Reading Time: < 1 minute
ഇസ്​ലാമാബാദ്​:

വരാനിരിക്കുന്ന ഗുരുനാനാക്ക് ദേവിന്‍റെ ജന്മദിന ആഘോഷങ്ങൾക്കായി കർതാർപൂർ ഇടനാഴി വീണ്ടും തുറക്കണമെന്നും സിഖ് തീർത്ഥാടകരെ പുണ്യസ്ഥലം സന്ദർശിക്കാൻ അനുവദിക്കണമെന്നും പാകിസ്​താൻ ഇന്ത്യയോട് ആവശ്യപ്പെട്ടു. 2019 നവംബർ ഒമ്പതിനാണ്​ കർതാർപൂർ ഇടനാഴി ഉദ്​ഘാടനം ചെയ്​തത്​. പാക്​ പ്രധാനമന്ത്രി ഇമ്രാൻ ഖാനാണ് ഉദ്​ഘാടനം നിർവഹിച്ചത്​.

എന്നാൽ, ഇടനാഴി തുറന്ന് മാസങ്ങൾക്കുള്ളിൽ കൊവിഡ്​ വ്യാപനത്തെ തുടർന്ന്​ ഇവിടം അടക്കുകയായിരുന്നു. ഇന്ത്യ ഇതുവരെ ഇടനാഴിയിലൂടെ യാത്ര അനുവദിച്ചിരുന്നില്ല. നവംബർ 17 മുതൽ 26 വരെ നടക്കാനിരിക്കുന്ന ഗുരുനാനാക്ക് ജന്മദിന ആഘോഷങ്ങൾക്കായി ഇന്ത്യയിൽ നിന്നുള്ള ഭക്തർക്ക് ആതിഥ്യം വഹിക്കാൻ ഞങ്ങൾ ആഗ്രഹിക്കുന്നു. അതിനായി ഇടനാഴി വീണ്ടും തുറക്കണം -പാക്​ വിദേശകാര്യ വകുപ്പ്​ പത്രക്കുറിപ്പിൽ പറയുന്നു.

നാല്​ കിലോമീറ്റർ ദൈർഘ്യമുള്ള കർതാർപൂർ ഇടനാഴി ഇന്ത്യയിലെ സിഖ് തീർത്ഥാടകർക്ക് ഗുരുദ്വാര സന്ദർശിക്കാൻ വിസ രഹിത പ്രവേശനം നൽകുന്നതാണ്​. അനുകൂല ഇടപെടൽ ഉണ്ടാകുമെന്ന പ്രതീക്ഷയിലാണ്​ സിഖ്​ സമൂഹം.

Advertisement