കാബൂൾ:
അഫ്ഗാനിസ്താന് അഞ്ച് ലക്ഷം ഡോസ് കൊവിഡ് വാക്സിൻ നൽകി ഇന്ത്യ. ഭാരത് ബയോടെക് നിർമ്മിച്ച കോവാക്സിനാണ് ഇന്ത്യ അഫ്ഗാന് കൈമാറിയത്. വിദേശകാര്യമന്ത്രാലയമാണ് അഫ്ഗാന് വാക്സിൻ നൽകിയ വിവരം അറിയിച്ചത്. രാജ്യത്തിനുള്ള മനുഷത്വപരമായ സഹായങ്ങൾ ഇനിയും തുടരുമെന്നും ഇന്ത്യ വ്യക്തമാക്കി.
കാബൂളിലെ ഇന്ദിരാഗാന്ധി ആശുപത്രിക്കാണ് കൈമാറിയത്. വരും ആഴ്ചകളിൽ അഞ്ച് ലക്ഷം ഡോസ് വാക്സിൻ കൂടി ഇന്ത്യ നൽകും. ഭക്ഷ്യധാന്യങ്ങൾ, 10 ലക്ഷം ഡോസ് കോവിഡ് വാക്സിൻ, മരുന്നുകൾ എന്നിവ അഫ്ഗാന് നൽകുമെന്നായിരുന്നു ഇന്ത്യ അറിയിച്ചിരുന്നത്. നേരത്തെ 1.6 ടൺ മരുന്ന് ലോകാരോഗ്യ സംഘടന വഴി ഇന്ത്യ അഫ്ഗാന് കൈമാറിയിരുന്നു.