ഒന്നാം ക്ലാസ് പ്രവേശനത്തിന്‌ ആറു വയസ്സ് നിർബന്ധമാക്കിയ കേന്ദ്ര നിർദേശം സംസ്ഥാനത്ത്‌ നടപ്പാക്കുന്ന കാര്യത്തിൽ മന്ത്രി സഭായോഗം ഇന്ന് തീരുമാനമെടുക്കും. മുഖ്യമന്ത്രിയുമായി ചര്‍ച്ച നടത്തിയ ശേഷമാകും തീരുമാനമെടുക്കുകയെന്ന് മന്ത്രി വി ശിവന്‍കുട്ടി അറിയിച്ചു. സംസ്ഥാനത്തെ സാഹചര്യം കൂടി കണക്കിലെടുത്താകും തീരുമാനമെടുക്കുക. സംസ്ഥാനത്തെ കുട്ടികൾക്ക് ദോഷകരമാകാത്ത വിധമുള്ള തീർപ്പിനാണ് ശ്രമിക്കുന്നതെന്ന് മന്ത്രി പറഞ്ഞു. അതേസമയം, ഒന്നാം ക്ലാസ് പ്രവേശനത്തിന്‌ ആറുവയസ്സ് വേണമെന്ന നിർദേശത്തിൽ ഇളവുതേടി സംസ്ഥാനം കേന്ദ്രത്തെ സമീപിക്കുമെന്നാണ് സൂചന. കേരളം അടക്കം പല സംസ്ഥാനങ്ങളും നിബന്ധന നടപ്പിലാക്കാത്ത സാഹചര്യത്തിലാണ് കേന്ദ്ര സര്‍ക്കാര്‍ സര്‍ക്കുലര്‍ അയച്ചത്. കേരളത്തിൽ കേന്ദ്രീയ വിദ്യാലയങ്ങൾ മാത്രമാണ് നിർദേശം നടപ്പാക്കിയത്. സംസ്ഥാന സിലബസ് പിന്തുടരുന്ന സർക്കാർ-എയ്‌ഡഡ് സ്കൂളുകളിലും സിബിഎസ്ഇ സ്കൂളുകളിലും നിലവില്‍ അഞ്ചു വയസ്സിലാണ് ഒന്നാം ക്ലാസ് പ്രവേശനം.
By Firdousy E R
വോക്ക് മലയാളത്തില്‍ ഡിജിറ്റല്‍ ജേര്‍ണലിസ്റ്റ് ട്രെയ്‌നി. ജീവന്‍ ടി വിയില്‍ പ്രവര്‍ത്തന പരിചയം.