കൊച്ചി: മുഖ്യമന്ത്രിയുമായി കൂടിക്കാഴ്ച നടത്തി മുനമ്പം സമര സമിതി അംഗങ്ങള്. എറണാകുളം ഗസ്റ്റ് ഹൗസില് വച്ചായിരുന്നു കൂടിക്കാഴ്ച. വിഷയത്തില് ഈ മാസം 22ന് ഉന്നതതല യോഗം ചേരുമെന്ന് കൂടിക്കാഴ്ചക്ക് ശേഷം മന്ത്രി പി രാജീവ് പറഞ്ഞു. മുനമ്പം ഭൂമി പ്രശ്നവുമായി ബന്ധപ്പെട്ട് ആരെയും കുടിയൊഴിപ്പിക്കില്ലെന്നും മന്ത്രി പറഞ്ഞു.
‘ഒരാളും ഇറങ്ങിപ്പോകുന്ന സാഹചര്യം ഉണ്ടാകില്ലെന്നതാണ് സര്ക്കാരിന്റെ നിലപാടെന്ന് മുഖ്യമന്ത്രി നേരത്തേ വ്യക്തമാക്കിയിട്ടുണ്ട്. വേണ്ട നടപടികള് സ്വീകരിച്ചിരുന്നു. പ്രശ്നങ്ങള് ശാശ്വതമായി പരിഹരിക്കാന് ഒരു ഉന്നതതല യോഗം ചേരാന് തീരുമാനിച്ചിരുന്നു. തിരഞ്ഞെടുപ്പ് പ്രഖ്യാപിച്ച സാഹചര്യത്തിലാണ് മാറ്റിവെക്കേണ്ടിവന്നത്. ഉപതിരഞ്ഞെടുപ്പ് കഴിഞ്ഞശേഷം 22ന് യോഗം ചേരും’, മന്ത്രി രാജീവ് കൂട്ടിച്ചേര്ത്തു.
സമരം പിന്വലിക്കുന്ന കാര്യത്തില് തീരുമാനമെടുത്തിട്ടില്ലെന്ന് സമരസമിതി പ്രതികരിച്ചു. വിഷയത്തില് പരിഹാരം കാണാമെന്ന് മുഖ്യമന്ത്രി ഉറപ്പുനല്കിയതായി കൂടിക്കാഴ്ചയ്ക്കു ശേഷം ബിഷപ്പ് ആംബ്രോസ് പുത്തന്വീട്ടില് പറഞ്ഞു. മുഖ്യമന്ത്രിയുടെ ഉറപ്പില് വിശ്വാസമുണ്ടെന്നും സമാധാനപരാമായി നടത്തുന്ന ഉപവാസ സമരം തുടരുമെന്നും സമരസമിതി നേതാവ് ജോസഫ് ബെന്നി വ്യക്തമാക്കി.