ന്യൂഡൽഹി:
ഗർഭിണികൾക്ക് ‘നിയമന വിലക്ക്’ ഏർപ്പെടുത്തിയ തീരുമാനം സ്റ്റേറ്റ് ബാങ്ക് ഓഫ് ഇന്ത്യ പിൻവലിച്ചു. പൊതുജനവികാരം കണക്കിലെടുത്താണ് തീരുമാനമെന്ന് എസ്ബിഐ അറിയിച്ചു. പുതുക്കിയ നിർദേശങ്ങൾ ഉപേക്ഷിക്കാനും നിലവിലുള്ള നിർദേശങ്ങൾ തുടരാനും തീരുമാനിച്ചതായി എസ് ബി ഐ പ്രസ്താവനയിലൂടെ വ്യക്തമാക്കി.
എസ് ബി ഐയുടെ തീരുമാനത്തിനെതിരെ രാജ്യവ്യാപക പ്രതിഷേധം ശക്തമായ സാഹചര്യത്തിലാണ് പിന്മാറ്റം. ഡൽഹി വനിത കമീഷൻ, യുവജന പ്രസ്ഥാനങ്ങൾ അടക്കം സംഘടനകൾ തീരുമാനം പിൻവലിക്കണമെന്ന ആവശ്യവുമായി രംഗത്തെത്തിയിരുന്നു.