എറണാകുളം മറൈന്‍ ഡ്രൈവ് ബോട്ട് ജെട്ടിയിലെ വാഹന പാര്‍ക്കിങ്ങില്‍ ബില്‍ അടിക്കുന്ന തൊഴിലാണ് മുളവുകാട് സ്വദേശിയായ മേരി മെറീനയ്ക്ക്. 2018 മാര്‍ച്ച് എട്ടിന് വനിതാ ദിനത്തിലാണ് മെറീന ഈ ജോലിയില്‍ പ്രവേശിക്കുന്നത്. വീട്ടിലെ പ്രാരാബദങ്ങള്‍ കൂടിയതോടെയാണ് മെറീന ജോലിക്കിറങ്ങുന്നത്. ആദ്യം ചെയ്ത ജോലി ഹൗസ് കീപ്പിംഗാണ്. പിന്നീട് ഹോട്ടല്‍ പണി, ബേക്കറിയിലെ ജോലി തുടങ്ങിയ നിരവധി തൊഴിലുകള്‍ എടുത്തു. ഇതുവരെ ചെയ്തതില്‍ ഏറ്റവും നല്ലത് പാര്‍ക്കിങ്ങിലെ ബില്‍ അടിക്കുന്ന ജോലിയാണെന്നും താന്‍ ഈ ജോലിയില്‍ സംതൃപ്തയാണെന്നും മെറീന പറയുന്നു.