ന്യൂഡൽഹി: കൊച്ചിയിൽ നടന്ന അലൻ വാക്കറുടെ സംഗീത പരിപാടിക്കിടെ മൊബൈൽ ഫോണുകൾ മോഷണം പോയ കേസിൽ മൂന്നുപേർ പിടിയിൽ. ഡൽഹിയിൽ നിന്നാണ് ഇവരെ പിടികൂടിയത്.
ഇവരിൽ നിന്ന് 21 ഫോണുകളും കണ്ടെത്തിയിട്ടുണ്ട്. കണ്ടെടുത്തതിൽ കൂടുതലും ഐ ഫോണുകൾ ആണ്. എന്നാൽ ഈ ഫോണുകൾ കൊച്ചിയിൽ നിന്ന് മോഷണം പോയവയാണോ എന്ന് സ്ഥിരീകരിച്ചിട്ടില്ല. ഇതിനായി ഫോണുകളുടെ IMEI നമ്പർ കണ്ടെത്താൻ പരിശോധന നടക്കുകയാണ്. ഇതുമായി ബന്ധപ്പെട്ട പ്രത്യേക അന്വേഷണ സംഘം ഡൽഹിയിൽ തുടരുന്നുണ്ട്. കൊച്ചിയിലെ ബോൾഗാട്ടി പാലസിൽ നടന്ന പരിപാടിക്കിടെ 21 ഐ ഫോണുകളുൾപ്പെടെ 35 സ്മാർട്ട് ഫോണുകളാണ് നഷ്ടമായതായി പരാതി ലഭിച്ചത്. പതിനായിരത്തോളം പേർ ഈ പരിപാടിയിൽ പങ്കെടുത്തതായാണ് കണക്കുകൂട്ടൽ. കൊച്ചി സിറ്റി പോലീസ് വൻ സുരക്ഷ ഒരുക്കിയിരുന്നു എങ്കിലും മോഷണം നടക്കുകയായിരുന്നു.
സുരക്ഷാ സംവിധാനങ്ങളുടെയെല്ലാം കണ്ണുവെട്ടിച്ചാണ് മോഷണം നടന്നത്. പരിപാടിക്കിടെ മനപൂർവം തിക്കും തിരക്കുമുണ്ടാക്കിയാണ് ഫോണുകൾ മോഷ്ടിച്ചത് എന്നാണ് സൂചന.