മുംബൈ:
ആഡംബര കപ്പലിലെ മയക്കുമരുന്ന് കേസിൽ ആര്യൻ ഖാന്‍റെ അറസ്റ്റിനും ജാമ്യത്തിനും പിന്നാലെ ഷാരൂഖ് ഖാന്‍റെ മാനേജൻ പൂജ ദദ്ലാനിക്ക് മുംബൈ പൊലീസിന്‍റെ സമൻസ്. നാർക്കോട്ടിക്സ് കൺട്രോൾ ബ്യൂറോയുടെ വിജിലൻസ് സംഘവും പൂജക്ക് സമൻസ് അയച്ചേക്കുമെന്നാണ് വിവരം. കോഴ ആരോപണവുമായി ബന്ധപ്പെട്ട കേസിലാണ് ചോദ്യം ചെയ്യൽ.
നാർക്കോട്ടിക്സ് കൺട്രോൾ ബ്യൂറോയുടെ പ്രത്യേക അന്വേഷണ സംഘത്തോട് പൂജ കൂടുതൽ സമയം ആവശ്യപ്പെട്ടതായാണ് വിവരം. ഷാരൂഖിന്‍റെ മകൻ ആര്യനെ ഈ മാസം ആദ്യം ബോംബെ ഹൈകോടതി ജാമ്യത്തിൽ വിട്ടിരുന്നു. ഇതിനുശേഷമാണ് കൂടുതൽ പേരെ ചോദ്യം ചെയ്യാൻ എൻ സി ബി തയാറെടുക്കുന്നത്.
ലോവർ പാരലിൽവെച്ച് കെ പി ഗോസാവിയും സാം ഡിസൂസയുമായി പൂജ കൂടിക്കാഴ്ച നടത്തിയതിന്‍റെ സി സി ടി വി ദൃശ്യങ്ങൾ പ്രത്യേക അന്വേഷണ സംഘത്തിന് ലഭിച്ചതിനെ തുടർന്നാണ് ഇവരെ ചോദ്യം ചെയ്യാൻ വിളിപ്പിച്ചതെന്ന് ടൈംസ് ഓഫ് ഇന്ത്യ റിപ്പോർട്ട് ചെയ്തു. അതേസമയം പൊലീസ് ഔദ്യോഗികമായി പ്രതികരിച്ചിട്ടില്ല.