കോഴിക്കോട്: കോഴിക്കോട് മെഡിക്കല്‍ കോളേജ് ആശുപത്രിയില്‍ ശസ്ത്രക്രിയ കഴിഞ്ഞ യുവതിയെ ലൈംഗികമായി പീഡിപ്പിച്ച സംഭവത്തില്‍ പ്രതിയായ അറ്റന്ററെ സസ്‌പെന്‍ഡ് ചെയ്തു. മെഡിക്കല്‍ കോളേജിലെ ഗ്രേഡ് 1 അറ്റന്‍ഡര്‍ ആയ വടകര സ്വദേശി ശശീന്ദ്രനെ സര്‍വീസില്‍ നിന്ന് സസ്‌പെന്‍ഡ് ചെയ്തതായി കോഴിക്കോട് മെഡിക്കല്‍ കോളേജില്‍ സൂപ്രണ്ട് അറിയിച്ചു. പ്രാഥമിക അന്വേഷണത്തെ തുടര്‍ന്നാണ് നടപടി. ഇയാളെ പൊലീസ് അറസ്റ്റ് ചെയ്തതിന് പിന്നാലെയാണ് നടപടി. സംഭവത്തില്‍ ആഭ്യന്തര അന്വേഷണത്തിനായി ആരോഗ്യ മന്ത്രി മൂന്നംഗ സമിതിയെ നിയോഗിച്ചു.
ശനിയാഴ്ചയാണ് കേസിനാസ്പദമായ സംഭവം നടന്നത്. തൈറോയ്ഡ് ശസ്ത്രക്രിയ കഴിഞ്ഞ് സര്‍ജിക്കല്‍ ഐസിയുവിലായിരുന്നു യുവതിയെയാണ് പീഡനത്തിനിരയാക്കിയത്. ശസ്ത്രക്രിയ കഴിഞ്ഞ ഉടനെ അര്‍ദ്ധ ബോധാവസ്ഥയിലായിരുന്ന യുവതിക്ക് ആ സമയത്ത് പ്രതികരിക്കാനായില്ല. പിന്നീട് യുവതി ബന്ധുക്കളോട് വിവരം പറയുകയായിരുന്നു. ബന്ധുക്കളുടെ പരാതിയെ തുടര്‍ന്നാണ് മെഡിക്കല്‍ കോളേജ് പോലീസ് കേസെടുത്തത് അന്വേഷണം നടത്തിയാണ് പ്രതിയെ പിടികൂടിയത്.