ ജോർജ് അധ്യക്ഷയാകും. എല്ലാ ആരോഗ്യ കേന്ദ്രങ്ങളിലും ഉദ്ഘാടന പരിപാടി തത്സമയം കാണാനാകും.